2 Tavaareekh 6

¹yah dekh kar sulemaan nay dua kee, “rabb nay farmaaya hai ki main ghanay baadal kay andheray men rahoonga. ²main nay teray liyay azeem sukoonatgaah banaaee hai, ek maqaam jo teree abdee sukoonat kay laaiq hai.”

rabb kay ghar kee makhsoosiyat par sulemaan kee taqreer

³phir baadshaah nay mud kar rabb kay ghar kay saamnay khadee israaeel kee pooree jamaaat kee taraf rukh kiya. us nay unhen barkat day kar kaha,

⁴“rabb israaeel kay khuda kee taareef ho jis nay vah vaada poora kiya hai jo us nay meray baap daaood say kiya tha. kyoonki us nay farmaaya, ⁵‘jis din main apnee qaum ko misr say nikaal laaya us din say lay kar aaj tak main nay na kabhee farmaaya ki israaeelee qabeelon kay kisee shaher men meray naam kee taazeem men ghar banaaya jaaay, na kisee ko meree qaum israaeel par hukoomat karnay kay liyay muqarrar kiya. ⁶lekin ab main nay yarooshalam ko apnay naam kee sukoonatgaah aur daaood ko apnee qaum israaeel ka baadshaah banaaya hai.’

⁷meray baap daaood kee badee khwaahish thee ki rabb israaeel kay khuda kay naam kee taazeem men ghar banaaay. ⁸lekin rabb nay etiraaz kiya, ‘main khush hoon ki too meray naam kee taazeem men ghar taameer karna chaahata hai, ⁹lekin too naheen balki tera beta hee usay banaaega.’

¹⁰aur vaaqaee, rabb nay apna vaada poora kiya hai. main rabb kay vaaday kay ain mutaabiq apnay baap daaood kee jagah israaeel ka baadshaah ban kar takht par baith gaya hoon. aur ab main nay rabb israaeel kay khuda kay naam kee taazeem men ghar bhee banaaya hai. ¹¹us men main nay vah sandooq rakh diya hai jis men shareeat kee takhtiyaan padee hain, us ahd kee takhtiyaan jo rabb nay israaeeliyon say baandha tha.”

rabb kay ghar kee makhsoosiyat par sulemaan kee duaa

¹²phir sulemaan nay israaeel kee pooree jamaaat kay dekhtay dekhtay rabb kee qurbaangaah kay saamnay khaday ho kar apnay haath aasmaan kee taraf uthaaay. ¹³us nay is mauqay kay liyay peetal ka ek chabootra banva kar usay bairoonee sahen kay beech men rakhva diya tha. chabootra saadhay 7 fut lamb, saadhay 7 fut chauda aur saadhay 4 fut ooncha tha. ab sulemaan us par chadh kar pooree jamaaat kay dekhtay dekhtay jhuk gaya. apnay haathon ko aasmaan kee taraf utha kar ¹⁴us nay dua kee,

“ai rabb israaeel kay khuda, tujh jaisa koee khuda naheen hai, na aasmaan aur na zameen par. too apna vah ahd qaaim rakhta hai jisay too nay apnee qaum kay saath baandha hai aur apnee meharbaanee un sab par zaahir karta hai jo pooray dil say teree raah par chaltay hain. ¹⁵too nay apnay khaadim daaood say kiya hua vaada poora kiya hai. jo baat too nay apnay munh say meray baap say kee vah too nay apnay haath say aaj hee pooree kee hai. ¹⁶ai rabb israaeel kay khuda, ab apnee doosree baat bhee pooree kar jo too nay apnay khaadim daaood say kee thee. kyoonki too nay meray baap say vaada kiya tha, ‘agar teree aulaad teree tarah apnay chaal-chalan par dhyaan day kar meree shareeat kay mutaabiq meray huzoor chaltee rahay to israaeel par us kee hukoomat hamesha tak qaaim rahegee.’ ¹⁷ai rabb israaeel kay khuda, ab baraah-ay-karam apna yah vaada poora kar jo too nay apnay khaadim daaood say kiya hai.

¹⁸lekin kya allaah vaaqaee zameen par insaan kay darmiyaan sukoonat karega? naheen, too to bulandtareen aasmaan men bhee sama naheen sakta! to phir yah makaan jo main nay banaaya hai kis tarah teree sukoonatgaah ban sakta hai? ¹⁹ai rabb meray khuda, to bhee apnay khaadim kee dua aur iltija sun jab main teray huzoor pukaartay huay iltimaas karta hoon ²⁰ki baraah-ay-karam din raat is imaarat kee nigraanee kar! kyoonki yah vah jagah hai jis kay baaray men too nay khud farmaaya, ‘yahaan mera naam sukoonat karega.’ chunaanchay apnay khaadim kee guzaarish sun jo main is maqaam kee taraf rukh kiay huay karta hoon. ²¹jab ham is maqaam kee taraf rukh karkay dua karen to apnay khaadim aur apnee qaum kee iltijaaen sun. aasmaan par apnay takht say hamaaree sun. aur jab sunega to hamaaray gunaahon ko muaaf kar!

