Marqus 3
sookhay huay haath kee shifaa
1kisee aur vaqt jab eesa ibaadatkhaanay men gaya to vahaan ek aadmee tha jis ka haath sookha hua tha. 2sabat ka din tha aur log baday ghaur say dekh rahay thay ki kya eesa us aadmee ko aaj bhee shifa dega. kyoonki vah is par ilzaam lagaanay ka koee bahaana talaash kar rahay thay. 3eesa nay sookhay haath vaalay aadmee say kaha, “uth, darmiyaan men khada ho.” 4phir eesa nay un say poochha, “mujhay bataao, shareeat hamen sabat kay din kya karnay kee ijaazat detee hai, nek kaam karnay kee ya ghalat kaam karnay kee, kisee kee jaan bachaanay kee ya usay tabaah karnay kee?”
sab khaamosh rahay. 5vah ghussay say apnay ird-gird kay logon kee taraf dekhnay laga. un kee sakhtdilee us kay liyay baday dukh ka baais ban rahee thee. phir us nay aadmee say kaha, “apna haath aagay badha.” us nay aisa kiya to us ka haath bahaal ho gaya. 6is par fareesee baahar nikal kar seedhay herodes kee paartee kay afraad kay saath mil kar eesa ko qatl karnay kee saazishen karnay lagay.
jheel kay kinaaray par hujoom
7lekin eesa vahaan say hat kar apnay shaagirdon kay saath jheel kay paas gaya. ek bada hujoom us kay peechhay ho liya. log na sirf galeel kay ilaaqay say aaay balki bahut see aur jagahon yaanee yahoodiya, 8yarooshalam, idoomya, darya-ay-yardan kay paar aur soor aur saida kay ilaaqay say bhee. vajah yah thee ki eesa kay kaam kee khabar un ilaaqon tak bhee pahunch chukee thee aur nateejay men bahut say log vahaan say bhee aaay. 9eesa nay shaagirdon say kaha, “ehatiyaatan ek kashtee us vaqt kay liyay tayyaar kar rakho jab hujoom mujhay hadd say ziyaada dabaanay lagega.” 10kyoonki us din us nay bahuton ko shifa dee thee, is liyay jisay bhee koee takleef thee vah dhakkay day day kar us kay paas aaya taaki usay chhoo sakay. 11aur jab bhee naapaak roohon nay eesa ko dekha to vah us kay saamnay gir kar cheekhen maarnay lageen, “aap allaah kay farzand hain.”
12lekin eesa nay unhen sakhtee say daant kar kaha ki vah usay zaahir na karen.
eesa baarah rasoolon ko muqarrar karta hai
13is kay baad eesa nay pahaad par chadh kar jinhen vah chaahata tha unhen apnay paas bula liya. aur vah us kay paas aaay. 14us nay un men say baarah ko chun liya. unhen us nay apnay rasool muqarrar kar liya taaki vah us kay saath chalen aur vah unhen munaadee karnay kay liyay bhej sakay. 15us nay unhen badruhen nikaalnay ka ikhtiyaar bhee diya.
16jin baarah ko us nay muqarrar kiya un kay naam yah hain : shamaaoon jis ka laqab us nay patras rakha, 17zabdee kay betay yaaqoob aur yoohanna jin ka laqab eesa nay ‘baadal kee garaj kay betay’ rakha, 18andriyaas, filippus, baratulmaaee, mattee, toma, yaaqoob bin halfaee, taddee, shamaaoon mujaahid 19aur yahoodaah iskariyotee jis nay baad men usay dushman kay havaalay kar diya.
eesa aur badroohon ka sardaar
20phir eesa kisee ghar men daakhil hua. is baar bhee itna hujoom jama ho gaya ki eesa ko apnay shaagirdon samet khaana khaanay ka mauqa bhee na mila. 21jab us kay khaandaan kay afraad nay yah suna to vah usay pakad kar lay jaanay kay liyay aaay, kyoonki unhon nay kaha, “vah hosh men naheen hai.”
22lekin shareeat kay jo aalim yarooshalam say aaay thay unhon nay kaha, “yah badroohon kay sardaar baal-zabool kay qabzay men hai. usee kee madad say badroohon ko nikaal raha hai.”
23phir eesa nay unhen apnay paas bula kar tamseelon men javaab diya. “iblees kis tarah iblees ko nikaal sakta hai? 24jis baadshaahee men phoot pad jaaay vah qaaim naheen rah saktee. 25aur jis gharaanay kee aisee haalat ho vah bhee qaaim naheen rah sakta. 26isee tarah agar iblees apnay aap kee mukhaalafat karay aur yoon us men phoot pad jaaay to vah qaaim naheen rah sakta balki khatm ho chuka hai.
27kisee zoraavar aadmee kay ghar men ghus kar us ka maal-o-asbaab lootna us vaqt tak mumkin naheen hai jab tak us aadmee ko baandha na jaaay. phir hee usay loota ja sakta hai.
28main tum say sachch kaheta hoon ki logon kay tamaam gunaah aur kufr kee baaten muaaf kee ja sakengee, khwaah vah kitna hee kufr kyoon na baken. 29lekin jo rooh-ul-quds kay khilaaf kufr bakay usay abad tak muaafee naheen milegee. vah ek abdee gunaah ka qusoorvaar thaherega.” 30eesa nay yah is liyay kaha kyoonki aalim kah rahay thay ki vah kisee badruh kee girift men hai.
eesa kee maan aur bhaaee
31phir eesa kee maan aur bhaaee pahunch gaay. baahar khaday ho kar unhon nay kisee ko usay bulaanay ko bhej diya. 32us kay ird-gird hujoom baitha tha. unhon nay kaha, “aap kee maan aur bhaaee baahar aap ko bula rahay hain.”
33eesa nay poochha, “kaun meree maan aur kaun meray bhaaee hain?” 34aur apnay gird baithay logon par nazar daal kar us nay kaha, “dekho, yah meree maan aur meray bhaaee hain. 35jo bhee allaah kee marzee pooree karta hai vah mera bhaaee, meree bahen aur meree maan hai.”