1 Tavaareekh 21

daaood kee mardumashumaaree

¹ek din iblees israaeel kay khilaaf uth khada hua aur daaood ko israaeel kee mardumashumaaree karnay par uksaaya. ²daaood nay yoaab aur qaum kay buzurgon ko hukm diya, “daan say lay kar bair-saba tak israaeel kay tamaam qabeelon men say guzartay huay jang karnay kay qaabil mardon ko gin len. phir vaapas a kar mujhay ittila den taaki maaloom ho jaaay ki un kee kul taadaad kya hai.”

³lekin yoaab nay etiraaz kiya, “ai baadshaah meray aaqa, kaash rabb apnay faujiyon kee taadaad sau guna badha day. kyoonki yah to sab aap kay khaadim hain. lekin meray aaqa un kee mardumashumaaree kyoon karna chaahatay hain? israaeel aap kay sabab say kyoon qusoorvaar thaheray?”

⁴lekin baadshaah yoaab kay etiraazaat kay baavujood apnee baat par data raha. chunaanchay yoaab darbaar say ravaana hua aur pooray israaeel men say guzar kar us kee mardumashumaaree kee. is kay baad vah yarooshalam vaapas a gaya. ⁵vahaan us nay daaood ko mardumashumaaree kee pooree riport pesh kee. israaeel men 11,00,000 talvaar chalaanay kay qaabil afraad thay jabki yahoodaah kay 4,70,000 mard thay. ⁶haalaanki yoaab nay laavee aur binyameen kay qabeelon ko mardumashumaaree men shaamil naheen kiya tha, kyoonki usay yah kaam karnay say ghin aatee thee.

⁷allaah ko daaood kee yah harkat buree lagee, is liyay us nay israaeel ko saza dee. ⁸tab daaood nay allaah say dua kee, “mujh say sangeen gunaah sarzad hua hai. ab apnay khaadim ka qusoor muaaf kar. mujh say badee hamaaqat huee hai.” ⁹tab rabb daaood kay ghaibbeen jaad nabee say hamkalaam hua, ¹⁰“daaood kay paas ja kar usay bata dena, ‘rabb tujhay teen sazaaen pesh karta hai. in men say ek chun lay’.”

¹¹jaad daaood kay paas gaya aur usay rabb ka paighaam suna diya. us nay savaal kiya, “aap kis saza ko tarjeeh detay hain? ¹²saat saal kay dauraan kaal? ya yah ki aap kay dushman teen maah tak aap ko talvaar say maar maar kar aap ka taaqqub kartay rahen? ya yah ki rabb kee talvaar israaeel men say guzray? is soorat men rabb ka farishta mulk men vaba phaila kar pooray israaeel ka satyaanaas kar dega.”

¹³daaood nay javaab diya, “haay main kya kahoon? main bahut pareshaan hoon. lekin aadmiyon kay haathon men pad jaanay kee nisbat behatar hai ki ham rabb hee kay haathon men pad jaaen, kyoonki us ka rahem nihaayat azeem hai.”

¹⁴tab rabb nay israaeel men vaba phailnay dee. mulk men 70,000 afraad halaak huay. ¹⁵allaah nay apnay farishtay ko yarooshalam ko tabaah karnay kay liyay bhee bheja. lekin farishta abhee is kay liyay tayyaar ho raha tha ki rabb nay logon kee museebat ko dekh kar taras khaaya aur tabaah karnay vaalay farishtay ko hukm diya, “bas kar! ab baaz a.” us vaqt rabb ka farishta vahaan khada tha jahaan urnaan yaanee araunaah yaboosee apna anaaj gaahata tha. ¹⁶daaood nay apnee nigaah utha kar rabb kay farishtay ko aasmaan-o-zameen kay darmiyaan khaday dekha. apnee talvaar miyaan say khainch kar us nay usay yarooshalam kee taraf badhaaya tha ki daaood buzurgon samet munh kay bal gir gaya. sab taat ka libaas odhay huay thay. ¹⁷daaood nay allaah say iltimaas kee, “main hee nay hukm diya ki ladnay kay qaabil mardon ko gina jaaay. main hee nay gunaah kiya hai, yah mera hee qusoor hai. in bhedon say kya ghaltee huee hai? ai rabb meray khuda, baraah-ay-karam in ko chhod kar mujhay aur meray khaandaan ko saza day. apnee qaum say vaba door kar!”

¹⁸phir rabb kay farishtay nay jaad kee maarifat daaood ko paighaam bheja, “araunaah yaboosee kee gaahanay kee jagah kay paas ja kar us par rabb kee qurbaangaah bana lay.”

¹⁹chunaanchay daaood chadh kar gaahanay kee jagah kay paas aaya jis tarah rabb nay jaad kee maarifat farmaaya tha. ²⁰us vaqt araunaah apnay chaar beton kay saath gandum gaah raha tha. jab us nay peechhay dekha to farishta nazar aaya. araunaah kay betay bhaag kar chhup gaay. ²¹itnay men daaood a pahuncha. usay dekhtay hee araunaah gaahanay kee jagah ko chhod kar us say milnay gaya aur us kay saamnay aundhay munh jhuk gaya. ²²daaood nay us say kaha, “mujhay apnee gaahanay kee jagah day den taaki main yahaan rabb kay liyay qurbaangaah taameer karoon. kyoonki yah karnay say vaba ruk jaaegee. mujhay is kee pooree qeemat bataaen.”

²³araunaah nay daaood say kaha, “meray aaqa aur baadshaah, isay lay kar vah kuchh karen jo aap ko achchha lagay. dekhen, main aap ko apnay bailon ko bhasm honay vaalee qurbaaniyon kay liyay day deta hoon. anaaj ko gaahanay ka saamaan qurbaangaah par rakh kar jala den. mera anaaj ghalla kee nazar kay liyay haazir hai. main khushee say aap ko yah sab kuchh day deta hoon.” ²⁴lekin daaood baadshaah nay inkaar kiya, “naheen, main zaroor har cheez kee pooree qeemat ada karoonga. jo aap kee hai usay main lay kar rabb ko pesh naheen karoonga, na main aisee koee bhasm honay vaalee qurbaanee chadhaaoonga jo mujhay muft men mil jaaay.”

²⁵chunaanchay daaood nay araunaah ko us jagah kay liyay sonay kay 600 sikkay day diay. ²⁶us nay vahaan rabb kee taazeem men qurbaangaah taameer karkay us par bhasm honay vaalee aur salaamatee kee qurbaaniyaan chadhaaeen. jab us nay rabb say iltimaas kee to rabb nay us kee sunee aur javaab men aasmaan say bhasm honay vaalee qurbaanee par aag bhej dee. ²⁷phir rabb nay maut kay farishtay ko hukm diya, aur us nay apnee talvaar ko dubaara miyaan men daal diya.

²⁸yoon daaood nay jaan liya ki rabb nay araunaah yaboosee kee gahenay kee jagah par meree sunee jab main nay yahaan qurbaaniyaan chadhaaeen. ²⁹us vaqt rabb ka vah muqaddas khaima jo moosa nay registaan men banvaaya tha jibaoon kee pahaadee par tha. qurbaaniyon ko jalaanay kee qurbaangaah bhee vaheen thee. ³⁰lekin ab daaood men vahaan ja kar rabb kay huzoor us kee marzee darayaaft karnay kee jur’at na rahee, kyoonki rabb kay farishtay kee talvaar ko dekh kar us par itnee shadeed dahshat taaree huee ki vah ja hee naheen sakta tha.