Looqa 7
romee afsar kay ghulaam kee shifaa
1yah sab kuchh logon ko sunaanay kay baad eesa kafarnahoom chala gaya. 2vahaan sau faujiyon par muqarrar ek afsar raheta tha. un dinon men us ka ek ghulaam jo usay bahut azeez tha beemaar pad gaya. ab vah marnay ko tha. 3choonki afsar nay eesa kay baaray men suna tha is liyay us nay yahoodiyon kay kuchh buzurg yah darakhwaast karnay kay liyay us kay paas bhej diay ki vah a kar ghulaam ko shifa day. 4vah eesa kay paas pahunch kar baday zor say iltija karnay lagay, “yah aadmee is laaiq hai ki aap us kee darakhwaast pooree karen, 5kyoonki vah hamaaree qaum say piyaar karta hai, yahaan tak ki us nay hamaaray liyay ibaadatkhaana bhee taameer karvaaya hai.”
6chunaanchay eesa un kay saath chal pada. lekin jab vah ghar kay qareeb pahunch gaya to afsar nay apnay kuchh dost yah kah kar us kay paas bhej diay ki “khudaavand, meray ghar men aanay kee takleef na karen, kyoonki main is laaiq naheen hoon. 7is liyay main nay khud ko aap kay paas aanay kay laaiq bhee na samjha. bas vaheen say kah den to mera ghulaam shifa pa jaaega. 8kyoonki mujhay khud aala afsaron kay hukm par chalna padta hai aur meray ma-tahet bhee faujee hain. ek ko kaheta hoon, ‘ja!’ to vah jaata hai aur doosray ko ‘a!’ to vah aata hai. isee tarah main apnay naukar ko hukm deta hoon, ‘yah kar!’ to vah karta hai.”
9yah sun kar eesa nihaayat hairaan hua. us nay mud kar apnay peechhay aanay vaalay hujoom say kaha, “main tum ko sachch bataata hoon, main nay israaeel men bhee is qism ka eemaan naheen paaya.”
10jab afsar ka paighaam pahunchaanay vaalay ghar vaapas aaay to unhon nay dekha ki ghulaam kee sehat bahaal ho chukee hai.
beva ka beta zinda kiya jaata hai
11kuchh der kay baad eesa apnay shaagirdon kay saath naain shaher kay liyay ravaana hua. ek bada hujoom bhee saath chal raha tha. 12jab vah shaher kay darvaazay kay qareeb pahuncha to ek janaaza nikla. jo naujavaan faut hua tha us kee maan beva thee aur vah us ka iklauta beta tha. maan kay saath shaher kay bahut say log chal rahay thay. 13usay dekh kar khudaavand ko us par bada taras aaya. us nay us say kaha, “mat ro.” 14phir vah janaazay kay paas gaya aur usay chhua. usay uthaanay vaalay ruk gaay to eesa nay kaha, “ai naujavaan, main tujhay kaheta hoon ki uth!” 15murda uth baitha aur bolnay laga. eesa nay usay us kee maan kay sapurd kar diya.
16yah dekh kar tamaam logon par khauf taaree ho gaya aur vah allaah kee tamjeed karkay kahenay lagay, “hamaaray darmiyaan ek bada nabee barpa hua hai. allaah nay apnee qaum par nazar kee hai.”
17aur eesa kay baaray men yah khabar pooray yahoodiya aur ird-gird kay ilaaqay men phail gaee.
yaheya ka eesa say savaal
18yaheya ko bhee apnay shaagirdon kee maarifat in tamaam vaaqiaat kay baaray men pata chala. is par us nay do shaagirdon ko bula kar 19unhen yah poochhnay kay liyay khudaavand kay paas bheja, “kya aap vahee hain jisay aana hai ya ham kisee aur kay intizaar men rahen?”
20chunaanchay yah shaagird eesa kay paas pahunch kar kahenay lagay, “yaheya baptisma denay vaalay nay hamen yah poochhnay kay liyay bheja hai ki kya aap vahee hain jisay aana hai ya ham kisee aur ka intizaar karen?”
21eesa nay usee vaqt bahut say logon ko shifa dee thee jo mukhtalif qism kee beemaariyon, museebaton aur badroohon kee girift men thay. andhon kee aankhen bhee bahaal ho gaee theen. 22is liyay us nay javaab men yaheya kay qaasidon say kaha, “yaheya kay paas vaapas ja kar usay sab kuchh bata dena jo tum nay dekha aur suna hai. ‘andhay dekhtay, langday chaltay phirtay hain, kodhiyon ko paak-saaf kiya jaata hai, baheray suntay hain, murdon ko zinda kiya jaata hai aur ghareebon ko allaah kee khushkhabaree sunaaee jaatee hai.’ 23yaheya ko bataao, ‘mubaarak hai vah jo meray sabab say thokar kha kar bargashta naheen hota’.”
