Mattee 26
eesa kay khilaaf mansoobaabandiyaan
1yah baaten khatm karnay par eesa shaagirdon say mukhaatib hua, 2“tum jaantay ho ki do din kay baad fasah kee eed shuroo hogee. us vaqt ibn-ay-aadam ko dushman kay havaalay kiya jaaega taaki usay masloob kiya jaaay.”
3phir raahanuma imaam aur qaum kay buzurg kaaifa naamee imaam-ay-aazam kay mahel men jama hue 4aur eesa ko kisee chaalaakee say giriftaar karkay qatl karnay kee saazishen karnay lagay. 5unhon nay kaha, “lekin yah eed kay dauraan naheen hona chaahiay, aisa na ho ki avaam men halchal mach jaaay.”
khaatoon eesa par khushboo undelatee hai
6itnay men eesa bait-aniyaah a kar ek aadmee kay ghar men daakhil hua jo kisee vaqt kodh ka mareez tha. us ka naam shamaaoon tha. 7eesa khaana khaanay kay liyay baith gaya to ek aurat aaee jis kay paas nihaayat qeemtee itr ka itradaan tha. us nay usay eesa kay sar par undel diya. 8shaagird yah dekh kar naaraaz huay. unhon nay kaha, “itna qeemtee itr zaaay karnay kee kya zaroorat thee? 9yah bahut mahengee cheez hai. agar isay becha jaata to is kay paisay ghareebon ko diay ja saktay thay.”
10lekin un kay khayaal pahechaan kar eesa nay un say kaha, “tum isay kyoon tang kar rahay ho? is nay to meray liyay ek nek kaam kiya hai. 11ghareeb to hamesha tumhaaray paas rahengay, lekin main hamesha tak tumhaaray paas naheen rahoonga. 12mujh par itr undelanay say us nay meray badan ko dafan honay kay liyay tayyaar kiya hai. 13main tum ko sachch bataata hoon ki tamaam duniya men jahaan bhee allaah kee khushkhabaree ka elaan kiya jaaega vahaan log is khaatoon ko yaad karkay vah kuchh sunaaengay jo is nay kiya hai.”
eesa ko dushman kay havaalay karnay ka mansoobaa
14phir yahooda iskariyotee jo baarah shaagirdon men say ek tha raahanuma imaamon kay paas gaya. 15us nay poochha, “aap mujhay eesa ko aap kay havaalay karnay kay ivz kitnay paisay denay kay liyay tayyaar hain?” unhon nay us kay liyay chaandee kay 30 sikkay mut’ayyin kiay. 16us vaqt say yahooda eesa ko un kay havaalay karnay ka mauqa dhoondnay laga.
fasah kee eed kay liyay tayyaariyaan
17bekhameeree rotee kee eed aaee. pahelay din eesa kay shaagirdon nay us kay paas a kar poochha, “ham kahaan aap kay liyay fasah ka khaana tayyaar karen?”
18us nay javaab diya, “yarooshalam shaher men fulaan aadmee kay paas jaao aur usay bataao, ‘ustaad nay kaha hai ki mera muqarrara vaqt qareeb a gaya hai. main apnay shaagirdon kay saath fasah kee eed ka khaana aap kay ghar men khaaoonga’.”
19shaagirdon nay vah kuchh kiya jo eesa nay unhen bataaya tha aur fasah kee eed ka khaana tayyaar kiya.
kaun ghaddaar hai?
20shaam kay vaqt eesa baarah shaagirdon kay saath khaana khaanay kay liyay baith gaya. 21jab vah khaana kha rahay thay to us nay kaha, “main tum ko sachch bataata hoon ki tum men say ek mujhay dushman kay havaalay kar dega.”
22shaagird yah sun kar nihaayat ghamgeen huay. baaree baaree vah us say poochhnay lagay, “khudaavand, main to naheen hoon?”
23eesa nay javaab diya, “jis nay meray saath apna haath saalan kay bartan men daala hai vahee mujhay dushman kay havaalay karega. 24ibn-ay-aadam to kooch kar jaaega jis tarah kalaam-ay-muqaddas men likha hai, lekin us shakhs par afsos jis kay vaseelay say usay dushman kay havaalay kar diya jaaega. us kay liyay behatar yah hota ki vah kabhee paida hee na hota.”
25phir yahooda nay jo usay dushman kay havaalay karnay ko tha poochha, “ustaad, main to naheen hoon?”
eesa nay javaab diya, “jee, tum nay khud kaha hai.”
fasah ka aakhiree khaanaa
26khaanay kay dauraan eesa nay rotee lay kar shukrguzaaree kee dua kee aur usay tukday karkay shaagirdon ko day diya. us nay kaha, “yah lo aur khaao. yah mera badan hai.”
