1 Samooel 16

naay baadshaah daaood ko muqarrar kiya jaata hai

¹ek din rabb samooel say hamkalaam hua, “too kab tak saaool ka maatam karega? main nay to usay radd karkay baadshaah ka uhda us say lay liya hai. ab mendhay ka seeng zaitoon kay tel say bhar kar bait-lahem chala ja. vahaan ek aadmee say mil jis ka naam yassee hai. kyoonki main nay us kay beton men say ek ko chun liya hai ki vah naya baadshaah ban jaaay.” ²lekin samooel nay etiraaz kiya, “main kis tarah ja sakta hoon? saaool yah sun kar mujhay maar daalega.” rabb nay javaab diya, “ek javaan gaay apnay saath lay kar logon ko bata day ki main isay rabb kay huzoor qurbaan karnay kay liyay aaya hoon. ³yassee ko daavat day ki vah qurbaanee kee ziyaafat men shareek ho jaaay. aagay main tujhay bataaoonga ki kya karna hai. main tujhay dikhaaoonga ki kis betay ko meray liyay masah karkay chun lena hai.”

⁴samooel maan gaya. jab vah bait-lahem pahunch gaya to log chaunk uthay. laraztay laraztay shaher kay buzurg us say milnay aaay aur poochha, “khairiyat to hai ki aap hamaaray paas a gaay hain?” ⁵samooel nay unhen tasallee day kar kaha, “khairiyat hai. main rabb kay huzoor qurbaanee pesh karnay kay liyay aaya hoon. apnay aap ko rabb kay liyay makhsoos-o-muqaddas karen aur phir meray saath qurbaanee kee ziyaafat men shareek ho jaaen.” samooel nay yassee aur us kay beton ko bhee daavat dee aur unhen apnay aap ko makhsoos-o-muqaddas karnay ko kaha.

⁶jab yassee apnay beton samet qurbaanee kee ziyaafat kay liyay aaya to samooel kee nazar iliyaab par padee. us nay socha, “beshak yah vah hai jisay rabb masah karkay baadshaah banaana chaahata hai.” ⁷lekin rabb nay farmaaya, “is kee shakl-o-soorat aur lambay qad say mut’assir na ho, kyoonki yah mujhay naamanzoor hai. main insaan kee nazar say naheen dekhta. kyoonki insaan zaahiree soorat par ghaur karkay faisla karta hai jabki rabb ko har ek ka dil saaf saaf nazar aata hai.”

⁸phir yassee nay apnay doosray betay abeendaab ko bula kar samooel kay saamnay say guzarnay diya. samooel bola, “naheen, rabb nay isay bhee naheen chuna.” ⁹is kay baad yassee nay teesray betay samma ko pesh kiya. lekin yah bhee naheen chuna gaya tha. ¹⁰yoon yassee nay apnay saat beton ko ek ek karkay samooel kay saamnay say guzarnay diya. in men say koee rabb ka chuna hua baadshaah na nikla. ¹¹aakhirkaar samooel nay poochha, “in kay ilaava koee aur beta to naheen hai?” yassee nay javaab diya, “sab say chhota beta abhee baaqee rah gaya hai, lekin vah baahar kheton men bhed-bakriyon kee nigraanee kar raha hai.” samooel nay kaha, “usay fauran bula len. us kay aanay tak ham khaanay kay liyay naheen baithengay.”

¹²chunaanchay yassee chhotay ko bula kar andar lay aaya. yah beta gora tha. us kee aankhen khoobsoorat aur shakl-o-soorat qaabil-ay-taareef thee. rabb nay samooel ko bataaya, “yahee hai. uth kar isay masah kar.” ¹³samooel nay tel say bhara hua mendhay ka seeng lay kar usay daaood kay sar par undel diya. sab bhaaee maujood thay. usee vaqt rabb ka rooh daaood par naazil hua aur us kee saaree umr us par thahera raha. phir samooel raama vaapas chala gaya.

daaood saaool ko badruh say aaraam dilaata hai

¹⁴lekin rabb kay rooh nay saaool ko chhod diya tha. is kay bajaay rabb kee taraf say ek buree rooh usay dahshatzada karnay lagee. ¹⁵ek din saaool kay mulaazimon nay us say kaha, “allaah kee taraf say ek buree rooh aap kay dil men dahshat paida kar rahee hai. ¹⁶hamaara aaqa apnay khaadimon ko hukm day ki vah kisee ko dhoond laaen jo sarod baja sakay. jab bhee allaah kee taraf say yah buree rooh aap par aaay to vah apna saaz baja kar aap ko sukoon dilaaega.”

¹⁷saaool nay javaab diya, “theek hai, aisa hee karo. kisee ko bula laao jo saaz bajaanay men maahir ho.” ¹⁸ek mulaazim bola, “main nay ek aadmee ko dekha hai jo khoob baja sakta hai. vah bait-lahem kay rahenay vaalay yassee ka beta hai. vah na sirf mahaarat say sarod baja sakta hai balki bada jangjoo bhee hai. yah bhee us kee ek khoobee hai ki vah har mauqay par samajhdaaree say baat kar sakta hai. aur vah khoobsoorat bhee hai. rabb us kay saath hai.”

¹⁹saaool nay fauran apnay qaasidon ko yassee kay paas bhej kar usay ittila dee, “apnay betay daaood ko jo bhed-bakriyon ko sambhaalta hai meray paas bhej dena.” ²⁰yah sun kar yassee nay rotee, mai ka mashkeeza aur ek javaan bakree gadhay par laad kar daaood kay havaalay kar dee aur usay saaool kay darbaar men bhej diya.

²¹is tarah daaood saaool kee khidmat men haazir ho gaya. vah baadshaah ko bahut pasand aaya balki saaool ko itna piyaara laga ki usay apna silaahabardaar bana liya. ²²saaool nay yassee ko ittila bhejee, “daaood mujhay bahut pasand aaya hai, is liyay usay mustaqil taur par meree khidmat karnay kee ijaazat den.” ²³aur jab bhee buree rooh saaool par aatee to daaood apna sarod bajaanay lagta. tab saaool ko sukoon milta aur buree rooh us par say door ho jaatee.