24yaheya kay yah qaasid chalay gaay to eesa hujoom say yaheya kay baaray men baat karnay laga, “tum registaan men kya dekhnay gaay thay? ek sarkanda jo hava kay har jhonkay say hilta hai? beshak naheen. 25ya kya vahaan ja kar aisay aadmee kee tavaqqo kar rahay thay jo nafees aur mulaaim libaas pahenay huay hai? naheen, jo shaandaar kapday pahentay aur aish-o-ishrat men zindagee guzaartay hain vah shaahee mahelon men paaay jaatay hain. 26to phir tum kya dekhnay gaay thay? ek nabee ko? bilkul saheeh, balki main tum ko bataata hoon ki vah nabee say bhee bada hai. 27usee kay baaray men kalaam-ay-muqaddas men likha hai, ‘dekh main apnay paighambar ko teray aagay aagay bhej deta hoon jo teray saamnay raasta tayyaar karega.’ 28main tum ko bataata hoon ki is duniya men paida honay vaala koee bhee shakhs yaheya say bada naheen hai. to bhee allaah kee baadshaahee men daakhil honay vaala sab say chhota shakhs us say bada hai.”
29baat yah thee ki tamaam qaum bashmool taiks lenay vaalon nay yaheya ka paighaam sun kar allaah ka insaaf maan liya aur yaheya say baptisma liya tha. 30sirf fareesee aur shareeat kay ulma nay apnay baaray men allaah kee marzee ko radd karkay yaheya ka baptisma lenay say inkaar kiya tha.
31eesa nay baat jaaree rakhee, “chunaanchay main is nasal kay logon ko kis say tashbeeh doon? vah kis say mutaabiqat rakhtay hain? 32vah un bachchon kee maanind hain jo baazaar men baithay khel rahay hain. un men say kuchh oonchee aavaaz say doosray bachchon say shikaayat kar rahay hain, ‘ham nay baansree bajaaee to tum na naachay. phir ham nay noha kay geet gaaay, lekin tum na roay.’ 33dekho, yaheya baptisma denay vaala aaya aur na rotee khaaee, na mai pee. yah dekh kar tum kahetay ho ki us men badruh hai. 34phir ibn-ay-aadam khaata aur peeta hua aaya. ab tum kahetay ho, ‘dekho yah kaisa petoo aur sharaabee hai. aur vah taiks lenay vaalon aur gunaahgaaron ka dost bhee hai.’ 35lekin hikmat apnay tamaam bachchon say hee saheeh saabit huee hai.”
eesa shamaaoon fareesee kay ghar men
36ek fareesee nay eesa ko khaana khaanay kee daavat dee. eesa us kay ghar ja kar khaana khaanay kay liyay baith gaya. 37us shaher men ek badachalan aurat rahetee thee. jab usay pata chala ki eesa us fareesee kay ghar men khaana kha raha hai to vah itradaan men beshaqeemat itr la kar 38peechhay say us kay paaon kay paas khadee ho gaee. vah ro padee aur us kay aansoo tapak tapak kar eesa kay paaon ko tar karnay lagay. phir us nay us kay paaon ko apnay baalon say ponchh kar unhen chooma aur un par itr daala. 39jab eesa kay fareesee mezbaan nay yah dekha to us nay dil men kaha, “agar yah aadmee nabee hota to usay maaloom hota ki yah kis qism kee aurat hai jo usay chhoo rahee hai, ki yah gunaahgaar hai.”
40eesa nay in khayaalaat kay javaab men us say kaha, “shamaaoon, main tujhay kuchh bataana chaahata hoon.”
us nay kaha, “jee ustaad, bataaen.”
41eesa nay kaha, “ek saahookaar kay do qarzdaar thay. ek ko us nay chaandee kay 500 sikkay diay thay aur doosray ko 50 sikkay. 42lekin donon apna qarz ada na kar sakay. yah dekh kar us nay donon ka qarz muaaf kar diya. ab mujhay bata, donon qarzdaaron men say kaun usay ziyaada azeez rakhega?”
43shamaaoon nay javaab diya, “meray khayaal men vah jisay ziyaada muaaf kiya gaya.”
eesa nay kaha, “too nay theek andaaza lagaaya hai.” 44aur aurat kee taraf mud kar us nay shamaaoon say baat jaaree rakhee, “kya too is aurat ko dekhta hai? 45jab main is ghar men aaya to too nay mujhay paaon dhonay kay liyay paanee na diya. lekin is nay meray paaon ko apnay aansooon say tar karkay apnay baalon say ponchh kar khushk kar diya hai. too nay mujhay bosa na diya, lekin yah meray andar aanay say lay kar ab tak meray paaon ko choomnay say baaz naheen rahee. 46too nay meray sar par zaitoon ka tel na daala, lekin is nay meray paaon par itr daala. 47is liyay main tujhay bataata hoon ki is kay gunaahon ko go vah bahut hain muaaf kar diya gaya hai, kyoonki is nay bahut muhabbat ka izhaar kiya hai. lekin jisay kam muaaf kiya gaya ho vah kam muhabbat rakhta hai.”
48phir eesa nay aurat say kaha, “teray gunaahon ko muaaf kar diya gaya hai.”
49yah sun kar jo saath baithay thay aapas men kahenay lagay, “yah kis qism ka shakhs hai jo gunaahon ko bhee muaaf karta hai?”
50lekin eesa nay khaatoon say kaha, “teray eemaan nay tujhay bacha liya hai. salaamatee say chalee ja.”