1 Salaateen 20
shaam kee fauj saamriya ka muhaasara kartee hai
1ek din shaam kay baadshaah bin-hadad nay apnee pooree fauj ko jama kiya. 32 ittihaadee baadshaah bhee apnay rathon aur ghodon ko lay kar aaay. is badee fauj kay saath bin-hadad nay saamriya ka muhaasara karkay israaeel say jang ka elaan kiya. 2us nay apnay qaasidon ko shaher men bhej kar israaeel kay baadshaah akhiyab ko ittila dee, 3“ab say aap ka sona, chaandee, khavaateen aur betay meray hee hain.” 4israaeel kay baadshaah nay javaab diya, “meray aaqa aur baadshaah, aap kee marzee. main aur jo kuchh mera hai aap kee milkiyat hai.”
5thodee der kay baad qaasid bin-hadad kee naee khabar lay kar aaay, “main nay aap say sonay, chaandee, khavaateen aur beton ka taqaaza kiya hai. 6ab ghaur karen! kal is vaqt main apnay mulaazimon ko aap kay paas bhej doonga, aur vah aap kay mahel aur aap kay afsaron kay gharon kee talaashee lengay. jo kuchh bhee aap ko piyaara hai usay vah lay jaaengay.”
7tab akhiyab baadshaah nay mulk kay tamaam buzurgon ko bula kar un say baat kee, “dekhen yah aadmee kitna bura iraada rakhta hai. jab us nay meree khavaateen, beton, sonay aur chaandee ka taqaaza kiya to main nay inkaar na kiya.” 8buzurgon aur baaqee logon nay mil kar mashvra diya, “us kee na sunen, aur jo kuchh vah maangta hai us par raazee na ho jaaen.” 9chunaanchay baadshaah nay qaasidon say kaha, “meray aaqa baadshaah ko javaab dena, jo kuchh aap nay pahelee martaba maang liya vah main aap ko denay kay liyay tayyaar hoon, lekin yah aakhiree taqaaza main poora naheen kar sakta.”
jab qaasidon nay bin-hadad ko yah khabar pahunchaaee 10to us nay akhiyab ko fauran khabar bhej dee, “devta mujhay sakht saza den agar main saamriya ko nest-o-naabood na kar doon. itna bhee naheen rahega ki mera har faujee mutthee bhar khaak apnay saath vaapas lay ja sakay!” 11israaeel kay baadshaah nay qaasidon ko javaab diya, “usay bata dena ki jo abhee jang kee tayyaariyaan kar raha hai vah fatah kay naaray na lagaaay.”
12jab bin-hadad ko yah ittila milee to vah lashkargaah men apnay ittihaadee baadshaahon kay saath mai pee raha tha. us nay apnay afsaron ko hukm diya, “hamla karnay kay liyay tayyaariyaan karo!” chunaanchay vah shaher par hamla karnay kee tayyaariyaan karnay lagay.
shaam kee fauj say pahelee jang
13is dauraan ek nabee akhiyab baadshaah kay paas aaya aur kaha, “rabb farmaata hai, ‘kya tujhay dushman kee yah badee fauj nazar a rahee hai? to bhee main isay aaj hee teray havaalay kar doonga. tab too jaan lega ki main hee rabb hoon’.”
14akhiyab nay savaal kiya, “rabb yah kis kay vaseelay say karega?” nabee nay javaab diya, “rabb farmaata hai ki zilaon par muqarrar afsaron kay javaan yah fatah paaengay.” baadshaah nay mazeed poochha, “ladaaee men kaun pahela qadam uthaaay?” nabee nay kaha, “too hee.”
15chunaanchay akhiyab nay zilaon par muqarrar afsaron kay javaanon ko bulaaya. 232 afraad thay. phir us nay baaqee israaeeliyon ko jama kiya. 7,000 afraad thay. 16-17 dopaher ko vah ladnay kay liyay niklay. zilaon par muqarrar afsaron kay javaan sab say aagay thay. bin-hadad aur 32 ittihaadee baadshaah lashkargaah men baithay nashay men dhut mai pee rahay thay ki achaanak shaher ka jaaiza lenay kay liyay bin-hadad kay bhejay gaay sipaahee andar aaay aur kahenay lagay, “saamriya say aadmee nikal rahay hain.” 18bin-hadad nay hukm diya, “har soorat men unhen zinda pakden, khwaah vah amnapasand iraada rakhtay hon ya na.”
