1 Salaateen 1
adooniyaah kee saazish
1daaood baadshaah bahut boodha ho chuka tha. usay hamesha sardee lagtee thee, aur us par mazeed bistar daalnay say koee faaida na hota tha. 2yah dekh kar mulaazimon nay baadshaah say kaha, “agar ijaazat ho to ham baadshaah kay liyay ek naujavaan kunvaaree dhoond len jo aap kee khidmat men haazir rahay aur aap kee dekh-bhaal karay. ladkee aap kay saath let kar aap ko garm rakhay.” 3chunaanchay vah pooray mulk men kisee khoobsoorat ladkee kee talaash karnay lagay. dhoondtay dhoondtay abeeshaag shooneemee ko chun kar baadshaah kay paas laaya gaya. 4ab say vah us kee khidmat men haazir hotee aur us kee dekh-bhaal kartee rahee. ladkee nihaayat khoobsoorat thee, lekin baadshaah nay kabhee us say sohbat na kee.
5-6 un dinon men adooniyaah baadshaah bannay kee saazish karnay laga. vah daaood kee beevee hajjeet ka beta tha. yoon vah abeesloom ka sautela bhaaee aur us kay marnay par daaood ka sab say bada beta tha. shakl-o-soorat kay lihaaz say log us kee badee taareef kiya kartay thay, aur bachpan say us kay baap nay usay kabhee naheen daanta tha ki too kya kar raha hai. ab adooniyaah apnay aap ko logon kay saamnay pesh karkay elaan karnay laga, “main hee baadshaah banoonga.” is maqsad kay tahet us nay apnay liyay rath aur ghoday khareed kar 50 aadmiyon ko rakh liya taaki vah jahaan bhee jaaay us kay aagay aagay chaltay rahen. 7us nay yoaab bin zarooyaah aur abiyaatar imaam say baat kee to vah us kay saathee ban kar us kee himaayat karnay kay liyay tayyaar huay. 8lekin sadoq imaam, binaayaah bin yahoyada aur naatan nabee us kay saath naheen thay, na simaee, reee ya daaood kay muhaafiz.
9ek din adooniyaah nay ain-raajil chashmay kay qareeb kee chataan zuhalat kay paas ziyaafat kee. kaafee bhed-bakriyaan, gaay-bail aur motay-taazay bachhday zabah kiay gaay. adooniyaah nay baadshaah kay tamaam beton aur yahoodaah kay tamaam shaahee afsaron ko daavat dee thee. 10kuchh logon ko jaan-boojh kar is men shaamil naheen kiya gaya tha. un men us ka bhaaee sulemaan, naatan nabee, binaayaah aur daaood kay muhaafiz shaamil thay.
daaood sulemaan ko baadshaah qaraar deta hai
11tab naatan sulemaan kee maan bat-saba say mila aur bola, “kya yah khabar aap tak naheen pahunchee ki hajjeet kay betay adooniyaah nay apnay aap ko baadshaah bana liya hai? aur hamaaray aaqa daaood ko is ka ilm tak naheen! 12aap kee aur aap kay betay sulemaan kee zindagee baday khatray men hai. is liyay laazim hai ki aap meray mashvray par fauran amal karen. 13daaood baadshaah kay paas ja kar usay bata dena, ‘ai meray aaqa aur baadshaah, kya aap nay qasam kha kar mujh say vaada naheen kiya tha ki tera beta sulemaan meray baad takhtnasheen hoga? to phir adooniyaah kyoon baadshaah ban gaya hai?’ 14aap kee baadshaah say guftagu abhee khatm naheen hogee ki main daakhil ho kar aap kee baat kee tasdeeq karoonga.”