²²agar kisee par ilzaam lagaaya jaaay aur usay yahaan teree qurbaangaah kay saamnay laaya jaaay taaki halaf utha kar vaada karay ki main bequsoor hoon ²³to baraah-ay-karam aasmaan par say sun kar apnay khaadimon ka insaaf kar. qusoorvaar ko saza day kar us kay apnay sar par vah kuchh aanay day jo us say sarzad hua hai, aur bequsoor ko beilzaam qaraar day kar us kee raastbaazee ka badla day.

²⁴ho sakta hai kisee vaqt teree qaum israaeel tera gunaah karay aur nateejay men dushman kay saamnay shikast khaaay. agar israaeelee aakhirkaar teray paas laut aaen aur teray naam kee tamjeed karkay yahaan is ghar men teray huzoor dua aur iltimaas karen ²⁵to aasmaan par say un kee faryaad sun lena. apnee qaum israaeel ka gunaah muaaf karkay unhen dubaara us mulk men vaapas laana jo too nay unhen aur un kay baapdaada ko day diya tha.

²⁶ho sakta hai israaeelee tera itna sangeen gunaah karen ki kaal paday aur badee der tak baarish na barsay. agar vah aakhirkaar is ghar kee taraf rukh karkay teray naam kee tamjeed karen aur teree saza kay baais apna gunaah chhod kar laut aaen ²⁷to aasmaan par say un kee faryaad sun lena. apnay khaadimon aur apnee qaum israaeel ko muaaf kar, kyoonki too hee unhen achchhee raah kee taaleem deta hai. tab us mulk par dubaara baarish barsa day jo too nay apnee qaum ko meeraas men day diya hai.

²⁸ho sakta hai israaeel men kaal pad jaaay, anaaj kee fasal kisee beemaaree, phaphoondee, tiddiyon ya keedon say mut’assir ho jaaay, ya dushman kisee shaher ka muhaasara karay. jo bhee museebat ya beemaaree ho, ²⁹agar koee israaeelee ya teree pooree qaum us ka sabab jaan kar apnay haathon ko is ghar kee taraf badhaaay aur tujh say iltimaas kare ³⁰to aasmaan par apnay takht say un kee faryaad sun lena. unhen muaaf karkay har ek ko us kee tamaam harkaton ka badla day, kyoonki sirf too hee har insaan kay dil ko jaanta hai. ³¹phir jitnee der vah us mulk men zindagee guzaarengay jo too nay hamaaray baapdaada ko diya tha utnee der vah tera khauf maan kar teree raahon par chaltay rahengay.

³²aainda pardesee bhee teray azeem naam, teree badee qudrat aur teray zabardast kaamon kay sabab say aaengay aur is ghar kee taraf rukh karkay dua karengay. agarchi vah teree qaum israaeel kay naheen honge ³³to bhee aasmaan par say un kee faryaad sun lena. jo bhee darakhwaast vah pesh karen vah pooree karna taaki duniya kee tamaam aqvaam tera naam jaan kar teree qaum israaeel kee tarah hee tera khauf maanen aur jaan len ki jo imaarat main nay taameer kee hai us par teray hee naam ka thappa laga hai.

³⁴ho sakta hai teree qaum kay mard teree hidaayat kay mutaabiq apnay dushman say ladnay kay liyay niklen. agar vah teray chunay huay shaher aur us imaarat kee taraf rukh karkay dua karen jo main nay teray naam kay liyay taameer kee hai ³⁵to aasmaan par say un kee dua aur iltimaas sun kar un kay haq men insaaf qaaim rakhna.

³⁶ho sakta hai vah tera gunaah karen, aisee harkaten to ham sab say sarzad hotee rahetee hain, aur nateejay men too naaraaz ho kar unhen dushman kay havaalay kar day jo unhen qaid karkay kisee doordaraaz ya qareebee mulk men lay jaaay. ³⁷shaayad vah jilaavatanee men tauba karkay dubaara teree taraf rujoo karen aur tujh say iltimaas karen, ‘ham nay gunaah kiya hai, ham say ghaltee huee hai, ham nay bedeen harkaten kee hain.’

³⁸agar vah aisa karkay apnee qaid kay mulk men apnay pooray dil-o-jaan say dubaara teree taraf rujoo karen aur teree taraf say baapdaada ko diay gaay mulk, teray chunay huay shaher aur us imaarat kee taraf rukh karkay dua karen jo main nay teray naam kay liyay taameer kee hai ³⁹to aasmaan par apnay takht say un kee dua aur iltimaas sun lena. un kay haq men insaaf qaaim karna, aur apnee qaum kay gunaahon ko muaaf kar dena. ⁴⁰ai meray khuda, teree aankhen aur teray kaan un duaaon kay liyay khulay rahen jo is jagah par kee jaatee hain.

⁴¹ai rabb khuda, uth kar apnee aaraamgaah kay paas a, too aur ahd ka sandooq jo teree qudrat ka izhaar hai. ai rabb khuda, teray imaam najaat say mulabbas ho jaaen, aur teray eemaandaar teree bhalaaee kee khushee manaaen. ⁴²ai rabb khuda, apnay masah kiay huay khaadim ko radd na kar balki us shafqat ko yaad kar jo too nay apnay khaadim daaood par kee hai.”