1 Samooel 26
daaood saaool ko doosree baar bachnay deta hai
1ek din dasht-ay-zeef kay kuchh baashinday dubaara jibia men saaool kay paas a gaay. unhon nay baadshaah ko bataaya, “ham jaantay hain ki daaood kahaan chhup gaya hai. vah us pahaadee par hai jo hakeela kahelaatee hai aur yasheemon kay muqaabil hai.” 2yah sun kar saaool israaeel kay 3,000 cheeda faujiyon ko lay kar dasht-ay-zeef men gaya taaki daaood ko dhoond nikaalay. 3hakeela pahaadee par yasheemon kay muqaabil vah ruk gaay. jo raasta pahaad par say guzarta hai us kay paas unhon nay apna kaimp lagaaya. daaood us vaqt registaan men chhup gaya tha. jab usay khabar milee ki saaool mera taaqqub kar raha hai 4to us nay apnay logon ko maaloom karnay kay liyay bheja. unhon nay vaapas a kar usay ittila dee ki baadshaah vaaqaee apnee fauj samet registaan men pahunch gaya hai. 5yah sun kar daaood khud nikal kar chupkay say us jagah gaya jahaan saaool ka kaimp tha. us ko maaloom hua ki saaool aur us ka kamaandar abinair bin nair kaimp kay ain beech men so rahay hain jabki baaqee aadmee daaira bana kar un kay ird-gird so rahay hain.
6do mard daaood kay saath thay, akheemlik hittee aur abeeshai bin zarooyaah. zarooyaah yoaab ka bhaaee tha. daaood nay poochha, “kaun meray saath kaimp men ghus kar saaool kay paas jaaega?” abeeshai nay javaab diya, “main saath jaaoonga.” 7chunaanchay donon raat kay vaqt kaimp men ghus aaay. soay huay faujiyon aur abinair say guzar kar vah saaool tak pahunch gaay jo zameen par leta so raha tha. us ka neza sar kay qareeb zameen men gadha hua tha. 8abeeshai nay aahista say daaood say kaha, “aaj allaah nay aap kay dushman ko aap kay qabzay men kar diya hai. agar ijaazat ho to main usay us kay apnay nezay say zameen kay saath chhed doon. main usay ek hee vaar men maar doonga. doosray vaar kee zaroorat hee naheen hogee.”
9daaood bola, “na karo! usay mat maarna, kyoonki jo rabb kay masah kiay huay khaadim ko haath lagaaay vah qusoorvaar thaherega. 10rabb kee hayaat kee qasam, rabb khud saaool kee maut muqarrar karega, khwaah vah boodha ho kar mar jaaay, khwaah jang men ladtay huay. 11rabb mujhay is say mahfooz rakhay ki main us kay masah kiay huay khaadim ko nuqsaan pahunchaaoon. naheen, ham kuchh aur karengay. us ka neza aur paanee kee suraahee pakad lo. aao, ham yah cheezen apnay saath lay kar yahaan say nikal jaatay hain.” 12chunaanchay vah donon cheezen apnay saath lay kar chupkay say chalay gaay. kaimp men kisee ko bhee pata na chala, koee na jaaga. sab soay rahay, kyoonki rabb nay unhen gaheree neend sula diya tha.
13daaood vaadee ko paar karkay pahaadee par chadh gaya. jab saaool say faasila kaafee thaa 14to daaood nay fauj aur abinair ko oonchee aavaaz say pukaar kar kaha, “ai abinair, kya aap mujhay javaab naheen dengay?” abinair pukaara, “aap kaun hain ki baadshaah ko is tarah kee oonchee aavaaz den?” 15daaood nay tanzan javaab diya, “kya aap mard naheen hain? aur israaeel men kaun aap jaisa hai? to phir aap nay apnay baadshaah kee saheeh hifaazat kyoon na kee jab koee usay qatl karnay kay liyay kaimp men ghus aaya? 16jo aap nay kiya vah theek naheen hai. rabb kee hayaat kee qasam, aap aur aap kay aadmee saza-ay-maut kay laaiq hain, kyoonki aap nay apnay maalik kee hifaazat na kee, go vah rabb ka masah kiya hua baadshaah hai. khud dekh len, jo neza aur paanee kee suraahee baadshaah kay sar kay paas thay vah kahaan hain?”
17tab saaool nay daaood kee aavaaz pahechaan lee. vah pukaara, “meray betay daaood, kya aap kee aavaaz hai?” 18daaood nay javaab diya, “jee, baadshaah salaamat. meray aaqa, aap mera taaqqub kyoon kar rahay hain? main to aap ka khaadim hoon. main nay kya kiya? mujh say kya jurm sarzad hua hai? 19guzaarish hai ki mera aaqa aur baadshaah apnay khaadim kee baat sunay. agar rabb nay aap ko meray khilaaf uksaaya ho to vah meree ghalla kee nazar qabool karay. lekin agar insaan is kay peechhay hain to rabb kay saamnay un par laanat! apnee harkaton say unhon nay mujhay meree mauroosee zameen say nikaal diya hai aur nateejay men main rabb kee qaum men naheen rah sakta. haqeeqat men vah kah rahay hain, ‘jaao, deegar maaboodon kee pooja karo!’ 20aisa na ho ki main vatan say aur rabb kay huzoor say door mar jaaoon. israaeel ka baadshaah pissoo ko dhoond nikaalnay kay liyay kyoon nikal aaya hai? vah to pahaadon men mera shikaar teetar kay shikaar kee tarah kar rahay hain.”
21tab saaool nay iqraar kiya, “main nay gunaah kiya hai. daaood meray betay, vaapas aaen. ab say main aap ko nuqsaan pahunchaanay kee koshish naheen karoonga, kyoonki aaj meree jaan aap kee nazar men qeemtee thee. main badee bevuqoofee kar gaya hoon, aur mujh say badee ghaltee huee hai.”
22daaood nay javaab men kaha, “baadshaah ka neza yahaan meray paas hai. aap ka koee javaan a kar usay lay jaaay. 23rabb har us shakhs ko ajr deta hai jo insaaf karta aur vafaadaar raheta hai. aaj rabb nay aap ko meray havaalay kar diya, lekin main nay us kay masah kiay huay baadshaah ko haath lagaanay say inkaar kiya. 24aur meree dua hai ki jitnee qeemtee aap kee jaan aaj meree nazar men thee, utnee qeemtee meree jaan bhee rabb kee nazar men ho. vahee mujhay har museebat say bachaaay rakhay.” 25saaool nay javaab diya, “meray betay daaood, rabb aap ko barkat day. aainda aap ko badee kaamyaabee haasil hogee.”
is kay baad daaood nay apnee raah lee aur saaool apnay ghar chala gaya.