1 Salaateen 18
ilyaas israaeel vaapas jaata hai
1bahut din guzar gaay. phir kaal kay teesray saal men rabb ilyaas say hamkalaam hua, “ab ja kar apnay aap ko akhiyab kay saamnay pesh kar. main baarish ka silsila dubaara shuroo kar doonga.”
2chunaanchay ilyaas akhiyab say milnay kay liyay israaeel chala gaya. us vaqt saamriya kaal kee sakht girift men tha, 3is liyay akhiyab nay mahel kay inchaarj abadiyaah ko bulaaya. (abadiyaah rabb ka khauf maanta tha. 4jab eezbil nay rabb kay tamaam nabiyon ko qatl karnay kee koshish kee thee to abadiyaah nay 100 nabiyon ko do ghaaron men chhupa diya tha. har ghaar men 50 nabee rahetay thay, aur abadiyaah unhen khaanay-peenay kee cheezen pahunchaata raheta tha.) 5ab akhiyab nay abadiyaah ko hukm diya, “pooray mulk men say guzar kar tamaam chashmon aur vaadiyon ka muaaina karen. shaayad kaheen kuchh ghaas mil jaaay jo ham apnay ghodon aur khachcharon ko khila kar unhen bacha saken. aisa na ho ki hamen khaanay kee qillat kay baais kuchh jaanvaron ko zabah karna paday.”
6unhon nay muqarrar kiya ki akhiyab kahaan jaaega aur abadiyaah kahaan, phir donon ek doosray say alag ho gaay. 7chaltay chaltay abadiyaah ko achaanak ilyaas us kee taraf aatay huay nazar aaya. jab abadiyaah nay usay pahechaana to vah munh kay bal jhuk kar bola, “meray aaqa ilyaas, kya aap hee hain?”
8ilyaas nay javaab diya, “jee, main hee hoon. jaaen, apnay maalik ko ittila den ki ilyaas a gaya hai.”
9abadiyaah nay etiraaz kiya, “mujh say kya ghaltee huee hai ki aap mujhay akhiyab say marvaana chaahatay hain? 10rabb aap kay khuda kee qasam, baadshaah nay apnay bandon ko har qaum aur mulk men bhej diya hai taaki aap ko dhoond nikaalen. aur jahaan javaab mila ki ilyaas yahaan naheen hai vahaan logon ko qasam khaanee padee ki ham ilyaas ka khoj lagaanay men naakaam rahay hain. 11aur ab aap chaahatay hain ki main baadshaah kay paas ja kar usay bataaoon ki ilyaas yahaan hai? 12ain mumkin hai ki jab main aap ko chhod kar chala jaaoon to rabb ka rooh aap ko utha kar kisee naamaaloom jagah lay jaaay. agar baadshaah meree yah ittila sun kar yahaan aaay aur aap ko na paaay to mujhay maar daalega. yaad rahay ki main javaanee say lay kar aaj tak rabb ka khauf maanta aaya hoon. 13kya meray aaqa tak yah khabar naheen pahunchee ki jab eezbil rabb kay nabiyon ko qatl kar rahee thee to main nay kya kiya? main do ghaaron men pachaas pachaas nabiyon ko chhupa kar unhen khaanay-peenay kee cheezen pahunchaata raha. 14aur ab aap chaahatay hain ki main akhiyab kay paas ja kar usay ittila doon ki ilyaas yahaan a gaya hai? vah mujhay zaroor maar daalega.”
15ilyaas nay kaha, “rabb-ul-afwaaj kee hayaat kee qasam jis kee khidmat main karta hoon, aaj main apnay aap ko zaroor baadshaah ko pesh karoonga.”
16tab abadiyaah chala gaya aur baadshaah ko ilyaas kee khabar pahunchaaee. yah sun kar akhiyab ilyaas say milnay kay liyay aaya.
kya baal haqeeqee maabood hai ya rab?
