1 Salaateen 17
kavvay ilyaas nabee ko khaana khilaatay hain
1ek din ilyaas nabee nay jo jiliaad kay shaher tishbee ka tha akhiyab baadshaah say kaha, “rabb israaeel kay khuda kee qasam jis kee khidmat main karta hoon, aanay vaalay saalon men na os, na baarish padegee jab tak main na kahoon.”
2phir rabb nay ilyaas say kaha, 3“yahaan say chala ja! mashriq kee taraf safar karkay vaadee-ay-kareet men chhup ja jis kee nadee darya-ay-yardan men bahetee hai. 4paanee too nadee say pee sakta hai, aur main nay kavvon ko tujhay vahaan khaana khilaanay ka hukm diya hai.” 5ilyaas rabb kee sun kar ravaana hua aur vaadee-ay-kareet men rahenay laga jis kee nadee darya-ay-yardan men bahetee hai. 6subah-o-shaam kavvay usay rotee aur gosht pahunchaatay rahay, aur paanee vah nadee say peeta tha.
ilyaas saarpat kee beva kay paas
7is pooray arsay men baarish na huee, is liyay nadee aahista aahista sookh gaee. jab us ka paanee bilkul khatm ho gayaa 8to rabb dubaara ilyaas say hamkalaam hua, 9“yahaan say ravaana ho kar saida kay shaher saarpat men ja bas. main nay vahaan kee ek beva ko tujhay khaana khilaanay ka hukm diya hai.” 10chunaanchay ilyaas saarpat kay liyay ravaana hua.
safar kartay kartay vah shaher kay darvaazay kay paas pahunch gaya. vahaan ek beva jalaanay kay liyay lakdiyaan chun kar jama kar rahee thee. usay bula kar ilyaas nay kaha, “zara kisee bartan men paanee bhar kar mujhay thoda sa pilaaen.”
11vah abhee paanee laanay ja rahee thee ki ilyaas nay us kay peechhay aavaaz day kar kaha, “meray liyay rotee ka tukda bhee laana!” 12yah sun kar beva ruk gaee aur bolee, “rabb aap kay khuda kee qasam, meray paas kuchh naheen hai. bas, ek bartan men mutthee bhar maida aur doosray men thoda sa tel rah gaya hai. ab main jalaanay kay liyay chand ek lakdiyaan chun rahee hoon taaki apnay aur apnay betay kay liyay aakhiree khaana pakaaoon. is kay baad hamaaree maut yaqeenee hai.”
13ilyaas nay usay tasallee dee, “daren mat! beshak vah kuchh karen jo aap nay kaha hai. lekin pahelay meray liyay chhotee see rotee bana kar meray paas lay aaen. phir jo baaqee rah gaya ho us say apnay aur apnay betay kay liyay rotee banaaen. 14kyoonki rabb israaeel ka khuda farmaata hai, ‘jab tak rabb baarish barasnay na day tab tak maiday aur tel kay bartan khaalee naheen hongay’.”
15-16 aurat nay ja kar vaisa hee kiya jaisa ilyaas nay usay kaha tha. vaaqaee maida aur tel kabhee khatm na hua. roz-ba-roz ilyaas, beva aur us kay betay kay liyay khaana dastayaab raha. sab kuchh vaisa hee hua jaisa rabb nay ilyaas kee maarifat farmaaya tha.
17ek din beva ka beta beemaar ho gaya. us kee tabeeat bahut kharaab huee, aur hotay hotay us kee jaan nikal gaee. 18tab beva ilyaas say shikaayat karnay lagee, “mard-ay-khuda, mera aap kay saath kya vaasta? aap to sirf is maqsad say yahaan aaay hain ki rabb ko meray gunaah kee yaad dila kar meray betay ko maar daalen!”
19ilyaas nay javaab men kaha, “apnay betay ko mujhay day den.” vah ladkay ko aurat kee god men say utha kar chhat par apnay kamray men lay gaya aur vahaan usay chaarpaaee par rakh kar 20dua karnay laga, “ai rabb meray khuda, too nay is beva ko jis ka mehamaan main hoon aisee museebat men kyoon daal diya hai? too nay us kay betay ko marnay kyoon diya?” 21vah teen baar laash par daraaz hua aur saath saath rabb say iltimaas karta raha, “ai rabb meray khuda, baraah-ay-karam bachchay kee jaan ko us men vaapas aanay day!”
22rabb nay ilyaas kee sunee, aur ladkay kee jaan us men vaapas aaee. 23ilyaas usay utha kar neechay lay aaya aur usay us kee maan ko vaapas day kar bola, “dekhen, aap ka beta zinda hai!” 24aurat nay javaab diya, “ab main nay jaan liya hai ki aap allaah kay paighambar hain aur ki jo kuchh aap rabb kee taraf say boltay hain vah sachch hai.”