1 Salaateen 2
daaood kee aakhiree hidaayaat
1jab daaood ko mahsoos hua ki kooch kar jaanay ka vaqt qareeb hai to us nay apnay betay sulemaan ko hidaayat kee, 2“ab main vahaan ja raha hoon jahaan duniya kay har shakhs ko jaana hota hai. chunaanchay mazboot hon aur mardaangee dikhaaen. 3jo kuchh rabb aap ka khuda aap say chaahata hai vah karen aur us kee raahon par chaltay rahen. allaah kee shareeat men darj har hukm aur hidaayat par pooray taur par amal karen. phir jo kuchh bhee karengay aur jahaan bhee jaaengay aap ko kaamyaabee naseeb hogee. 4phir rabb meray saath apna vaada poora karega. kyoonki us nay farmaaya hai, ‘agar teree aulaad apnay chaal-chalan par dhyaan day kar pooray dil-o-jaan say meree vafaadaar rahay to israaeel par us kee hukoomat hamesha tak qaaim rahegee.’
5do ek aur baaten bhee hain. aap ko khoob maaloom hai ki yoaab bin zarooyaah nay meray saath kaisa sulook kiya hai. israaeel kay do kamaandaron abinair bin nair aur amaasa bin yatar ko us nay qatl kiya. jab jang naheen thee us nay jang ka khoon baha kar apnee petee aur jooton ko bequsoor khoon say aalooda kar liya hai. 6us kay saath vah kuchh karen jo aap ko munaasib lagay. yoaab boodha to hai, lekin dhyaan den ki vah tabaee maut na maray. 7taaham barzillee jiliaadee kay beton par meharbaanee karen. vah aap kee mez kay mustaqil mehamaan rahen, kyoonki unhon nay meray saath bhee aisa hee sulook kiya jab main nay aap kay bhaaee abeesloom kee vajah say yarooshalam say hijrat kee. 8bahooreem kay binymeenee simaee bin jeera par bhee dhyaan den. jis din main hijrat kartay huay mahenaaim say guzar raha tha to us nay mujh par laanten bhejeen. lekin meree vaapsee par vah darya-ay-yardan par mujh say milnay aaya aur main nay rabb kee qasam kha kar us say vaada kiya ki usay maut kay ghaat naheen utaaroonga. 9lekin aap us ka jurm nazar’andaaz na karen balki us kee munaasib saza den. aap daanishmand hain, is liyay aap zaroor saza denay ka koee na koee tareeqa dhoond nikaalengay. vah boodha to hai, lekin dhyaan den ki vah tabaee maut na maray.”
10phir daaood mar kar apnay baapdaada say ja mila. usay yarooshalam kay us hissay men dafan kiya gaya jo ‘daaood ka shaher’ kahelaata hai. 11vah kul 40 saal tak israaeel ka baadshaah raha, saat saal habroon men aur 33 saal yarooshalam men. 12sulemaan apnay baap daaood kay baad takhtnasheen hua. us kee hukoomat mazbootee say qaaim huee.
adooniyaah kee maut
13ek din daaood kee beevee hajjeet ka beta adooniyaah sulemaan kee maan bat-saba kay paas aaya. bat-saba nay poochha, “kya aap amnapasand iraada rakh kar aaay hain?” adooniyaah bola, “jee, 14balki meree aap say guzaarish hai.”
bat-saba nay javaab diya, “to phir bataaen!” 15adooniyaah nay kaha, “aap to jaantee hain ki asal men baadshaah bannay ka haq mera tha. aur yah tamaam israaeel kee tavaqqo bhee thee. lekin ab to haalaat badal gaay hain. mera bhaaee baadshaah ban gaya hai, kyoonki yahee rabb kee marzee thee. 16ab meree aap say darakhwaast hai. is say inkaar na karen.” bat-saba bolee, “bataaen.” 17adooniyaah nay kaha, “main abeeshaag shooneemee say shaadee karna chaahata hoon. baraah-ay-karam sulemaan baadshaah kay saamnay meree sifaarish karen taaki baat ban jaaay. agar aap baat karen to vah inkaar naheen karega.” 18bat-saba raazee huee, “chalen, theek hai. main aap ka yah muaamala baadshaah ko pesh karoongee.”
