1 Salaateen 13

¹vah abhee qurbaangaah kay paas khada apnee qurbaaniyaan pesh karna hee chaahata tha ki ek mard-ay-khuda aan pahuncha. rabb nay usay yahoodaah say bait-el bhej diya tha. ²buland aavaaz say vah qurbaangaah say mukhaatib hua, “ai qurbaangaah! ai qurbaangaah! rabb farmaata hai, ‘daaood kay gharaanay say beta paida hoga jis ka naam yoosiyaah hoga. tujh par vah un imaamon ko qurbaan kar dega jo oonchee jagahon kay mandiron men khidmat kartay aur yahaan qurbaaniyaan pesh karnay kay liyay aatay hain. tujh par insaanon kee haddiyaan jalaaee jaaengee’.” ³phir mard-ay-khuda nay ilaahee nishaan bhee pesh kiya. us nay elaan kiya, “ek nishaan saabit karega ki rabb meree maarifat baat kar raha hai! yah qurbaangaah phat jaaegee, aur is par maujood charbee milee raakh zameen par bikhar jaaegee.”

⁴yarubiaam baadshaah ab tak qurbaangaah kay paas khada tha. jab us nay bait-el kee qurbaangaah kay khilaaf mard-ay-khuda kee baat sunee to vah haath say us kee taraf ishaara karkay garja, “usay pakdo!” lekin joon hee baadshaah nay apna haath badhaaya vah sookh gaya, aur vah usay vaapas na khainch saka. ⁵usee lamhay qurbaangaah phat gaee aur us par maujood raakh zameen par bikhar gaee. bilkul vahee kuchh hua jis ka elaan mard-ay-khuda nay rabb kee taraf say kiya tha.

⁶tab baadshaah iltimaas karnay laga, “rabb apnay khuda ka ghussa thanda karkay meray liyay dua karen taaki mera haath bahaal ho jaaay.” mard-ay-khuda nay us kee shafaaat kee to yarubiaam ka haath fauran bahaal ho gaya.

⁷tab yarubiaam baadshaah nay mard-ay-khuda ko daavat dee, “aaen, meray ghar men khaana kha kar taazaadam ho jaaen. main aap ko tuhfa bhee doonga.” ⁸lekin us nay inkaar kiya, “main aap kay paas naheen aaoonga, chaahay aap mujhay apnee milkiyat ka aadha hissa kyoon na den. main yahaan na rotee khaaoonga, na kuchh piyoonga. ⁹kyoonki rabb nay mujhay hukm diya hai, ‘raastay men na kuchh kha aur na kuchh pee. aur vaapas jaatay vaqt vah raasta na lay jis par say too bait-el pahuncha hai’.”

¹⁰yah kah kar vah farq raasta ikhtiyaar karkay apnay ghar kay liyay ravaana hua.

nabee kee naafarmaanee

¹¹bait-el men ek boodha nabee raheta tha. jab us kay betay us din ghar vaapas aaay to unhon nay usay sab kuchh kah sunaaya jo mard-ay-khuda nay bait-el men kiya aur yarubiaam baadshaah ko bataaya tha. ¹²baap nay poochha, “vah kis taraf gaya?” beton nay usay vah raasta bataaya jo yahoodaah kay mard-ay-khuda nay liya tha. ¹³baap nay hukm diya, “meray gadhay par jaldee say zeen kaso!” beton nay aisa kiya to vah us par baith kar ¹⁴mard-ay-khuda ko dhoondnay gaya.

chaltay chaltay mard-ay-khuda baloot kay darakht kay saay men baitha nazar aaya. buzurg nay poochha, “kya aap vahee mard-ay-khuda hain jo yahoodaah say bait-el aaay thay?” us nay javaab diya, “jee, main vahee hoon.” ¹⁵buzurg nabee nay usay daavat dee, “aaen, meray saath. main ghar men aap ko kuchh khaana khilaata hoon.”