19lekin unhen yah karnay ka mauqa na mila, kyoonki israaeel kay zilaon par muqarrar afsaron aur baaqee faujiyon nay shaher say nikal kar 20fauran un par hamla kar diya. aur jis bhee dushman ka muqaabla hua usay maara gaya. tab shaam kee pooree fauj bhaag gaee. israaeeliyon nay un ka taaqqub kiya, lekin shaam ka baadshaah bin-hadad ghoday par savaar ho kar chand ek ghudasavaaron kay saath bach nikla. 21us vaqt israaeel ka baadshaah jang kay liyay nikla aur ghodon aur rathon ko tabaah karkay araamiyon ko zabardast shikast dee.
shaam kee fauj say doosree jang
22baad men mazkoora nabee dubaara israaeel kay baadshaah kay paas aaya. vah bola, “ab mazboot ho kar baday dhyaan say sochen ki aanay vaalay dinon men kya kya tayyaariyaan karnee chaahien, kyoonki aglay bahaar kay mausam men shaam ka baadshaah dubaara aap par hamla karega.”
23shaam kay baadshaah ko bhee mashvra diya gaya. us kay baday afsaron nay khayaal pesh kiya, “israaeeliyon kay devta pahaadee devta hain, is liyay vah ham par ghaalib a gaay hain. lekin agar ham maidaanee ilaaqay men un say laden to har soorat men jeetengay. 24lekin hamaara ek aur mashvra bhee hai. 32 baadshaahon ko hata kar un kee jagah apnay afsaron ko muqarrar karen. 25phir ek naee fauj tayyaar karen jo tabaahashuda puraanee fauj jaisee taaqatvar ho. us kay utnay hee rath aur ghoday hon jitnay pahelay thay. phir jab ham maidaanee ilaaqay men un say ladengay to un par zaroor ghaalib aaengay.”
baadshaah un kee baat maan kar tayyaariyaan karnay laga. 26jab bahaar ka mausam aaya to vah shaam kay faujiyon ko jama karkay israaeel say ladnay kay liyay afeeq shaher gaya. 27israaeelee fauj bhee ladnay kay liyay jama huee. khaanay-peenay kee ashya ka band-o-bast kiya gaya, aur vah dushman say ladnay kay liyay niklay. jab vahaan pahunchay to unhon nay apnay khaimon ko do jagahon par lagaaya. yah do guroh shaam kee vasee fauj kay muqaablay men bakriyon kay do chhotay revdon jaisay lag rahay thay, kyoonki poora maidaan shaam kay faujiyon say bhara tha.
28phir mard-ay-khuda nay akhiyab kay paas a kar kaha, “rabb farmaata hai, ‘shaam kay log khayaal kartay hain ki rabb pahaadee devta hai is liyay maidaanee ilaaqay men naakaam rahega. chunaanchay main un kee zabardast fauj ko teray havaalay kar doonga. tab too jaan lega ki main hee rabb hoon’.”
29saat din tak donon faujen ek doosray kay muqaabil saf’aara raheen. saatven din ladaaee ka aaghaaz hua. israaeelee is martaba bhee shaam kee fauj par ghaalib aaay. us din unhon nay un kay ek laakh piyaada faujiyon ko maar diya. 30baaqee faraar ho kar afeeq shaher men ghus gaay. taqreeban 27,000 aadmee thay. lekin achaanak shaher kee faseel un par gir gaee, to vah bhee halaak ho gaay.
akhiyab shaam kay baadshaah par rahem karta hai
bin-hadad baadshaah bhee afeeq men faraar hua tha. ab vah kabhee is kamray men, kabhee us men khisak kar chhupnay kee koshish kar raha tha. 31phir us kay afsaron nay usay mashvra diya, “suna hai ki israaeel kay baadshaah narmdil hotay hain. kyoon na ham taat odh kar aur apnee gardanon men rassay daal kar israaeel kay baadshaah kay paas jaaen? shaayad vah aap ko zinda chhod day.”
