Mattee 27
eesa ko peelaatus kay saamnay pesh kiya jaata hai
1subah-saveray tamaam raahanuma imaam aur qaum kay tamaam buzurg is faislay tak pahunch gaay ki eesa ko saza-ay-maut dee jaaay. 2vah usay baandh kar vahaan say lay gaay aur romee gavarnar peelaatus kay havaalay kar diya.
yahooda kee khudkushee
3jab yahooda nay jis nay usay dushman kay havaalay kar diya tha dekha ki us par saza-ay-maut ka fatwa day diya gaya hai to us nay pachhta kar chaandee kay 30 sikkay raahanuma imaamon aur qaum kay buzurgon ko vaapas kar diay. 4us nay kaha, “main nay gunaah kiya hai, kyoonki ek bequsoor aadmee ko saza-ay-maut dee gaee hai aur main hee nay usay aap kay havaalay kiya hai.”
unhon nay javaab diya, “hamen kya! yah tera masla hai.” 5yahooda chaandee kay sikkay bait-ul-muqaddas men phaink kar chala gaya. phir us nay ja kar phaansee lay lee.
6raahanuma imaamon nay sikkon ko jama karkay kaha, “shareeat yah paisay bait-ul-muqaddas kay khazaanay men daalnay kee ijaazat naheen detee, kyoonki yah khoonrezee ka muaavaza hai.” 7aapas men mashvra karnay kay baad unhon nay kumhaar ka khet khareednay ka faisla kiya taaki pardesiyon ko dafnaanay kay liyay jagah ho. 8is liyay yah khet aaj tak khoon ka khet kahelaata hai.
9yoon yaramiyaah nabee kee yah peshgoee pooree huee ki “unhon nay chaandee kay 30 sikkay liyay yaanee vah raqam jo israaeeliyon nay us kay liyay lagaaee thee. 10in say unhon nay kumhaar ka khet khareed liya, bilkul aisa jis tarah rabb nay mujhay hukm diya tha.”
peelaatus eesa kee poochhgichh karta hai
11itnay men eesa ko romee gavarnar peelaatus kay saamnay pesh kiya gaya. us nay us say poochha, “kya tum yahoodiyon kay baadshaah ho?”
eesa nay javaab diya, “jee, aap khud kahetay hain.” 12lekin jab raahanuma imaamon aur qaum kay buzurgon nay us par ilzaam lagaaay to eesa khaamosh raha.
13chunaanchay peelaatus nay dubaara us say savaal kiya, “kya tum yah tamaam ilzaamaat naheen sun rahay jo tum par lagaaay ja rahay hain?”
14lekin eesa nay ek ilzaam ka bhee javaab na diya, is liyay gavarnar nihaayat hairaan hua.
saza-ay-maut ka faislaa
15un dinon yah rivaaj tha ki gavarnar har saal fasah kee eed par ek qaidee ko aazaad kar deta tha. yah qaidee hujoom say muntakhab kiya jaata tha. 16us vaqt jel men ek badnaam qaidee tha. us ka naam bar-abba tha. 17chunaanchay jab hujoom jama hua to peelaatus nay us say poochha, “tum kya chaahatay ho? main bar-abba ko aazaad karoon ya eesa ko jo maseeh kahelaata hai?” 18vah to jaanta tha ki unhon nay eesa ko sirf hasad kee bina par us kay havaalay kiya hai.
19jab peelaatus yoon adaalat kay takht par baitha tha to us kee beevee nay usay paighaam bheja, “is bequsoor aadmee ko haath na lagaaen, kyoonki mujhay pichhlee raat is kay baais khwaab men shadeed takleef huee.”
20lekin raahanuma imaamon aur qaum kay buzurgon nay hujoom ko uksaaya ki vah bar-abba ko maangen aur eesa kee maut talab karen. gavarnar nay dubaara poochha, 21“main in donon men say kis ko tumhaaray liyay aazaad karoon?”
vah chillaaay, “bar-abba ko.”
