1 Samooel 25
samooel kee maut
1un dinon men samooel faut hua. tamaam israaeel raama men janaazay kay liyay jama hua. us ka maatam kartay huay unhon nay usay us kee khaandaanee qabr men dafan kiya.
naabaal daaood kee beizzatee karta hai
un dinon men daaood dasht-ay-faaraan men chala gaya.
2-4 maoon men kaalib kay khaandaan ka ek aadmee raheta tha jis ka naam naabaal tha. vah nihaayat ameer tha. karmil kay qareeb us kee 3,000 bheden aur 1,000 bakriyaan theen. beevee ka naam abeejel tha. vah zaheen bhee thee aur khoobsoorat bhee. us kay muqaablay men naabaal sakhtamizaaj aur kameena tha. ek din naabaal apnee bhedon kay baal katarnay kay liyay karmil aaya.
jab daaood ko khabar milee 5to us nay 10 javaanon ko bhej kar kaha, “karmil ja kar naabaal say milen aur usay mera salaam den. 6usay bataana, ‘allaah aap ko taveel zindagee ata karay. aap kee, aap kay khaandaan kee aur aap kee tamaam milkiyat kee salaamatee ho. 7suna hai ki bhedon kay baal katarnay ka vaqt a gaya hai. karmil men aap kay charvaahay hamesha hamaaray saath rahay. us pooray arsay men na unhen hamaaree taraf say koee nuqsaan pahuncha, na koee cheez choree huee. 8apnay logon say khud poochh len! vah is kee tasdeeq karengay. aaj aap khushee mana rahay hain, is liyay meray javaanon par meharbaanee karen. jo kuchh aap khushee say day saktay hain vah unhen aur apnay betay daaood ko day den’.”
9daaood kay aadmee naabaal kay paas gaay. usay daaood ka salaam day kar unhon nay us ka paighaam diya aur phir javaab ka intizaar kiya. 10lekin naabaal nay karakht lahejay men kaha, “yah daaood kaun hai? kaun hai yassee ka beta? aajkal bahut say aisay ghulaam hain jo apnay maalik say bhaagay huay hain. 11main apnee rotee, apna paanee aur katarnay vaalon kay liyay zabah kiya gaya gosht lay kar aisay aavaara phirnay vaalon ko kyoon day doon? kya pata hai ki yah kahaan say aaay hain.”
12daaood kay aadmee chalay gaay aur daaood ko sab kuchh bata diya. 13tab daaood nay hukm diya, “apnee talvaaren baandh lo!” sab nay apnee talvaaren baandh leen. us nay bhee aisa kiya aur phir 400 afraad kay saath karmil kay liyay ravaana hua. baaqee 200 mard saamaan kay paas rahay.
abeejel daaood ka ghussa thanda kartee hai
14itnay men naabaal kay ek naukar nay us kee beevee ko ittila dee, “daaood nay registaan men say apnay qaasidon ko naabaal kay paas bheja taaki usay mubaarakabaad den. lekin us nay javaab men garaj kar unhen gaaliyaan dee hain, 15haalaanki un logon ka hamaaray saath sulook hamesha achchha raha hai. ham aksar revdon ko charaanay kay liyay un kay qareeb phirtay rahay, to bhee unhon nay hamen kabhee nuqsaan na pahunchaaya, na koee cheez choree kee. 16jab bhee ham un kay qareeb thay to vah din raat chaardeevaaree kee tarah hamaaree hifaazat kartay rahay. 17ab soch len ki kya kiya jaaay! kyoonki hamaara maalik aur us kay tamaam ghar vaalay baday khatray men hain. vah khud itna shareer hai ki us say baat karnay ka koee faaida naheen.”
18jitnee jaldee ho saka abeejel nay kuchh saamaan ikattha kiya jis men 200 rotiyaan, mai kee do mashken, khaanay kay liyay tayyaar kee gaee paanch bheden, bhunay huay anaaj kay saadhay 27 kilograam, kishmish kee 100 aur anjeer kee 200 tikkiyaan shaamil theen. sab kuchh gadhon par laad kar 19us nay apnay naukron ko hukm diya, “meray aagay nikal jaao, main tumhaaray peechhay peechhay aaoongee.” apnay shauhar ko us nay kuchh na bataaya. 20jab abeejel pahaad kee aad men utarnay lagee to daaood apnay aadmiyon samet us kee taraf badhtay huay nazar aaya. phir un kee mulaaqaat huee. 21daaood to abhee tak baday ghussay men tha, kyoonki vah soch raha tha, “is aadmee kee madad karnay ka kya faaida tha! ham registaan men us kay revdon kee hifaazat kartay rahay aur us kee koee bhee cheez gum na honay dee. to bhee us nay hamaaree nekee kay javaab men hamaaree beizzatee kee hai. 22allaah mujhay sakht saza day agar main kal subah tak us kay ek aadmee ko bhee zinda chhod doon!”