19chunaanchay bat-saba sulemaan baadshaah kay paas gaee taaki usay adooniyaah ka muaamala pesh karay. jab darbaar men pahunchee to baadshaah khaday ho kar us say milnay aaya aur us kay saamnay jhuk gaya. phir vah dubaara takht par baith gaya aur hukm diya ki maan kay liyay bhee takht rakha jaaay. baadshaah kay dahenay haath baith kar 20us nay apna muaamala pesh kiya, “meree aap say ek chhotee see guzaarish hai. is say inkaar na karen.” baadshaah nay javaab diya, “ammee, bataaen apnee baat, main inkaar naheen karoonga.” 21bat-saba bolee, “apnay bhaaee adooniyaah ko abeeshaag shooneemee say shaadee karnay den.”
22yah sun kar sulemaan bhadak utha, “adooniyaah kee abeeshaag say shaadee!! yah kaisee baat hai jo aap pesh kar rahee hain? agar aap yah chaahatee hain to kyoon na baraah-ay-raast taqaaza karen ki adooniyaah meree jagah takht par baith jaaay. aakhir vah mera bada bhaaee hai, aur abiyaatar imaam aur yoaab bin zarooyaah bhee us ka saath day rahay hain.” 23phir sulemaan baadshaah nay rabb kee qasam kha kar kaha, “is darakhwaast say adooniyaah nay apnee maut par muhar lagaaee hai. allaah mujhay sakht saza day agar main usay maut kay ghaat na utaaroon. 24rabb kee qasam jis nay meree tasdeeq karkay mujhay meray baap daaood kay takht par bitha diya aur apnay vaaday kay mutaabiq meray liyay ghar taameer kiya hai, adooniyaah ko aaj hee marna hai!”
25phir sulemaan baadshaah nay binaayaah bin yahoyada ko hukm diya ki vah adooniyaah ko maut kay ghaat utaar day. chunaanchay vah nikla aur usay maar daala.
yoaab aur abiyaatar kee sazaa
26abiyaatar imaam say baadshaah nay kaha, “ab yahaan say chalay jaaen. antot men apnay ghar men rahen aur vahaan apnee zameenen sambhaalen. go aap saza-ay-maut kay laaiq hain to bhee main is vaqt aap ko naheen maar doonga, kyoonki aap meray baap daaood kay saamnay rabb qaadir-ay-mutlaq kay ahd ka sandooq uthaaay har jagah un kay saath gaay. aap meray baap kay tamaam takleefdih aur mushkiltareen lamahaat men shareek rahay hain.” 27yah kah kar sulemaan nay abiyaatar ka rabb kay huzoor imaam kee khidmat sar’anjaam denay ka haq mansookh kar diya. yoon rabb kee vah peshgoee pooree huee jo us nay saila men elee kay gharaanay kay baaray men kee thee.
28yoaab ko jald hee pata chala ki adooniyaah aur abiyaatar say kya kuchh hua hai. vah abeesloom kee saazishon men to shareek naheen hua tha lekin baad men adooniyaah ka saathee ban gaya tha. is liyay ab vah bhaag kar rabb kay muqaddas khaimay men daakhil hua aur qurbaangaah kay seengon ko pakad liya. 29sulemaan baadshaah ko ittila dee gaee, “yoaab bhaag kar rabb kay muqaddas khaimay men gaya hai. ab vah vahaan qurbaangaah kay paas khada hai.” yah sun kar sulemaan nay binaayaah bin yahoyada ko hukm diya, “jaao, yoaab ko maar do!”