27phir us nay mai ka piyaala lay kar shukrguzaaree kee dua kee aur usay unhen day kar kaha, “tum sab is men say piyo. 28yah mera khoon hai, naay ahd ka vah khoon jo bahuton kay liyay bahaaya jaata hai taaki un kay gunaahon ko muaaf kar diya jaaay. 29main tum ko sachch bataata hoon ki ab say main angoor ka yah ras naheen piyoonga, kyoonki aglee dafa isay tumhaaray saath apnay baap kee baadshaahee men hee piyoonga.”
30phir ek zaboor ga kar vah niklay aur zaitoon kay pahaad kay paas pahunchay.
patras kay inkaar kee peshgoee
31eesa nay unhen bataaya, “aaj raat tum sab meree baabat bargashta ho jaaogay, kyoonki kalaam-ay-muqaddas men allaah farmaata hai, ‘main charvaahay ko maar daaloonga aur revad kee bheden tittar-bittar ho jaaengee.’ 32lekin apnay jee uthnay kay baad main tumhaaray aagay aagay galeel pahunchoonga.”
33patras nay etiraaz kiya, “doosray beshak sab aap kee baabat bargashta ho jaaen, lekin main kabhee naheen hoonga.”
34eesa nay javaab diya, “main tujhay sachch bataata hoon, isee raat murgh kay baang denay say pahelay pahelay too teen baar mujhay jaannay say inkaar kar chuka hoga.”
35patras nay kaha, “hargiz naheen! main aap ko jaannay say kabhee inkaar naheen karoonga, chaahay mujhay aap kay saath marna bhee paday.”
doosron nay bhee yahee kuchh kaha.
gatsamanee baagh men eesa kee duaa
36eesa apnay shaagirdon kay saath ek baagh men pahuncha jis ka naam gatsamanee tha. us nay un say kaha, “yahaan baith kar mera intizaar karo. main dua karnay kay liyay aagay jaata hoon.” 37us nay patras aur zabdee kay do beton yaaqoob aur yoohanna ko saath liya. vahaan vah ghamgeen aur beqaraar honay laga. 38us nay un say kaha, “main dukh say itna daba hua hoon ki marnay ko hoon. yahaan thaher kar meray saath jaagtay raho.”
39kuchh aagay ja kar vah aundhay munh zameen par gir kar yoon dua karnay laga, “ai meray baap, agar mumkin ho to dukh ka yah piyaala mujh say hat jaaay. lekin meree naheen balki teree marzee pooree ho.”
40vah apnay shaagirdon kay paas vaapas aaya to dekha ki vah so rahay hain. us nay patras say poochha, “kya tum log ek ghanta bhee meray saath naheen jaag sakay? 41jaagtay aur dua kartay raho taaki aazmaaish men na pado. kyoonki rooh to tayyaar hai lekin jism kamzor.”
42ek baar phir us nay ja kar dua kee, “meray baap, agar yah piyaala meray piay baghair hat naheen sakta to phir teree marzee pooree ho.” 43jab vah vaapas aaya to dubaara dekha ki vah so rahay hain, kyoonki neend kee badaulat un kee aankhen bojhal theen.
44chunaanchay vah unhen dubaara chhod kar chala gaya aur teesree baar yahee dua karnay laga. 45phir eesa shaagirdon kay paas vaapas aaya aur un say kaha, “abhee tak so aur aaraam kar rahay ho? dekho, vaqt a gaya hai ki ibn-ay-aadam gunaahgaaron kay havaalay kiya jaaay. 46utho! aao, chalen. dekho, mujhay dushman kay havaalay karnay vaala qareeb a chuka hai.”
eesa kee giriftaaree
47vah abhee yah baat kar hee raha tha ki yahooda pahunch gaya, jo baarah shaagirdon men say ek tha. us kay saath talvaaron aur laathiyon say les aadmiyon ka bada hujoom tha. unhen raahanuma imaamon aur qaum kay buzurgon nay bheja tha. 48is ghaddaar yahooda nay unhen ek imtiyaazee nishaan diya tha ki jis ko main bosa doon vahee eesa hai. usay giriftaar kar lena.
49joon hee vah pahunchay yahooda eesa kay paas gaya aur “ustaad, asslaamu alaikum!” kah kar usay bosa diya.