23-24 daaood ko dekh kar abeejel jaldee say gadhay par say utar kar us kay saamnay munh kay bal jhuk gaee. us nay kaha, “meray aaqa, mujhay hee qusoorvaar thaheraaen. meharbaanee karkay apnee khaadima ko bolnay den aur us kee baat sunen. 25meray maalik us shareer aadmee naabaal par ziyaada dhyaan na den. us kay naam ka matlab ahemaq hai aur vah hai hee ahemaq. afsos, meree un aadmiyon say mulaaqaat naheen huee jo aap nay hamaaray paas bhejay thay. 26lekin rabb kee aur aap kee hayaat kee qasam, rabb nay aap ko apnay haathon say badla lenay aur qaatil bannay say bachaaya hai. aur allaah karay ki jo bhee aap say dushmanee rakhtay aur aap ko nuqsaan pahunchaana chaahatay hain unhen naabaal kee see saza mil jaaay. 27ab guzaarish hai ki jo barkat hamen milee hai us men aap bhee shareek hon. jo cheezen aap kee khaadima laaee hai unhen qabool karkay un javaanon men taqseem kar den jo meray aaqa kay peechhay ho liyay hain. 28jo bhee ghaltee huee hai apnee khaadima ko muaaf keejiay. rabb zaroor meray aaqa ka gharaana hamesha tak qaaim rakhega, kyoonki aap rabb kay dushmanon say ladtay hain. vah aap ko jeetay jee ghaltiyaan karnay say bachaaay rakhay. 29jab koee aap ka taaqqub karkay aap ko maar denay kee koshish karay to rabb aap ka khuda aap kee jaan jaandaaron kee thailee men mahfooz rakhega. lekin aap kay dushmanon kee jaan vah falaakhan kay patthar kee tarah door phaink kar halaak kar dega. 30jab rabb apnay tamaam vaaday pooray karkay aap ko israaeel ka baadshaah bana degaa 31to koee aisee baat saamnay naheen aaegee jo thokar ka baais ho. meray aaqa ka zameer saaf hoga, kyoonki aap badla lay kar qaatil naheen banay hongay. guzaarish hai ki jab rabb aap ko kaamyaabee day to apnee khaadima ko bhee yaad karen.”
32daaood bahut khush hua. “rabb israaeel kay khuda kee taareef ho jis nay aaj aap ko mujh say milnay kay liyay bhej diya. 33aap kee baseerat mubaarak hai! aap mubaarak hain, kyoonki aap nay mujhay is din apnay haathon say badla lay kar qaatil bannay say rok diya hai. 34rabb israaeel kay khuda kee qasam jis nay mujhay aap ko nuqsaan pahunchaanay say rok diya, kal subah naabaal kay tamaam aadmee halaak hotay agar aap itnee jaldee say mujh say milnay na aateen.”
35daaood nay abeejel kee peshakarada cheezen qabool karkay usay rukhsat kiya aur kaha, “salaamatee say jaaen. main nay aap kee sunee aur aap kee baat manzoor kar lee hai.”
rabb naabaal ko saza deta hai
36jab abeejel apnay ghar pahunchee to dekha ki bahut raunaq hai, kyoonki naabaal baadshaah kee see ziyaafat karkay khushiyaan mana raha tha. choonki vah nashay men dhut tha is liyay abeejel nay usay us vaqt kuchh na bataaya.
37aglee subah jab naabaal hosh men a gaya to abeejel nay usay sab kuchh kah sunaaya. yah suntay hee naabaal ko daura pad gaya, aur vah patthar sa ban gaya. 38das din kay baad rabb nay usay marnay diya. 39jab daaood ko naabaal kee maut kee khabar mil gaee to vah pukaara, “rabb kee taareef ho jis nay meray liyay naabaal say lad kar meree beizzatee ka badla liya hai. us kee meharbaanee hai ki main ghalat kaam karnay say bach gaya hoon jabki naabaal kee buraaee us kay apnay sar par a gaee hai.”
abeejel kee daaood say shaadee
kuchh der kay baad daaood nay apnay logon ko abeejel kay paas bheja taaki vah daaood kee us kay saath shaadee kee darakhwaast pesh karen. 40chunaanchay us kay mulaazim karmil men abeejel kay paas ja kar bolay, “daaood nay hamen shaadee ka paighaam day kar bheja hai.” 41abeejel khadee huee, phir munh kay bal jhuk kar bolee, “main un kee khidmat men haazir hoon. main apnay maalik kay khaadimon kay paaon dhonay tak tayyaar hoon.”
42vah jaldee say tayyaar huee aur gadhay par baith kar daaood kay mulaazimon kay saath ravaana huee. paanch naukraaniyaan us kay saath chalee gaeen. yoon abeejel daaood kee beevee ban gaee.
43ab daaood kee do beeviyaan theen, kyoonki pahelay us kee shaadee akheenooam say huee thee jo yazrael say thee. 44jahaan tak saaool kee betee meekal ka taalluq tha saaool nay usay daaood say lay kar us kee dubaara shaadee falteeel bin lais say karvaaee thee jo jalleem ka rahenay vaala tha.