15bat-saba fauran baadshaah kay paas gaee jo sonay kay kamray men leta hua tha. us vaqt to vah bahut umrraseeda ho chuka tha, aur abeeshaag us kee dekh-bhaal kar rahee thee. 16bat-saba kamray men daakhil ho kar baadshaah kay saamnay munh kay bal jhuk gaee. daaood nay poochha, “kya baat hai?” 17bat-saba nay kaha, “meray aaqa, aap nay to rabb apnay khuda kee qasam kha kar mujh say vaada kiya tha ki tera beta sulemaan meray baad takhtnasheen hoga. 18lekin ab adooniyaah baadshaah ban baitha hai aur meray aaqa aur baadshaah ko is ka ilm tak naheen. 19us nay ziyaafat kay liyay bahut say gaay-bail, motay-taazay bachhday aur bhed-bakriyaan zabah karkay tamaam shahezaadon ko daavat dee hai. abiyaatar imaam aur fauj ka kamaandar yoaab bhee in men shaamil hain, lekin aap kay khaadim sulemaan ko daavat naheen milee. 20ai baadshaah meray aaqa, is vaqt tamaam israaeel kee aankhen aap par lagee hain. sab aap say yah jaannay kay liyay tadaptay hain ki aap kay baad kaun takhtnasheen hoga. 21agar aap nay jald hee qadam na uthaaya to aap kay kooch kar jaanay kay fauran baad main aur mera beta adooniyaah ka nishaana ban kar mujrim thaherengay.”
22-23 bat-saba abhee baadshaah say baat kar hee rahee thee ki daaood ko ittila dee gaee ki naatan nabee aap say milnay aaya hai. nabee kamray men daakhil ho kar baadshaah kay saamnay aundhay munh jhuk gaya. 24phir us nay kaha, “meray aaqa, lagta hai ki aap is haq men hain ki adooniyaah aap kay baad takhtnasheen ho. 25kyoonki aaj us nay ain-raajil ja kar bahut say gaay-bail, motay-taazay bachhday aur bhed-bakriyon ko zabah kiya hai. ziyaafat kay liyay us nay tamaam shahezaadon, tamaam faujee afsaron aur abiyaatar imaam ko daavat dee hai. is vaqt vah us kay saath khaana kha kha kar aur mai pee pee kar naara laga rahay hain, ‘adooniyaah baadshaah zindaabaad!’ 26kuchh logon ko jaan-boojh kar daavat naheen dee. un men main aap ka khaadim, sadoq imaam, binaayaah bin yahoyada aur aap ka khaadim sulemaan bhee shaamil hain. 27meray aaqa, kya aap nay vaaqaee is ka hukm diya hai? kya aap nay apnay khaadimon ko ittila diay baghair faisla kiya hai ki yah shakhs baadshaah banega?”
28javaab men daaood nay kaha, “bat-saba ko bulaaen!” vah vaapas aaee aur baadshaah kay saamnay khadee ho gaee. 29baadshaah bola, “rabb kee hayaat kee qasam jis nay fidya day kar mujhay har museebat say bachaaya hai, 30aap ka beta sulemaan meray baad baadshaah hoga balki aaj hee meray takht par baith jaaega. haan, aaj hee main vah vaada poora karoonga jo main nay rabb israaeel kay khuda kee qasam kha kar aap say kiya tha.” 31yah sun kar bat-saba aundhay munh jhuk gaee aur kaha, “mera maalik daaood baadshaah zindaabaad!”
32phir daaood nay hukm diya, “sadoq imaam, naatan nabee aur binaayaah bin yahoyada ko bula laaen.” teenon aae 33to baadshaah un say mukhaatib hua, “meray betay sulemaan ko meray khachchar par bithaaen. phir meray afsaron ko saath lay kar usay jaihoon chashmay tak pahuncha den. 34vahaan sadoq aur naatan usay masah karkay israaeel ka baadshaah bana den. narsingay ko baja baja kar naara lagaana, ‘sulemaan baadshaah zindaabaad!’ 35is kay baad meray betay kay saath yahaan vaapas a jaana. vah mahel men daakhil ho kar meray takht par baith jaaay aur meree jagah hukoomat karay, kyoonki main nay usay israaeel aur yahoodaah ka hukmaraan muqarrar kiya hai.”