50eesa nay kaha, “dost, kya too isee maqsad say aaya hai?”
phir unhon nay usay pakad kar giriftaar kar liya. 51is par eesa kay ek saathee nay apnee talvaar miyaan say nikaalee aur imaam-ay-aazam kay ghulaam ko maar kar us ka kaan uda diya. 52lekin eesa nay kaha, “apnee talvaar ko miyaan men rakh, kyoonki jo bhee talvaar chalaata hai usay talvaar say maara jaaega. 53ya kya too naheen samajhta ki mera baap mujhay hazaaron farishtay fauran bhej dega agar main unhen talab karoon? 54lekin agar main aisa karta to phir kalaam-ay-muqaddas kee peshgoiyaan kis tarah pooree hoteen jin kay mutaabiq yah aisa hee hona hai?”
55us vaqt eesa nay hujoom say kaha, “kya main daakoo hoon ki tum talvaaren aur laathiyaan liyay mujhay giriftaar karnay niklay ho? main to rozaana bait-ul-muqaddas men baith kar taaleem deta raha, magar tum nay mujhay giriftaar naheen kiya. 56lekin yah sab kuchh is liyay ho raha hai taaki nabiyon kay saheefon men darj peshgoiyaan pooree ho jaaen.”
phir tamaam shaagird usay chhod kar bhaag gaay.
57jinhon nay eesa ko giriftaar kiya tha vah usay kaaifa imaam-ay-aazam kay ghar lay gaay jahaan shareeat kay tamaam ulma aur qaum kay buzurg jama thay. 58itnay men patras kuchh faasilay par eesa kay peechhay peechhay imaam-ay-aazam kay sahen tak pahunch gaya. us men daakhil ho kar vah mulaazimon kay saath aag kay paas baith gaya taaki is silsilay ka anjaam dekh sakay. 59makaan kay andar raahanuma imaam aur yahoodee adaalat-ay-aliya kay tamaam afraad eesa kay khilaaf jhootee gavaahiyaan dhoond rahay thay taaki usay saza-ay-maut dilva saken. 60bahut say jhootay gavaah saamnay aaay, lekin koee aisee gavaahee na milee. aakhirkaar do aadmiyon nay saamnay a kar 61yah baat pesh kee, “is nay kaha hai ki main allaah kay bait-ul-muqaddas ko dha kar usay teen din kay andar andar dubaara taameer kar sakta hoon.”
62phir imaam-ay-aazam nay khaday ho kar eesa say kaha, “kya too koee javaab naheen dega? yah kya gavaahiyaan hain jo yah log teray khilaaf day rahay hain?”
63lekin eesa khaamosh raha. imaam-ay-aazam nay us say ek aur savaal kiya, “main tujhay zinda khuda kee qasam day kar poochhta hoon ki kya too allaah ka farzand maseeh hai?”
64eesa nay kaha, “jee, too nay khud kah diya hai. aur main tum sab ko bataata hoon ki aainda tum ibn-ay-aadam ko qaadir-ay-mutlaq kay dahenay haath baithay aur aasmaan kay baadlon par aatay huay dekhogay.”
65imaam-ay-aazam nay ranjish ka izhaar karkay apnay kapday phaad liyay aur kaha, “is nay kufr baka hai! hamen mazeed gavaahon kee kya zaroorat rahee! aap nay khud sun liya hai ki is nay kufr baka hai. 66aap ka kya faisla hai?”
unhon nay javaab diya, “yah saza-ay-maut kay laaiq hai.”
67phir vah us par thooknay aur us kay mukkay maarnay lagay. baaz nay us kay thappad maar maar kar 68kaha, “ai maseeh, nubuvvat karkay hamen bata ki tujhay kis nay maara.”
patras eesa ko jaannay say inkaar karta hai
69is dauraan patras baahar sahen men baitha tha. ek naukraanee us kay paas aaee. us nay kaha, “tum bhee galeel kay us aadmee eesa kay saath thay.”
70lekin patras nay un sab kay saamnay inkaar kiya, “main naheen jaanta ki too kya baat kar rahee hai.” yah kah kar 71vah baahar get tak gaya. vahaan ek aur naukraanee nay usay dekha aur paas khaday logon say kaha, “yah aadmee eesa naasree kay saath tha.”
72dubaara patras nay inkaar kiya. is dafa us nay qasam kha kar kaha, “main is aadmee ko naheen jaanta.”
73thodee der kay baad vahaan khaday kuchh logon nay patras kay paas a kar kaha, “tum zaroor un men say ho kyoonki tumhaaree bolee say saaf pata chalta hai.”
74is par patras nay qasam kha kar kaha, “mujh par laanat agar main jhoot bol raha hoon. main is aadmee ko naheen jaanta!” fauran murgh kee baang sunaaee dee. 75phir patras ko vah baat yaad aaee jo eesa nay kahee thee, “murgh kay baang denay say pahelay pahelay too teen baar mujhay jaannay say inkaar kar chuka hoga.” is par vah baahar nikla aur tootay dil say khoob roya.