Marqus 6
eesa ko naasrat men radd kiya jaata hai
1phir eesa vahaan say chala gaya aur apnay vatnee shaher naasrat men aaya. us kay shaagird us kay saath thay. 2sabat kay din vah ibaadatkhaanay men taaleem denay laga. beshatar log us kee baaten sun kar hairatzada huay. unhon nay poochha, “isay yah kahaan say haasil hua hai? yah hikmat jo isay milee hai, aur yah mojizay jo is kay haathon say hotay hain, yah kya hai? 3kya yah vah badhaee naheen hai jo mariyam ka beta hai aur jis kay bhaaee yaaqoob, yoosuf, yahoodaah aur shamaaoon hain? aur kya is kee bahenen yaheen naheen raheteen?” yoon unhon nay us say thokar kha kar usay qabool na kiya.
4eesa nay un say kaha, “nabee kee har jagah izzat hotee hai siva-ay-us kay vatnee shaher, us kay rishtedaaron aur us kay apnay khaandaan kay.”
5vahaan vah koee mojiza na kar saka. us nay sirf chand ek mareezon par haath rakh kar un ko shifa dee. 6aur vah un kee bay-etiqaadee kay sabab say bahut hairaan tha.
eesa baarah shaagirdon ko tableegh karnay bhejta hai
is kay baad eesa nay ird-gird kay ilaaqay men gaaon gaaon ja kar logon ko taaleem dee. 7baarah shaagirdon ko bula kar vah unhen do do karkay mukhtalif jagahon par bhejnay laga. is kay liyay us nay unhen naapaak roohon ko nikaalnay ka ikhtiyaar day kar 8yah hidaayat kee, “safar par apnay saath kuchh na lena siva-ay-ek laathee kay. na rotee, na saamaan kay liyay koee baig, na kamarband men koee paisa, 9na ek say ziyaada soot. tum jootay pahen saktay ho. 10jis ghar men bhee daakhil ho us men us maqaam say chalay jaanay tak thahero. 11aur agar koee maqaam tum ko qabool na karay ya tumhaaree na sunay to phir ravaana hotay vaqt apnay paaon say gard jhaad do. yoon tum un kay khilaaf gavaahee dogay.”
12chunaanchay shaagird vahaan say nikal kar munaadee karnay lagay ki log tauba karen. 13unhon nay bahut see badruhen nikaal deen aur bahut say mareezon par zaitoon ka tel mal kar unhen shifa dee.
yaheya baptisma denay vaalay ka qatl
14baadshaah herodes antipaas nay eesa kay baaray men suna, kyoonki us ka naam mashhoor ho gaya tha. kuchh kah rahay thay, “yaheya baptisma denay vaala murdon men say jee utha hai, is liyay is qism kee mojizaana taaqten us men nazar aatee hain.”
auron nay socha, “yah ilyaas nabee hai.”
15yah khayaal bhee pesh kiya ja raha tha ki vah qadeem zamaanay kay nabiyon jaisa koee nabee hai.
16lekin jab herodes nay us kay baaray men suna to us nay kaha, “yaheya jis ka main nay sar qalam karvaaya hai murdon men say jee utha hai.” 17vajah yah thee ki herodes kay hukm par hee yaheya ko giriftaar karkay jel men daala gaya tha. yah herodiyaas kee khaatir hua tha jo pahelay herodes kay bhaaee filippus kee beevee thee, lekin jis say us nay ab khud shaadee kar lee thee. 18yaheya nay herodes ko bataaya tha, “apnay bhaaee kee beevee say teree shaadee naajaaiz hai.”
19is vajah say herodiyaas us say keena rakhtee aur usay qatl karaana chaahatee thee. lekin is men vah naakaam rahee 20kyoonki herodes yaheya say darta tha. vah jaanta tha ki yah aadmee raastbaaz aur muqaddas hai, is liyay vah us kee hifaazat karta tha. jab bhee us say baat hotee to herodes sun sun kar badee uljhan men pad jaata. to bhee vah us kee baaten sunna pasand karta tha.
21aakhirkaar herodiyaas ko herodes kee saalagirah par achchha mauqa mil gaya. saalagirah ko manaanay kay liyay herodes nay apnay baday sarkaaree afsaron, miltree kamaandaron aur galeel kay avval darjay kay shaheriyon kee ziyaafat kee. 22ziyaafat kay dauraan herodiyaas kee betee andar a kar naachnay lagee. herodes aur us kay mehamaanon ko yah bahut pasand aaya aur us nay ladkee say kaha, “jo jee chaahay mujh say maang to main vah tujhay doonga.” 23balki us nay qasam kha kar kaha, “jo bhee too maangegee main tujhay doonga, khwaah baadshaahee ka aadha hissa hee kyoon na ho.”
24ladkee nay nikal kar apnee maan say poochha, “main kya maangoon?”
maan nay javaab diya, “yaheya baptisma denay vaalay ka sar.”
25ladkee phurtee say andar ja kar baadshaah kay paas vaapas aaee aur kaha, “main chaahatee hoon ki aap mujhay abhee abhee yaheya baptisma denay vaalay ka sar tray men mangva den.”