36binaayaah bin yahoyada nay javaab diya, “aameen, aisa hee ho! rabb meray aaqa ka khuda is faislay par apnee barkat day. 37aur jis tarah rabb aap kay saath raha usee tarah vah sulemaan kay saath bhee ho, balki vah us kay takht ko aap kay takht say kaheen ziyaada sarbuland karay!” 38phir sadoq imaam, naatan nabee, binaayaah bin yahoyada aur baadshaah kay muhaafiz karetiyon aur faletiyon nay sulemaan ko baadshaah kay khachchar par bitha kar usay jaihoon chashmay tak pahuncha diya. 39sadoq kay paas tel say bhara mendhay ka vah seeng tha jo muqaddas khaimay men pada raheta tha. ab us nay yah tel lay kar sulemaan ko masah kiya. phir narsinga bajaaya gaya aur log mil kar naara lagaanay lagay, “sulemaan baadshaah zindaabaad! sulemaan baadshaah zindaabaad!” 40tamaam log baansree bajaatay aur khushee manaatay huay sulemaan kay peechhay chalnay lagay. jab vah dubaara yarooshalam men daakhil hua to itna shor tha ki zameen laraz uthee.
adooniyaah kee shikast
41logon kee yah aavaazen adooniyaah aur us kay mehamaanon tak bhee pahunch gaeen. thodee der pahelay vah khaanay say faarigh huay thay. narsingay kee aavaaz sun kar yoaab chaunk utha aur poochha, “yah kya hai? shaher say itna shor kyoon sunaaee day raha hai?” 42vah abhee yah baat kar hee raha tha ki abiyaatar ka beta yoontan pahunch gaya. yoaab bola, “hamaaray paas aaen. aap jaisay laaiq aadmee achchhee khabar lay kar a rahay hongay.”
43yoontan nay javaab diya, “afsos, aisa naheen hai. hamaaray aaqa daaood baadshaah nay sulemaan ko baadshaah bana diya hai. 44us nay usay sadoq imaam, naatan nabee, binaayaah bin yahoyada aur baadshaah kay muhaafiz karetiyon aur faletiyon kay saath jaihoon chashmay kay paas bhej diya hai. sulemaan baadshaah kay khachchar par savaar tha. 45jaihoon chashmay kay paas sadoq imaam aur naatan nabee nay usay masah karkay baadshaah bana diya. phir vah khushee manaatay huay shaher men vaapas chalay gaay. pooray shaher men halchal mach gaee. yahee vah shor hai jo aap ko sunaaee day raha hai. 46ab sulemaan takht par baith chuka hai, 47aur darbaaree hamaaray aaqa daaood baadshaah ko mubaarakabaad denay kay liyay us kay paas pahunch gaay hain. vah kah rahay hain, ‘aap ka khuda karay ki sulemaan ka naam aap kay naam say bhee ziyaada mashhoor ho jaaay. us ka takht aap kay takht say kaheen ziyaada sarbuland ho.’ baadshaah nay apnay bistar par jhuk kar allaah kee parastish kee 48aur kaha, ‘rabb israaeel kay khuda kee tamjeed ho jis nay meray beton men say ek ko meree jagah takht par bitha diya hai. us ka shukr hai ki main apnee aankhon say yah dekh saka’.”
49yoontan kay munh say yah khabar sun kar adooniyaah kay tamaam mehamaan ghabra gaay. sab uth kar chaaron taraf muntashir ho gaay. 50adooniyaah sulemaan say khauf kha kar muqaddas khaimay kay paas gaya aur qurbaangaah kay seengon say lipat gaya. 51kisee nay sulemaan kay paas ja kar usay ittila dee, “adooniyaah ko sulemaan baadshaah say khauf hai, is liyay vah qurbaangaah kay seengon say liptay huay kah raha hai, ‘sulemaan baadshaah pahelay qasam khaaay ki vah mujhay maut kay ghaat naheen utaarega’.” 52sulemaan nay vaada kiya, “agar vah laaiq saabit ho to us ka ek baal bhee beeka naheen hoga. lekin jab bhee us men badee paaee jaaay vah zaroor marega.”
53sulemaan nay apnay logon ko adooniyaah kay paas bhej diya taaki vah usay baadshaah kay paas pahunchaaen. adooniyaah aaya aur sulemaan kay saamnay aundhay munh jhuk gaya. sulemaan bola, “apnay ghar chalay jaao!”