1 Salaateen 21

eezbil kay haathon nabot ka qatl

¹is kay baad ek aur qaabil-ay-zikr baat huee. yazrael men saamriya kay baadshaah akhiyab ka ek mahel tha. mahel kee zameen kay saath saath angoor ka baagh tha. maalik ka naam nabot tha. ²ek din akhiyab nay nabot say baat kee, “angoor ka aap ka baagh meray mahel kay qareeb hee hai. usay mujhay day den, kyoonki main us men sabziyaan lagaana chaahata hoon. muaavazay men main aap ko us say achchha angoor ka baagh day doonga. lekin agar aap paisay ko tarjeeh den to aap ko us kee pooree raqam ada kar doonga.”

³lekin nabot nay javaab diya, “allaah na karay ki main aap ko vah mauroosee zameen doon jo meray baapdaada nay meray sapurd kee hai!”

⁴akhiyab baday ghussay men apnay ghar vaapas chala gaya. vah bezaar tha ki nabot apnay baapdaada kee mauroosee zameen bechana naheen chaahata. vah palang par let gaya aur apna munh deevaar kee taraf karkay khaana khaanay say inkaar kiya. ⁵us kee beevee eezbil us kay paas aaee aur poochhnay lagee, “kya baat hai? aap kyoon itnay bezaar hain ki khaana bhee naheen khaana chaahatay?” ⁶akhiyab nay javaab diya, “yazrael ka rahenay vaala nabot mujhay angoor ka baagh naheen dena chaahata. go main usay paisay dena chaahata tha balki usay is kee jagah koee aur baagh denay kay liyay tayyaar tha to bhee vah bazid raha.”

⁷eezbil bolee, “kya aap israaeel kay baadshaah hain ki naheen? ab uthen! khaaen, pien aur apna dil bahelaaen. main hee aap ko nabot yazraelee ka angoor ka baagh dila doongee.” ⁸us nay akhiyab kay naam khutoot likh kar un par baadshaah kee muhar lagaaee aur unhen nabot kay shaher kay buzurgon aur shurfa ko bhej diya. ⁹khaton men zail kee khabar likhee thee,

“shaher men elaan karen ki ek din ka roza rakha jaaay. jab log us din jama ho jaaengay to nabot ko logon kay saamnay izzat kee kursee par bitha den. ¹⁰lekin us kay muqaabil do badam’aashon ko bitha dena. ijtima kay dauraan yah aadmee sab kay saamnay nabot par ilzaam lagaaen, ‘is shakhs nay allaah aur baadshaah par laanat bhejee hai! ham is kay gavaah hain.’ phir usay shaher say baahar lay ja kar sangasaar karen.”

¹¹yazrael kay buzurgon aur shurfa nay aisa hee kiya. ¹²unhon nay rozay kay din ka elaan kiya. jab log muqarrara din jama huay to nabot ko logon kay saamnay izzat kee kursee par bitha diya gaya. ¹³phir do badam’aash aaay aur us kay muqaabil baith gaay. ijtima kay dauraan yah aadmee sab kay saamnay nabot par ilzaam lagaanay lagay, “is shakhs nay allaah aur baadshaah par laanat bhejee hai! ham is kay gavaah hain.” tab nabot ko shaher say baahar lay ja kar sangasaar kar diya gaya. ¹⁴phir shaher kay buzurgon nay eezbil ko ittila dee, “nabot mar gaya hai, usay sangasaar kiya gaya hai.”

¹⁵yah khabar miltay hee eezbil nay akhiyab say baat kee, “jaaen, nabot yazraelee kay us baagh par qabza karen jo vah aap ko bechanay say inkaar kar raha tha. ab vah aadmee zinda naheen raha balki mar gaya hai.”

¹⁶yah sun kar akhiyab fauran nabot kay angoor kay baagh par qabza karnay kay liyay ravaana hua.

ilyaas akhiyab ko saza sunaata hai

¹⁷tab rabb ilyaas tishbee say hamkalaam hua, ¹⁸“israaeel kay baadshaah akhiyab jo saamriya men raheta hai say milnay ja. is vaqt vah nabot kay angoor kay baagh men hai, kyoonki vah us par qabza karnay kay liyay vahaan pahuncha hai. ¹⁹usay bata dena, ‘rabb farmaata hai ki too nay ek aadmee ko bilaavajah qatl karkay us kee milkiyat par qabza kar liya hai. rabb farmaata hai ki jahaan kutton nay nabot ka khoon chaata hai vahaan vah tera khoon bhee chaatengay’.”

²⁰jab ilyaas akhiyab kay paas pahuncha to baadshaah bola, “meray dushman, kya aap nay mujhay dhoond nikaala hai?” ilyaas nay javaab diya, “jee, main nay aap ko dhoond nikaala hai, kyoonki aap nay apnay aap ko badee kay haath men bech kar aisa kaam kiya hai jo rabb ko naapsand hai. ²¹ab sunen rabb ka farmaan, ‘main tujhay yoon museebat men daal doonga ki tera naam-o-nishaan tak naheen rahega. main israaeel men say teray khaandaan kay har mard ko mita doonga, khwaah vah baaligh ho ya bachcha. ²²too nay mujhay bada taish dilaaya aur israaeel ko gunaah karnay par uksaaya hai. is liyay mera teray gharaanay kay saath vahee sulook hoga jo main nay yarubiaam bin nabaat aur baasha bin akhiyaah kay saath kiya hai.’ ²³eezbil par bhee rabb kee saza aaegee. rabb farmaata hai, ‘kuttay yazrael kee faseel kay paas eezbil ko kha jaaengay. ²⁴akhiyab kay khaandaan men say jo shaher men marenga unhen kuttay kha jaaengay, aur jo khulay maidaan men marengay unhen parinday chat kar jaaengay’.”

²⁵aur yah haqeeqat hai ki akhiyab jaisa kharaab shakhs koee naheen tha. kyoonki eezbil kay uksaanay par us nay apnay aap ko badee kay haath men bech kar aisa kaam kiya jo rabb ko naapsand tha. ²⁶sab say ghinaunee baat yah thee ki vah buton kay peechhay laga raha, bilkul un amoriyon kee tarah jinhen rabb nay israaeel say nikaal diya tha.

²⁷jab akhiyab nay ilyaas kee yah baaten suneen to us nay apnay kapday phaad kar taat odh liya. roza rakh kar vah ghamgeen haalat men phirta raha. taat us nay sotay vaqt bhee na utaara. ²⁸tab rabb dubaara ilyaas tishbee say hamkalaam hua, ²⁹“kya too nay ghaur kiya hai ki akhiyab nay apnay aap ko meray saamnay kitna past kar diya hai? choonki us nay apnee aajizee ka izhaar kiya hai is liyay main us kay jeetay jee us kay khaandaan ko mazkoora museebat men naheen daaloonga balki us vaqt jab us ka beta takht par baithega.”