¹⁶lekin mard-ay-khuda nay inkaar kiya, “naheen, na main aap kay saath vaapas ja sakta hoon, na mujhay yahaan khaanay-peenay kee ijaazat hai. ¹⁷kyoonki rabb nay mujhay hukm diya, ‘raastay men na kuchh kha aur na kuchh pee. aur vaapas jaatay vaqt vah raasta na lay jis par say too bait-el pahuncha hai’.”

¹⁸buzurg nabee nay etiraaz kiya, “main bhee aap jaisa nabee hoon! ek farishtay nay mujhay rabb ka naya paighaam pahuncha kar kaha, ‘usay apnay saath ghar lay ja kar rotee khila aur paanee pila’.” buzurg jhoot bol raha tha, ¹⁹lekin mard-ay-khuda us kay saath vaapas gaya aur us kay ghar men kuchh khaaya aur piya.

²⁰vah abhee vahaan baithay khaana kha rahay thay ki buzurg par rabb ka kalaam naazil hua. ²¹us nay buland aavaaz say yahoodaah kay mard-ay-khuda say kaha, “rabb farmaata hai, ‘too nay rabb kay kalaam kee khilaafvarzee kee hai! jo hukm rabb teray khuda nay tujhay diya tha vah too nay nazar’andaaz kiya hai. ²²go us nay farmaaya tha ki yahaan na kuchh kha aur na kuchh pee to bhee too nay vaapas a kar yahaan rotee khaaee aur paanee piya hai. is liyay martay vaqt tujhay teray baapdaada kee qabr men dafnaaya naheen jaaega’.”

²³khaanay kay baad buzurg kay gadhay par zeen kasa gaya aur mard-ay-khuda ko us par bithaaya gaya. ²⁴vah dubaara ravaana hua to raastay men ek sherbabar nay us par hamla karkay usay maar daala. lekin us nay laash ko na chheda balki vah vaheen raastay men padee rahee jabki gadha aur sher donon hee us kay paas khaday rahay.

²⁵kuchh log vahaan say guzray. jab unhon nay laash ko raastay men paday aur sherbabar ko us kay paas khaday dekha to unhon nay bait-el jahaan buzurg nabee raheta tha a kar logon ko ittila dee. ²⁶jab buzurg ko khabar milee to us nay kaha, “vahee mard-ay-khuda hai jis nay rabb kay farmaan kee khilaafvarzee kee. ab vah kuchh hua hai jo rabb nay usay farmaaya tha yaanee us nay usay sherbabar kay havaalay kar diya taaki vah usay phaad kar maar daalay.” ²⁷buzurg nay apnay beton ko gadhay par zeen kasnay ka hukm diya, ²⁸aur vah us par baith kar ravaana hua. jab vahaan pahuncha to dekha ki laash ab tak raastay men padee hai aur gadha aur sher donon hee us kay paas khaday hain. sherbabar nay na laash ko chheda aur na gadhay ko phaada tha.

²⁹buzurg nabee nay laash ko utha kar apnay gadhay par rakha aur usay bait-el laaya taaki us ka maatam karkay usay vahaan dafnaaay. ³⁰us nay laash ko apnee khaandaanee qabr men dafan kiya, aur logon nay “haay, meray bhaaee” kah kar us ka maatam kiya. ³¹janaazay kay baad buzurg nabee nay apnay beton say kaha, “jab main kooch kar jaaoonga to mujhay mard-ay-khuda kee qabr men dafnaana. meree haddiyon ko us kee haddiyon kay paas hee rakhen. ³²kyoonki jo baaten us nay rabb kay hukm par bait-el kee qurbaangaah aur saamriya kay shaheron kee oonchee jagahon kay mandiron kay baaray men kee hain vah yaqeenan pooree ho jaaengee.”

yarubiaam phir bhee naaframaan raheta hai

³³in vaaqiaat kay baavujood yarubiaam apnee shareer harkaton say baaz na aaya. aam logon ko imaam banaanay ka silsila jaaree raha. jo koee bhee imaam banna chaahata usay vah oonchee jagahon kay mandiron men khidmat karnay kay liyay makhsoos karta tha. ³⁴yarubiaam kay gharaanay kay is sangeen gunaah kee vajah say vah aakhirkaar tabaah hua aur roo-ay-zameen par say mit gaya.