1 Salaateen 3
sulemaan rabb say hikmat maangta hai
1sulemaan firaaun kee betee say shaadee karkay misree baadshaah ka daamaad ban gaya. shuroo men us kee beevee shaher kay us hissay men rahetee thee jo ‘daaood ka shaher’ kahelaata tha. kyoonki us vaqt naya mahel, rabb ka ghar aur shaher kee faseel zer-ay-taameer thay.
2un dinon men rabb kay naam ka ghar taameer naheen hua tha, is liyay israaeelee apnee qurbaaniyaan mukhtalif oonchee jagahon par chadhaatay thay. 3sulemaan rabb say piyaar karta tha aur is liyay apnay baap daaood kee tamaam hidaayaat kay mutaabiq zindagee guzaarta tha. lekin vah bhee jaanvaron kee apnee qurbaaniyaan aur bakhoor aisay hee maqaamon par rabb ko pesh karta tha.
4ek din baadshaah jibaoon gaya aur vahaan bhasm honay vaalee 1,000 qurbaaniyaan chadhaaeen, kyoonki us shaher kee oonchee jagah qurbaaniyaan chadhaanay ka sab say ahem markaz thee. 5jab vah vahaan thahera hua tha to rabb khwaab men us par zaahir hua aur farmaaya, “tera dil kya chaahata hai? mujhay bata day to main teree khwaahish pooree karoonga.”
6sulemaan nay javaab diya, “too meray baap daaood par badee meharbaanee kar chuka hai. vajah yah thee ki tera khaadim vafaadaaree, insaaf aur khuloosdilee say teray huzoor chalta raha. teree us par meharbaanee aaj tak jaaree rahee hai, kyoonki too nay us ka beta us kee jagah takhtnasheen kar diya hai. 7ai rabb meray khuda, too nay apnay khaadim ko meray baap daaood kee jagah takht par bitha diya hai. lekin main abhee chhota bachcha hoon jisay apnee zimmaadaariyaan saheeh taur par sambhaalnay ka tajriba naheen hua. 8to bhee teray khaadim ko teree chunee huee qaum kay beech men khada kiya gaya hai, itnee azeem qaum kay darmiyaan ki usay gina naheen ja sakta. 9chunaanchay mujhay sunnay vaala dil ata farma taaki main teree qaum ka insaaf karoon aur saheeh aur ghalat baaton men imtiyaaz kar sakoon. kyoonki kaun teree is azeem qaum ka insaaf kar sakta hai?”
10sulemaan kee yah darakhwaast rabb ko pasand aaee, 11is liyay us nay javaab diya, “main khush hoon ki too nay na umr kee daraazee, na daulat aur na apnay dushmanon kee halaakat balki imtiyaaz karnay kee salaahiyat maangee hai taaki sun kar insaaf kar sakay. 12is liyay main teree darakhwaast pooree karkay tujhay itna daanishmand aur samajhdaar bana doonga ki utna na maazee men koee tha, na mustaqbil men kabhee koee hoga. 13balki tujhay vah kuchh bhee day doonga jo too nay naheen maanga, yaanee daulat aur izzat. teray jeetay jee koee aur baadshaah teray baraabar naheen paaya jaaega. 14agar too meree raahon par chalta rahay aur apnay baap daaood kee tarah meray ahkaam kay mutaabiq zindagee guzaaray to phir main teree umr daraaz karoonga.”
15sulemaan jaag utha to maaloom hua ki main nay khwaab dekha hai. vah yarooshalam ko vaapas chala gaya aur rabb kay ahd kay sandooq kay saamnay khada hua. vahaan us nay bhasm honay vaalee aur salaamatee kee qurbaaniyaan pesh keen, phir badee ziyaafat kee jis men tamaam darbaaree shareek huay.
do kasbiyon kay bachchay kay baaray men sulemaan ka faislaa
16ek din do kasbiyaan baadshaah kay paas aaeen. 17ek baat karnay lagee, “meray aaqa, ham donon ek hee ghar men bastee hain. kuchh der pahelay is kee maujoodgee men ghar men meray bachcha paida hua. 18do din kay baad is kay bhee bacha hua. ham akelee hee theen, hamaaray siva ghar men koee aur naheen tha. 19ek raat ko meree saathee ka bachcha mar gaya. maan nay sotay men karvaten badaltay badaltay apnay bachchay ko daba diya tha. 20raaton raat isay maaloom hua ki beta mar gaya hai. main abhee gaheree neend so rahee thee. yah dekh kar is nay meray bachchay ko uthaaya aur apnay murday betay ko meree god men rakh diya. phir vah meray betay kay saath so gaee. 21subah kay vaqt jab main apnay betay ko doodh pilaanay kay liyay uthee to dekha ki us say jaan nikal gaee hai. lekin jab din mazeed chadha aur main ghaur say usay dekh sakee to kya dekhtee hoon ki yah vah bachcha naheen hai jisay main nay janm diya hai!”
22doosree aurat nay us kee baat kaat kar kaha, “hargiz naheen! yah jhoot hai. mera beta zinda hai aur tera to mar gaya hai.” pahelee aurat cheekh uthee, “kabhee bhee naheen! zinda bachcha mera aur murda bachcha tera hai.” aisee baaten kartay kartay donon baadshaah kay saamnay jhagadtee raheen.
23phir baadshaah bola, “seedhee see baat yah hai ki donon hee daava kartee hain ki zinda bachcha mera hai aur murda bachcha doosree ka hai. 24theek hai, phir meray paas talvaar lay aaen!” us kay paas talvaar laaee gaee. 25tab us nay hukm diya, “zinda bachchay ko baraabar kay do hisson men kaat kar har aurat ko ek ek hissa day den.” 26yah sun kar bachchay kee haqeeqee maan nay jis ka dil apnay betay kay liyay tadapta tha baadshaah say iltimaas kee, “naheen meray aaqa, usay mat maaren! baraah-ay-karam usay isee ko day deejiay.”
lekin doosree aurat bolee, “theek hai, usay kaat den. agar yah mera naheen hoga to kam az kam tera bhee naheen hoga.”
27yah dekh kar baadshaah nay hukm diya, “ruken! bachchay par talvaar mat chalaaen balki usay pahelee aurat ko day den jo chaahatee hai ki zinda rahay. vahee us kee maan hai.” 28jald hee sulemaan kay is faislay kee khabar pooray mulk men phail gaee, aur logon par baadshaah ka khauf chha gaya, kyoonki unhon nay jaan liya ki allaah nay usay insaaf karnay kee khaas hikmat ata kee hai.