1 Samooel 20
daaood aur yoontan ahd baandhtay hain
1ab daaood raama kay nayot say bhee bhaag gaya. chupkay say vah yoontan kay paas aaya aur poochha, “mujh say kya ghaltee huee hai? mera kya qusoor hai? mujh say aap kay baap kay khilaaf kya jurm sarzad hua hai ki vah mujhay qatl karna chaahatay hain?”
2yoontan nay etiraaz kiya, “yah kabhee naheen ho sakta! aap naheen marengay. mera baap to mujhay hamesha sab kuchh bata deta hai, khwaah baat badee ho ya chhotee. to phir vah aisa koee mansooba mujh say kyoon chhupaaay? aap kee yah baat saraasar ghalat hai.”
3lekin daaood nay qasam kha kar israar kiya, “zaahir hai ki aap ko is kay baaray men ilm naheen. aap kay baap ko saaf maaloom hai ki main aap ko pasand hoon. ‘vah to sochtay hongay, yoontan ko is baat ka ilm na ho, varna vah dukh mahsoos karega.’ lekin rabb kee aur aap kee jaan kee qasam, main baday khatray men hoon, aur maut say bachna mushkil hee hai.”
4yoontan nay kaha, “mujhay bataaen ki main kya karoon to main usay karoonga.” 5tab daaood nay apna mansooba pesh kiya. “kal naay chaand kee eed hai, aur baadshaah tavaqqo karengay ki main un kee ziyaafat men shareek hoon. lekin is martaba mujhay parson shaam tak baahar khulay maidaan men chhupa rahenay kee ijaazat den. 6agar aap kay baap mera pata karen to unhen kah dena, ‘daaood nay baday zor say mujh say apnay shaher bait-lahem ko jaanay kee ijaazat maangee. usay badee jaldee thee, kyoonki us ka poora khaandaan apnee saalaana qurbaanee chadhaana chaahata hai.’ 7agar aap kay baap javaab den ki theek hai to phir maaloom hoga ki khatra tal gaya hai. lekin agar vah baday ghussay men a jaaen to yaqeen jaanen ki vah mujhay nuqsaan pahunchaanay ka iraada rakhtay hain. 8baraah-ay-karam mujh par meharbaanee karkay yaad rakhen ki aap nay rabb kay saamnay apnay khaadim say ahd baandha hai. agar main vaaqaee qusoorvaar thaheroon to aap khud mujhay maar daalen. lekin kisee soorat men bhee mujhay apnay baap kay havaalay na karen.”
9yoontan nay javaab diya, “fikr na karen, main kabhee aisa naheen karoonga. jab bhee mujhay ishaara mil jaaay ki mera baap aap ko qatl karnay ka iraada rakhta hai to main zaroor aap ko fauran ittila doonga.” 10daaood nay poochha, “agar aap kay baap ghussay men javaab den to kaun mujhay khabar pahunchaaega?”
11yoontan nay javaab men kaha, “aaen ham nikal kar khulay maidaan men jaaen.” donon nikle 12to yoontan nay daaood say kaha, “rabb israaeel kay khuda kee qasam, parson is vaqt tak main apnay baap say baat maaloom kar loonga. agar vah aap kay baaray men achchhee soch rakhay aur main aap ko ittila na doon 13to rabb mujhay sakht saza day. lekin agar mujhay pata chalay ki mera baap aap ko maar denay par tula hua hai to main aap ko is kee ittila bhee doonga. is soorat men main aap ko naheen rokoonga balki aap ko salaamatee say jaanay doonga. rabb usee tarah aap kay saath ho jis tarah vah pahelay meray baap kay saath tha. 14lekin darakhwaast hai ki meray jeetay jee mujh par rabb kee see meharbaanee karen taaki main mar na jaaoon. 15meray khaandaan par bhee hamesha tak meharbaanee karen. vah kabhee bhee aap kee meharbaanee say maheroom na ho jaaay, us vaqt bhee naheen jab rabb nay aap kay tamaam dushmanon ko roo-ay-zameen par say mita diya hoga.”
16chunaanchay yoontan nay daaood say ahd baandh kar kaha, “rabb daaood kay dushmanon say badla lay.” 17vah bola, “qasam khaaen ki aap yah ahd utnay pukhta iraaday say qaaim rakhengay jitnee aap mujh say muhabbat rakhtay hain.” kyoonki yoontan daaood ko apnee jaan kay baraabar azeez rakhta tha.