22peelaatus nay poochha, “phir main eesa kay saath kya karoon jo maseeh kahelaata hai?”
vah cheekhay, “usay masloob karen.”
23peelaatus nay poochha, “kyoon? us nay kya jurm kiya hai?”
lekin log mazeed shor macha kar cheekhtay rahay, “usay masloob karen!”
24peelaatus nay dekha ki vah kisee nateejay tak naheen pahunch raha balki hangaama barpa ho raha hai. is liyay us nay paanee lay kar hujoom kay saamnay apnay haath dhoay. us nay kaha, “agar is aadmee ko qatl kiya jaaay to main bequsoor hoon, tum hee us kay liyay javaabdih thahero.”
25tamaam logon nay javaab diya, “ham aur hamaaree aulaad us kay khoon kay javaabdih hain.”
26phir us nay bar-abba ko aazaad karkay unhen day diya. lekin eesa ko us nay koday lagaanay ka hukm diya, phir usay masloob karnay kay liyay faujiyon kay havaalay kar diya.
faujee eesa ka mazaaq udaatay hain
27gavarnar kay faujee eesa ko mahel banaam praitoriyum kay sahen men lay gaay aur pooree paltan ko us kay ird-gird ikattha kiya. 28us kay kapday utaar kar unhon nay usay arghvaanee rang ka libaas pahenaaya, 29phir kaantedaar taheniyon ka ek taaj bana kar us kay sar par rakh diya. us kay dahenay haath men chhadee pakda kar unhon nay us kay saamnay ghutnay tek kar us ka mazaaq udaaya, “ai yahoodiyon kay baadshaah, aadaab!” 30vah us par thooktay rahay, chhadee lay kar baar baar us kay sar ko maara. 31phir us ka mazaaq udaanay say thak kar unhon nay arghvaanee libaas utaar kar usay dubaara us kay apnay kapday pahenaaay aur usay masloob karnay kay liyay lay gaay.
eesa ko masloob kiya jaata hai
32shaher say nikaltay vaqt unhon nay ek aadmee ko dekha jo libiya kay shaher kuren ka rahenay vaala tha. us ka naam shamaaoon tha. usay unhon nay saleeb utha kar lay jaanay par majboor kiya. 33yoon chaltay chaltay vah ek maqaam tak pahunch gaay jis ka naam gulguta (yaanee khopdee ka maqaam) tha. 34vahaan unhon nay usay mai pesh kee jis men koee kadvee cheez milaaee gaee thee. lekin chakh kar eesa nay usay peenay say inkaar kar diya.
35phir faujiyon nay usay masloob kiya aur us kay kapday aapas men baant liyay. yah faisla karnay kay liyay ki kis ko kya kya milay unhon nay qur’a daala. 36yoon vah vahaan baith kar us kee paheraadaaree kartay rahay. 37saleeb par eesa kay sar kay oopar ek takhtee laga dee gaee jis par yah ilzaam likha tha, “yah yahoodiyon ka baadshaah eesa hai.” 38do daakuon ko bhee eesa kay saath masloob kiya gaya, ek ko us kay dahenay haath aur doosray ko us kay baaen haath.
39jo vahaan say guzray unhon nay kufr bak kar us kee tazleel kee aur sar hila hila kar apnee hiqaarat ka izhaar kiya. 40unhon nay kaha, “too nay to kaha tha ki main bait-ul-muqaddas ko dha kar usay teen din kay andar andar dubaara taameer kar doonga. ab apnay aap ko bacha! agar too vaaqaee allaah ka farzand hai to saleeb par say utar a.”
41raahanuma imaamon, shareeat kay ulma aur qaum kay buzurgon nay bhee eesa ka mazaaq udaaya, 42“is nay auron ko bachaaya, lekin apnay aap ko naheen bacha sakta. yah israaeel ka baadshaah hai! abhee yah saleeb par say utar aaay to ham is par eemaan lay aaengay. 43is nay allaah par bharosa rakha hai. ab allaah isay bachaaay agar vah isay chaahata hai, kyoonki is nay kaha, ‘main allaah ka farzand hoon’.”