26yah sun kar baadshaah ko bahut dukh hua. lekin apnee qasmon aur mehamaanon kee maujoodgee kee vajah say vah inkaar karnay kay liyay bhee tayyaar naheen tha. 27chunaanchay us nay fauran jallaad ko bhej kar hukm diya ki vah yaheya ka sar lay aaay. jallaad nay jel men ja kar yaheya ka sar qalam kar diya. 28phir vah usay tray men rakh kar lay aaya aur ladkee ko day diya. ladkee nay usay apnee maan kay sapurd kiya. 29jab yaheya kay shaagirdon ko yah khabar pahunchee to vah aaay aur us kee laash lay kar usay qabr men rakh diya.
eesa 5000 afraad ko khaana khilaata hai
30rasool vaapas a kar eesa kay paas jama huay aur usay sab kuchh sunaanay lagay jo unhon nay kiya aur sikhaaya tha. 31is dauraan itnay log a aur ja rahay thay ki unhen khaana khaanay ka mauqa bhee na mila. is liyay eesa nay baarah shaagirdon say kaha, “aao, ham logon say alag ho kar kisee ghair’aabaad jagah jaaen aur aaraam karen.” 32chunaanchay vah kashtee par savaar ho kar kisee veeraan jagah chalay gaay.
33lekin bahut say logon nay unhen jaatay vaqt pahechaan liya. vah paidal chal kar tamaam shaheron say nikal aaay aur daud daud kar un say pahelay manzil-ay-maqsood tak pahunch gaay. 34jab eesa nay kashtee par say utar kar baday hujoom ko dekha to usay logon par taras aaya, kyoonki vah un bhedon kee maanind thay jin ka koee charvaaha na ho. vaheen vah unhen bahut see baaten sikhaanay laga.
35jab din dhalnay laga to us kay shaagird us kay paas aaay aur kaha, “yah jagah veeraan hai aur din dhalnay laga hai. 36in ko rukhsat kar den taaki yah ird-gird kee bastiyon aur deehaaton men ja kar khaanay kay liyay kuchh khareed len.”
37lekin eesa nay unhen kaha, “tum khud inhen kuchh khaanay ko do.”
unhon nay poochha, “ham is kay liyay darkaar chaandee kay 200 sikkay kahaan say lay kar rotee khareednay jaaen aur inhen khilaaen?”
38us nay kaha, “tumhaaray paas kitnee rotiyaan hain? ja kar pata karo!”
unhon nay maaloom kiya. phir dubaara us kay paas a kar kahenay lagay, “hamaaray paas paanch rotiyaan aur do machhliyaan hain.”
39is par eesa nay unhen hidaayat dee, “tamaam logon ko gurohon men haree ghaas par bitha do.” 40chunaanchay log sau sau aur pachaas pachaas kee soorat men baith gaay. 41phir eesa nay un paanch rotiyon aur do machhliyon ko lay kar aasmaan kee taraf dekha aur shukrguzaaree kee dua kee. phir us nay rotiyon ko tod tod kar shaagirdon ko diya taaki vah logon men taqseem karen. us nay do machhliyon ko bhee tukday tukday karkay shaagirdon kay zareeay un men taqseem karvaaya. 42aur sab nay jee bhar kar khaaya. 43jab shaagirdon nay rotiyon aur machhliyon kay bachay huay tukday jama kiay to baarah tokray bhar gaay. 44khaanay vaalay mardon kee kul taadaad 5,000 thee.
eesa paanee par chalta hai
45is kay ain baad eesa nay apnay shaagirdon ko majboor kiya ki vah kashtee par savaar ho kar aagay niklen aur jheel kay paar kay shaher bait-saida jaaen. itnay men vah hujoom ko rukhsat karna chaahata tha. 46unhen khairbaad kahenay kay baad vah dua karnay kay liyay pahaad par chadh gaya. 47shaam kay vaqt shaagirdon kee kashtee jheel kay beech tak pahunch gaee thee jabki eesa khud khushkee par akela rah gaya tha. 48vahaan say us nay dekha ki shaagird kashtee ko khenay men badee jidd-o-jahd kar rahay hain, kyoonki hava un kay khilaaf chal rahee thee. taqreeban teen bajay raat kay vaqt eesa paanee par chaltay huay un kay paas aaya. vah un say aagay nikalna chaahata tha, 49lekin jab unhon nay usay jheel kee satah par chaltay huay dekha to sochnay lagay, “yah koee bhoot hai” aur cheekhen maarnay lagay. 50kyoonki sab nay usay dekh kar dahshat khaaee.
lekin eesa fauran un say mukhaatib ho kar bola, “hausla rakho! main hee hoon. mat ghabraao.” 51phir vah un kay paas aaya aur kashtee men baith gaya. usee vaqt hava tham gaee. shaagird nihaayat hee hairatzada huay. 52kyoonki jab rotiyon ka mojiza kiya gaya tha to vah is ka matlab naheen samjhay thay balki un kay dil behiss ho gaay thay.
gannesarat men mareezon kee shifaa
53jheel ko paar karkay vah gannesarat shaher kay paas pahunch gaay aur langar daal diya. 54joon hee vah kashtee say utray logon nay eesa ko pahechaan liya. 55vah bhaag bhaag kar us pooray ilaaqay men say guzray aur mareezon ko chaarpaaiyon par utha utha kar vahaan lay aaay jahaan kaheen unhen khabar milee ki vah thahera hua hai. 56jahaan bhee vah gaya chaahay gaaon, shaher ya bastee men, vahaan logon nay beemaaron ko chaukon men rakh kar us say minnat kee ki vah kam az kam unhen apnay libaas kay daaman ko chhoonay day. aur jis nay bhee usay chhua usay shifa milee.