17ilyaas ko dekhtay hee akhiyab bola, “ai israaeel ko museebat men daalnay vaalay, kya aap vaapas a gaay hain?” 18ilyaas nay etiraaz kiya, “main to israaeel kay liyay museebat ka baais naheen bana balki aap aur aap kay baap ka gharaana. aap rabb kay ahkaam chhod kar baal kay buton kay peechhay lag gaay hain. 19ab main aap ko chailenj deta hoon, tamaam israaeel ko bula kar karmil pahaad par jama karen. saath saath baal devta kay 450 nabiyon ko aur eezbil kee mez par shareek honay vaalay yaseerat devee kay 400 nabiyon ko bhee bulaaen.”
20akhiyab maan gaya. us nay tamaam israaeeliyon aur nabiyon ko bulaaya. jab vah karmil pahaad par jama ho gae 21to ilyaas un kay saamnay ja khada hua aur kaha, “aap kab tak kabhee is taraf, kabhee us taraf langadaatay rahenge [a] dekhiay aayat 26. ? agar rabb khuda hai to sirf usee kee pairvee karen, lekin agar baal vaahid khuda hai to usee kay peechhay lag jaaen.”
log khaamosh rahay. 22ilyaas nay baat jaaree rakhee, “rabb kay nabiyon men say sirf main hee baaqee rah gaya hoon. doosree taraf baal devta kay yah 450 nabee khaday hain. 23ab do bail lay aaen. baal kay nabee ek ko pasand karen aur phir usay tukday tukday karkay apnee qurbaangaah kee lakdiyon par rakh den. lekin vah lakdiyon ko aag na lagaaen. main doosray bail ko tayyaar karkay apnee qurbaangaah kee lakdiyon par rakh doonga. lekin main bhee unhen aag naheen lagaaoonga. 24phir aap apnay devta ka naam pukaaren jabki main rabb ka naam pukaaroonga. jo maabood qurbaanee ko jala kar javaab dega vahee khuda hai.” tamaam log bolay, “aap theek kahetay hain.”
25phir ilyaas nay baal kay nabiyon say kaha, “shuroo karen, kyoonki aap bahut hain. ek bail ko chun kar usay tayyaar karen. lekin usay aag mat lagaana balki apnay devta ka naam pukaaren taaki vah aag bhej day.” 26unhon nay bailon men say ek ko chun kar usay tayyaar kiya, phir baal ka naam pukaarnay lagay. subah say lay kar dopaher tak vah musalsal cheekhtay chillaatay rahay, “ai baal, hamaaree sun!” saath saath vah us qurbaangaah kay ird-gird naachtay rahe [b] lafzee tarjuma : langadaatay huay naachtay rahay. ghaaliban baal kee taazeem men ek khaas qism ka raqs. lihaaza aayat 21 men ilyaas ka savaal, “aap kab tak . . . langadaatay rahengay? jo unhon nay banaaee thee. lekin na koee aavaaz sunaaee dee, na kisee nay javaab diya.
27dopaher kay vaqt ilyaas un ka mazaaq udaanay laga, “ziyaada oonchee aavaaz say bolen! shaayad vah sochon men gharq ho ya apnee haajat rafa karnay kay liyay ek taraf gaya ho. yah bhee ho sakta hai ki vah kaheen safar kar raha ho. ya shaayad vah gaheree neend so gaya ho aur usay jagaanay kee zaroorat hai.”
28tab vah mazeed oonchee aavaaz say cheekhnay-chillaanay lagay. maamool kay mutaabiq vah chhuriyon aur nezon say apnay aap ko zakhmee karnay lagay, yahaan tak ki khoon bahenay laga. 29dopaher guzar gaee, aur vah shaam kay us vaqt tak vajd men rahay jab ghalla kee nazar pesh kee jaatee hai. lekin koee aavaaz na sunaaee dee. na kisee nay javaab diya, na un kay tamaashay par tavajjuh dee.