44aur jin daakuon ko us kay saath masloob kiya gaya tha unhon nay bhee usay laan-taan kee.
eesa kee maut
45dopaher baarah bajay poora mulk andheray men doob gaya. yah taareekee teen ghanton tak rahee. 46phir teen bajay eesa oonchee aavaaz say pukaar utha, “elee, elee, lama shabqatanee” jis ka matlab hai, “ai meray khuda, ai meray khuda, too nay mujhay kyoon tark kar diya hai?”
47yah sun kar paas khaday kuchh log kahenay lagay, “vah ilyaas nabee ko bula raha hai.” 48un men say ek nay fauran daud kar ek isfanj ko mai kay sirkay men duboya aur usay danday par laga kar eesa ko chusaanay kee koshish kee.
49doosron nay kaha, “aao, ham dekhen, shaayad ilyaas a kar usay bachaaay.”
50lekin eesa nay dubaara baday zor say chilla kar dam chhod diya.
51usee vaqt bait-ul-muqaddas kay muqaddastareen kamray kay saamnay latka hua parda oopar say lay kar neechay tak do hisson men phat gaya. zalzla aaya, chataanen phat gaeen 52aur qabren khul gaeen. kaee marhoom muqaddaseen kay jismon ko zinda kar diya gaya. 53vah eesa kay jee uthnay kay baad qabron men say nikal kar muqaddas shaher men daakhil huay aur bahuton ko nazar aaay.
54jab paas khaday romee afsar [a] sau sipaahiyon par muqarrar afsar. aur eesa kee paheraadaaree karnay vaalay faujiyon nay zalzla aur yah tamaam vaaqiaat dekhay to vah nihaayat dahshatzada ho gaay. unhon nay kaha, “yah vaaqaee allaah ka farzand tha.”
55bahut see khavaateen bhee vahaan theen jo kuchh faasilay par is ka mushaahada kar rahee theen. vah galeel men eesa kay peechhay chal kar yahaan tak us kee khidmat kartee aaee theen. 56un men mariyam magdaleenee, yaaqoob aur yoosuf kee maan mariyam aur zabdee kay beton yaaqoob aur yoohanna kee maan bhee theen.
eesa ko dafan kiya jaata hai
57jab shaam honay ko thee to arimatiyaah ka ek daulatmand aadmee banaam yoosuf aaya. vah bhee eesa ka shaagird tha. 58us nay peelaatus kay paas ja kar eesa kee laash maangee, aur peelaatus nay hukm diya ki vah usay day dee jaaay. 59yoosuf nay laash ko lay kar usay kataan kay ek saaf kafan men lapetaa 60aur apnee zaatee ghairistemaalashuda qabr men rakh diya jo chataan men taraashee gaee thee. aakhir men us nay ek bada patthar ludhka kar qabr ka munh band kar diya aur chala gaya. 61us vaqt mariyam magdaleenee aur doosree mariyam qabr kay muqaabil baithee theen.
qabr kee paheraadaaree
62aglay din, jo sabat ka din tha, raahanuma imaam aur fareesee peelaatus kay paas aaay. 63“janaab,” unhon nay kaha, “hamen yaad aaya ki jab vah dhokebaaz abhee zinda tha to us nay kaha tha, ‘teen din kay baad main jee uthoonga.’ 64is liyay hukm den ki qabr ko teesray din tak mahfooz rakha jaaay. aisa na ho ki us kay shaagird a kar us kee laash ko chura lay jaaen aur logon ko bataaen ki vah murdon men say jee utha hai. agar aisa hua to yah aakhiree dhoka pahelay dhokay say bhee ziyaada bada hoga.”
65peelaatus nay javaab diya, “paheredaaron ko lay kar qabr ko itna mahfooz kar do jitna tum kar saktay ho.”
66chunaanchay unhon nay ja kar qabr ko mahfooz kar liya. qabr kay munh par paday patthar par muhar laga kar unhon nay us par paheredaar muqarrar kar diay.