18phir yoontan nay apna mansooba pesh kiya. “kal to naay chaand kee eed hai. jaldee say pata chalega ki aap naheen aaay, kyoonki aap kee kursee khaalee rahegee. 19is liyay parson shaam kay vaqt khulay maidaan men vahaan chalay jaaen jahaan pahelay chhup gaay thay. patthar kay dher kay qareeb baith jaaen. 20us vaqt main ghar say nikal kar teen teer patthar kay dher kee taraf chalaaoonga goya men kisee cheez ko nishaana bana kar mashq kar raha hoon. 21phir main ladkay ko teeron ko lay aanay kay liyay bhej doonga. agar main usay bata doon, ‘teer urlee taraf paday hain, unhen ja kar lay aao’ to aap khauf khaaay baghair chhupnay kee jagah say nikal kar meray paas a sakengay. rabb kee hayaat kee qasam, is soorat men koee khatra naheen hoga. 22lekin agar main ladkay ko bata doon, ‘teer parlee taraf paday hain’ to aap ko fauran hijrat karnee padegee. is soorat men rabb khud aap ko yahaan say bhej raha hoga. 23lekin jo baaten ham nay aaj aapas men kee hain rabb khud hamesha tak in ka gavaah rahay.”
saaool kee daaood say alaaniya dushmanee
24chunaanchay daaood khulay maidaan men chhup gaya. naay chaand kee eed aaee to baadshaah ziyaafat kay liyay baith gaya. 25maamool kay mutaabiq vah deevaar kay paas baith gaya. abinair us kay saath baitha tha aur yoontan us kay muqaabil. lekin daaood kee jagah khaalee rahee.
26us din saaool nay baat na chhedee, kyoonki us nay socha, “daaood kisee vajah say naapaak ho gaya hoga, is liyay naheen aaya.”
27lekin aglay din jab daaood kee jagah phir khaalee rahee to saaool nay yoontan say poochha, “yassee ka beta na to kal, na aaj ziyaafat men shareek hua hai. kya vajah hai?” 28yoontan nay javaab diya, “daaood nay baday zor say mujh say bait-lahem jaanay kee ijaazat maangee. 29us nay kaha, ‘meharbaanee karkay mujhay jaanay den, kyoonki mera khaandaan ek khaas qurbaanee chadha raha hai, aur meray bhaaee nay mujhay aanay ka hukm diya hai. agar aap ko manzoor ho to baraah-ay-karam mujhay apnay bhaaiyon kay paas jaanay kee ijaazat den.’ yahee vajah hai ki vah baadshaah kee ziyaafat men shareek naheen hua.”
30yah sun kar saaool aapay say baahar ho gaya. vah garja, “haraamzaaday! mujhay khoob maaloom hai ki too nay daaood ka saath diya hai. sharm kee baat hai, teray liyay aur teree maan kay liyay. 31jab tak yassee ka beta zinda hai tab tak na too aur na teree baadashaahat qaaim rahegee. ab ja, usay lay a, kyoonki usay marna hee hai.”
32yoontan nay kaha, “kyoon? us nay kya kiya jo saza-ay-maut kay laaiq hai?” 33javaab men saaool nay apna neza zor say yoontan kee taraf phaink diya taaki usay maar daalay. yah dekh kar yoontan nay jaan liya ki saaool daaood ko qatl karnay ka pukhta iraada rakhta hai. 34baday ghussay kay aalam men vah khada hua aur chala gaya. us din us nay khaana khaanay say inkaar kiya. usay bahut dukh tha ki mera baap daaood kee itnee beizzatee kar raha hai.
35aglay din yoontan subah kay vaqt ghar say nikal kar khulay maidaan men us jagah a gaya jahaan daaood say milna tha. ek ladka us kay saath tha. 36us nay ladkay ko hukm diya, “chalo, us taraf bhaagna shuroo karo jis taraf main teeron ko chalaaoonga taaki tujhay maaloom ho ki vah kahaan hain.” chunaanchay ladka daudnay laga, aur yoontan nay teer itnay zor say chalaaya ki vah us say aagay kaheen door ja gira. 37jab ladka teer kay qareeb pahunch gaya to yoontan nay aavaaz dee, “teer parlee taraf hai. 38jaldee karo, bhaag kar aagay niklo aur na ruko!” phir ladka teer ko utha kar apnay maalik kay paas vaapas a gaya. 39vah naheen jaanta tha ki is kay peechhay kya maqsad hai. sirf yoontan aur daaood ko ilm tha.
40phir yoontan nay kamaan aur teeron ko ladkay kay sapurd karkay usay hukm diya, “jaao, saamaan lay kar shaher men vaapas chalay jaao.” 41ladka chala gaya to daaood patthar kay dher kay junoob say nikal kar yoontan kay paas aaya. teen martaba vah yoontan kay saamnay munh kay bal jhuk gaya. ek doosray ko choom kar donon khoob roay, khaaskar daaood. 42phir yoontan bola, “salaamatee say jaaen! aur kabhee vah vaaday na bhoolen jo ham nay rabb kee qasam kha kar ek doosray say kiay hain. yah ahd aap kay aur meray aur aap kee aur meree aulaad kay darmiyaan hamesha qaaim rahay. rabb khud hamaara gavaah hai.”
phir daaood ravaana hua, aur yoontan shaher ko vaapas chala gaya.