1 Tavaareekh 19

ammonee daaood kee beizzatee kartay hain

¹kuchh der kay baad ammoniyon ka baadshaah naahas faut hua, aur us ka beta takhtnasheen hua. ²daaood nay socha, “naahas nay hamesha mujh par meharbaanee kee thee, is liyay ab main bhee us kay betay hanoon par meharbaanee karoonga.” us nay baap kee vafaat ka afsos karnay kay liyay hanoon kay paas vafad bheja.

lekin jab daaood kay safeer ammoniyon kay darbaar men pahunch gaay taaki hanoon kay saamnay afsos ka izhaar karen ³to us mulk kay buzurg hanoon baadshaah kay kaan men manfee baaten bharnay lagay, “kya daaood nay in aadmiyon ko vaaqaee sirf is liyay bheja hai ki vah afsos karkay aap kay baap ka ehatiraam karen? hargiz naheen! yah sirf bahaana hai. asal men yah jaasoos hain jo hamaaray mulk kay baaray men maaloomaat haasil karna chaahatay hain taaki us par qabza kar saken.” ⁴chunaanchay hanoon nay daaood kay aadmiyon ko pakadva kar un kee daadhiyaan mundva deen aur un kay libaas ko kamar say lay kar paaon tak kaat kar utaravaaya. isee haalat men baadshaah nay unhen faarigh kar diya.

⁵jab daaood ko is kee khabar milee to us nay apnay qaasidon ko un say milnay kay liyay bheja taaki unhen bataaen, “yareehoo men us vaqt tak thaheray rahen jab tak aap kee daadhiyaan dubaara bahaal na ho jaaen.” kyoonki vah apnee daadhiyon kee vajah say badee sharmindagee mahsoos kar rahay thay.

ammoniyon say jang

⁶ammoniyon ko khoob maaloom tha ki is harkat say ham daaood kay dushman ban gaay hain. is liyay hanoon aur ammoniyon nay masoputaamiya, araam-maaka aur zobaah ko chaandee kay 34,000 kilograam bhej kar kiraaay par rath aur rathasvaar mangavaaay. ⁷yoon unhen 32,000 rath un kay savaaron samet mil gaay. maaka ka baadshaah bhee apnay daston kay saath un say muttahid hua. meedba kay qareeb unhon nay apnee lashkargaah lagaaee. ammonee bhee apnay shaheron say nikal kar jang kay liyay jama huay. ⁸jab daaood ko is ka ilm hua to us nay yoaab ko pooree fauj kay saath un ka muqaabla karnay kay liyay bhej diya. ⁹ammonee apnay daar-ul-hakoomat rabba say nikal kar shaher kay darvaazay kay saamnay hee saf’aara huay jabki doosray mamaalik say aaay huay baadshaah kuchh faasilay par khulay maidaan men khaday ho gaay.

¹⁰jab yoaab nay jaan liya ki saamnay aur peechhay donon taraf say hamlay ka khatra hai to us nay apnee fauj ko do hisson men taqseem kar diya. sab say achchhay faujiyon kay saath vah khud shaam kay sipaahiyon say ladnay kay liyay tayyaar hua. ¹¹baaqee aadmiyon ko us nay apnay bhaaee abeeshai kay havaalay kar diya taaki vah ammoniyon say laden. ¹²ek doosray say alag honay say pahelay yoaab nay abeeshai say kaha, “agar shaam kay faujee mujh par ghaalib aanay lagen to meray paas a kar meree madad karna. lekin agar aap ammoniyon par qaaboo na pa saken to main a kar aap kee madad karoonga. ¹³hausla rakhen! ham dileree say apnee qaum aur apnay khuda kay shaheron kay liyay laden. aur rabb vah kuchh honay day jo us kee nazar men theek hai.”

¹⁴yoaab nay apnee fauj kay saath shaam kay faujiyon par hamla kiya to vah us kay saamnay say bhaagnay lagay. ¹⁵yah dekh kar ammonee bhee us kay bhaaee abeeshai say faraar ho kar shaher men daakhil huay. tab yoaab yarooshalam vaapas chala gaya.

shaam kay khilaaf jang

¹⁶jab shaam kay faujiyon ko shikast kee beizzatee ka ihsaas hua to unhon nay darya-ay-furaat kay paar masoputaamiya men aabaad araamiyon kay paas qaasid bhejay taaki vah bhee ladnay men madad karen. hadad’azar ka kamaandar sofak un par muqarrar hua. ¹⁷jab daaood ko khabar milee to us nay israaeel kay tamaam ladnay kay qaabil aadmiyon ko jama kiya aur darya-ay-yardan ko paar karkay un kay muqaabil saf’aara hua. jab vah yoon un say ladnay kay liyay tayyaar hua to araamee us ka muqaabla karnay lagay. ¹⁸lekin unhen dubaara shikast maan kar faraar hona pada. is dafa un kay 7,000 rathbaanon kay ilaava 40,000 piyaada sipaahee halaak huay. daaood nay fauj kay kamaandar sofak ko bhee maar daala.

¹⁹jo araamee pahelay hadad’azar kay taabay thay unhon nay ab haar maan kar israaeeliyon say sulah kar lee aur un kay taabay ho gaay. us vaqt say araamiyon nay ammoniyon kee madad karnay kee phir jur’at na kee.