30binaayaah rabb kay khaimay men ja kar yoaab say mukhaatib hua, “baadshaah farmaata hai ki khaimay say nikal aao!” lekin yoaab nay javaab diya, “naheen, agar marna hai to yaheen maroonga.” binaayaah baadshaah kay paas vaapas aaya aur usay yoaab ka javaab sunaaya. 31tab baadshaah nay hukm diya, “chalo, us kee marzee! usay vaheen maar kar dafan kar do taaki main aur meray baap ka gharaana un qatlon kay javaabdih na thaheren jo us nay bilaavajah kiay hain. 32rabb usay un do aadmiyon kay qatl kee saza day jo us say kaheen ziyaada shareef aur achchhay thay yaanee israaeelee fauj ka kamaandar abinair bin nair aur yahoodaah kee fauj ka kamaandar amaasa bin yatar. yoaab nay donon ko talvaar say maar daala, haalaanki meray baap ko is ka ilm naheen tha. 33yoaab aur us kee aulaad hamesha tak in qatlon kay qusoorvaar thaheren. lekin rabb daaood, us kee aulaad, gharaanay aur takht ko hamesha tak salaamatee ata karay.”
34tab binaayaah nay muqaddas khaimay men ja kar yoaab ko maar diya. usay yahoodaah kay biyaabaan men us kee apnee zameen men dafna diya gaya. 35yoaab kee jagah baadshaah nay binaayaah bin yahoyada ko fauj ka kamaandar bana diya. abiyaatar ka uhda us nay sadoq imaam ko day diya.
simaee kee maut
36is kay baad baadshaah nay simaee ko bula kar usay hukm diya, “yahaan yarooshalam men apna ghar bana kar rahena. aainda aap ko shaher say nikalnay kee ijaazat naheen hai, khwaah aap kaheen bhee jaana chaahen. 37yaqeen jaanen ki joon hee aap shaher kay darvaazay say nikal kar vaadee-ay-qidron ko paar karengay to aap ko maar diya jaaega. tab aap khud apnee maut kay zimmaadaar thaherengay.” 38simaee nay javaab diya, “theek hai, jo kuchh meray aaqa nay farmaaya hai main karoonga.”
simaee der tak baadshaah kay hukm kay mutaabiq yarooshalam men raha. 39teen saal yoon hee guzar gaay. lekin ek din us kay do ghulaam bhaag gaay. chaltay chaltay vah jaat kay baadshaah akees bin maaka kay paas pahunch gaay. kisee nay simaee ko ittila dee, “aap kay ghulaam jaat men thaheray huay hain.” 40vah fauran apnay gadhay par zeen kas kar ghulaamon ko dhoondnay kay liyay jaat men akees kay paas chala gaya. donon ghulaam ab tak vaheen thay to simaee unhen pakad kar yarooshalam vaapas lay aaya.
41sulemaan ko khabar milee ki simaee jaat ja kar laut aaya hai. 42tab us nay usay bula kar poochha, “kya main nay aap ko aagaah karkay naheen kaha tha ki yaqeen jaanen ki joon hee aap yarooshalam say nikalengay aap ko maar diya jaaega, khwaah aap kaheen bhee jaana chaahen. aur kya aap nay javaab men rabb kee qasam kha kar naheen kaha tha, ‘theek hai, main aisa hee karoonga?’ 43lekin ab aap nay apnee qasam tod kar meray hukm kee khilaafvarzee kee hai. yah aap nay kyoon kiya hai?” 44phir baadshaah nay kaha, “aap khoob jaantay hain ki aap nay meray baap daaood kay saath kitna bura sulook kiya. ab rabb aap ko is kee saza dega. 45lekin sulemaan baadshaah ko vah barkat deta rahega, aur daaood ka takht rabb kay huzoor abad tak qaaim rahega.”
46phir baadshaah nay binaayaah bin yahoyada ko hukm diya ki vah simaee ko maar day. binaayaah nay usay baahar lay ja kar talvaar say maar diya. yoon sulemaan kee israaeel par hukoomat mazboot ho gaee.