32chunaanchay bin-hadad kay afsar taat odh kar aur apnee gardanon men rassay daal kar israaeel kay baadshaah kay paas aaay. unhon nay kaha, “aap ka khaadim bin-hadad guzaarish karta hai ki mujhay zinda chhod den.” akhiyab nay savaal kiya, “kya vah ab tak zinda hai? vah to mera bhaaee hai!” 33jab bin-hadad kay afsaron nay jaan liya ki akhiyab ka rujhaan kis taraf hai to unhon nay jaldee say is kee tasdeeq kee, “jee, bin-hadad aap ka bhaaee hai!” akhiyab nay hukm diya, “ja kar usay bula laaen.”
tab bin-hadad nikal aaya, aur akhiyab nay usay apnay rath par savaar honay kee daavat dee. 34bin-hadad nay akhiyab say kaha, “main aap ko vah tamaam shaher vaapas kar deta hoon jo meray baap nay aap kay baap say chheen liyay thay. aap hamaaray daar-ul-hakoomat damishq men tijaartee maraakiz bhee qaaim kar saktay hain, jis tarah meray baap nay pahelay saamriya men kiya tha.” akhiyab bola, “theek hai. is kay badlay men main aap ko riha kar doonga.” unhon nay muaahada kiya, phir akhiyab nay shaam kay baadshaah ko riha kar diya.
nabee akhiyab ko malaamat karta hai
35us vaqt rabb nay nabiyon men say ek ko hidaayat kee, “ja kar apnay saathee ko kah day ki vah tujhay maaray.” nabee nay aisa kiya, lekin saathee nay inkaar kiya. 36phir nabee bola, “choonki aap nay rabb kee naheen sunee, is liyay joon hee aap mujh say chalay jaaengay sherbabar aap ko phaad daalega.” aur aisa hee hua. jab saathee vahaan say nikla to sherbabar nay us par hamla karkay usay phaad daala.
37nabee kee mulaaqaat kisee aur say huee to us nay us say bhee kaha, “meharbaanee karkay mujhay maaren!” us aadmee nay nabee ko maar maar kar zakhmee kar diya. 38tab nabee nay apnee aankhon par pattee baandhee taaki usay pahechaana na jaaay, phir raastay kay kinaaray par akhiyab baadshaah kay intizaar men khada ho gaya.
39jab baadshaah vahaan say guzra to nabee chilla kar us say mukhaatib hua, “janaab, main maidaan-ay-jang men lad raha tha ki achaanak kisee aadmee nay meray paas a kar apnay qaidee ko meray havaalay kar diya. us nay kaha, ‘is kee nigraanee karna. agar yah kisee bhee vajah say bhaag jaaay to aap ko us kee jaan kay ivz apnee jaan denee padegee ya aap ko ek man chaandee ada karnee padegee.’ 40lekin main idhar udhar masroof raha, aur itnay men qaidee ghaaib ho gaya.” akhiyab baadshaah nay javaab diya, “aap nay khud apnay baaray men faisla diya hai. ab aap ko is ka nateeja bhugatna padega.”
41phir nabee nay jaldee say pattee ko apnee aankhon par say utaar diya, aur baadshaah nay pahechaan liya ki yah nabiyon men say ek hai. 42nabee nay kaha, “rabb farmaata hai, ‘main nay muqarrar kiya tha ki bin-hadad ko meray liyay makhsoos karkay halaak karna hai, lekin too nay usay riha kar diya hai. ab us kee jagah too hee marega, aur us kee qaum kee jagah teree qaum ko nuqsaan pahunchega’.”
43israaeel ka baadshaah baday ghussay aur badamizaajee kay aalam men saamriya men apnay mahel men chala gaya.