30phir ilyaas israaeeliyon say mukhaatib hua, “aaen, sab yahaan meray paas aaen!” sab qareeb aaay. vahaan rabb kee ek qurbaangaah thee jo giraaee gaee thee. ab ilyaas nay vah dubaara khadee kee. 31us nay yaaqoob say niklay har qabeelay kay liyay ek ek patthar chun liya. (baad men rabb nay yaaqoob ka naam israaeel rakha tha). 32in baarah pattharon ko lay kar ilyaas nay rabb kay naam kee taazeem men qurbaangaah banaaee. is kay ird-gird us nay itna chauda gadha khoda ki us men taqreeban 15 litar paanee sama sakta tha. 33phir us nay qurbaangaah par lakdiyon ka dher lagaaya aur bail ko tukday tukday karkay lakdiyon par rakh diya. is kay baad us nay hukm diya, “chaar ghaday paanee say bhar kar qurbaanee aur lakdiyon par undel den!” 34jab unhon nay aisa kiya to us nay dubaara aisa karnay ka hukm diya, phir teesree baar. 35aakhirkaar itna paanee tha ki us nay chaaron taraf qurbaangaah say tapak kar gadhay ko bhar diya.
36shaam kay vaqt jab ghalla kee nazar pesh kee jaatee hai ilyaas nay qurbaangaah kay paas ja kar buland aavaaz say dua kee, “ai rabb, ai ibraaheem, ishaaq aur israaeel kay khuda, aaj logon par zaahir kar ki israaeel men too hee khuda hai aur ki main tera khaadim hoon. saabit kar ki main nay yah sab kuchh teray hukm kay mutaabiq kiya hai. 37ai rabb, meree dua sun! meree sun taaki yah log jaan len ki too, ai rabb, khuda hai aur ki too hee un kay dilon ko dubaara apnee taraf maail kar raha hai.”
38achaanak aasmaan say rabb kee aag naazil huee. aag nay na sirf qurbaanee aur lakdee ko bhasm kar diya balki qurbaangaah kay pattharon aur us kay neechay kee mittee ko bhee. gadhay men paanee bhee ek dam sookh gaya.
39yah dekh kar israaeelee aundhay munh gir kar pukaarnay lagay, “rabb hee khuda hai! rabb hee khuda hai!” 40phir ilyaas nay unhen hukm diya, “baal kay nabiyon ko pakad len. ek bhee bachnay na paaay!” logon nay unhen pakad liya to ilyaas unhen neechay vaadee-ay-qaison men lay gaya aur vahaan sab ko maut kay ghaat utaar diya.
baarish hotee hai
41phir ilyaas nay akhiyab say kaha, “ab ja kar kuchh khaaen aur pien, kyoonki mooslaadhaar baarish ka shor sunaaee day raha hai.” 42chunaanchay akhiyab khaanay-peenay kay liyay chala gaya jabki ilyaas karmil pahaad kee chotee par chadh gaya. vahaan us nay jhuk kar apnay sar ko donon ghutnon kay beech men chhupa liya. 43apnay naukar ko us nay hukm diya, “jaao, samundar kee taraf dekho.”
naukar gaya aur samundar kee taraf dekha, phir vaapas a kar ilyaas ko ittila dee, “kuchh bhee nazar naheen aata.” lekin ilyaas nay usay dubaara dekhnay kay liyay bhej diya. is dafa bhee kuchh maaloom na ho saka. saat baar ilyaas nay naukar ko dekhnay kay liyay bheja. 44aakhirkaar jab naukar saatveen dafa gaya to us nay vaapas a kar ittila dee, “ek chhota sa baadal samundar men say nikal kar oopar chadh raha hai. vah aadmee kay haath kay baraabar hai.”
tab ilyaas nay hukm diya, “jaao, akhiyab ko ittila do, ‘ghodon ko fauran rath men joot kar ghar chalay jaaen, varna baarish aap ko rok legee’.” 45naukar ittila denay chala gaya to jald hee aandhee aaee, aasmaan par kaalay kaalay baadal chha gaay aur mooslaadhaar baarish barasnay lagee. akhiyab jaldee say rath par savaar ho kar yazrael kay liyay ravaana ho gaya. 46us vaqt rabb nay ilyaas ko khaas taaqat dee. safar kay liyay kamarbasta ho kar vah akhiyab kay rath kay aagay aagay daud kar us say pahelay yazrael pahunch gaya.