2 Tavaareekh 9

saba kee malika sulemaan say miltee hai

¹sulemaan kee shuharat saba kee malika tak pahunch gaee. jab us nay us kay baaray men suna to vah sulemaan say milnay kay liyay ravaana huee taaki usay mushkil paheliyaan pesh karkay us kee daanishmandee jaanch lay. vah nihaayat baday qaafilay kay saath yarooshalam pahunchee jis kay oont balsaan, kasrat kay sonay aur qeemtee javaahir say laday huay thay.

malika kee sulemaan say mulaaqaat huee to us nay us say vah tamaam mushkil savaalaat poochhay jo us kay zahen men thay. ²sulemaan us kay har savaal ka javaab day saka. koee bhee baat itnee pecheeda naheen thee ki vah us ka matlab malika ko bata na sakta. ³saba kee malika sulemaan kee hikmat aur us kay naay mahel say bahut mut’assir huee. ⁴us nay baadshaah kee mezon par kay mukhtalif khaanay dekhay aur yah ki us kay afsar kis tarteeb say us par bithaaay jaatay thay. us nay bairon kee khidmat, un kee shaandaar vardiyon aur saaqiyon kee shaandaar vardiyon par bhee ghaur kiya. jab us nay in baaton kay ilaava bhasm honay vaalee vah qurbaaniyaan bhee dekheen jo sulemaan rabb kay ghar men chadhaata tha to malika hakka-bakka rah gaee.

⁵vah bol uthee, “vaaqaee, jo kuchh main nay apnay mulk men aap kay shaahakaaron aur hikmat kay baaray men suna tha vah durust hai. ⁶jab tak main nay khud a kar yah sab kuchh apnee aankhon say na dekha mujhay yaqeen naheen aata tha. lekin haqeeqat men mujhay aap kee zabardast hikmat kay baaray men aadha bhee naheen bataaya gaya tha. vah un riporton say kaheen ziyaada hai jo mujh tak pahunchee theen. ⁷aap kay log kitnay mubaarak hain! aap kay afsar kitnay mubaarak hain jo musalsal aap kay saamnay khaday rahetay aur aap kee daanish bharee baaten suntay hain! ⁸rabb aap kay khuda kee tamjeed ho jis nay aap ko pasand karkay apnay takht par bithaaya taaki rabb apnay khuda kee khaatir hukoomat karen. aap ka khuda israaeel say muhabbat rakhta hai, aur vah usay abad tak qaaim rakhna chaahata hai, isee liyay us nay aap ko un ka baadshaah bana diya hai taaki insaaf aur raastbaazee qaaim rakhen.”

⁹phir malika nay sulemaan ko taqreeban 4,000 kilograam sona, bahut ziyaada balsaan aur javaahir day diay. pahelay kabhee bhee utna balsaan israaeel men naheen laaya gaya tha jitna us vaqt saba kee malika laaee.

¹⁰heeraam aur sulemaan kay aadmee ofeer say na sirf sona laaay balki unhon nay qeemtee lakdee aur javaahir bhee israaeel tak pahunchaaay. ¹¹jitnee qeemtee lakdee un dinon men yahoodaah men dar’aamad huee utnee pahelay kabhee vahaan laaee naheen gaee thee. is lakdee say baadshaah nay rabb kay ghar aur apnay mahel kay liyay seedhiyaan banvaaeen. yah mooseeqaaron kay sarod aur sitaar banaanay kay liyay bhee istemaal huee.

¹²sulemaan baadshaah nay apnee taraf say saba kee malika ko bahut say tuhfay diay. yah un cheezon say ziyaada thay jo malika apnay mulk say us kay paas laaee thee. jo bhee malika chaahatee thee ya us nay maanga vah usay diya gaya. phir vah apnay naukar-chaakron aur afsaron kay hamraah apnay vatan vaapas chalee gaee.

sulemaan kee daulat aur shuharat

¹³jo sona sulemaan ko saalaana milta tha us ka vazan taqreeban 23,000 kilograam tha. ¹⁴is men vah taiks shaamil naheen thay jo usay saudaagaron, taajiron, arab baadshaahon aur zilaon kay afsaron say miltay thay. yah usay sona aur chaandee detay thay.

^15-16 sulemaan baadshaah nay 200 badee aur 300 chhotee dhaalen banvaaeen. un par sona mandha gaya. har badee dhaal kay liyay taqreeban 7 kilograam sona istemaal hua aur har chhotee dhaal kay liyay saadhay 3 kilograam. sulemaan nay unhen ‘lubnaan ka jangal’ naamee mahel men mahfooz rakha.

¹⁷in kay ilaava baadshaah nay haatheedaant say aaraasta ek bada takht banvaaya jis par khaalis sona chadhaaya gaya. ^18-19 us kay har baazoo kay saath sherbabar ka mujassma tha. takht kuchh ooncha tha, aur baadshaah chhah paaay vaalee seedhee par chadh kar us par baithta tha. daaeen aur baaeen taraf har paaay par sherbabar ka mujassma tha. paaon kay liyay sonay kee chaukee banaaee gaee thee. is qism ka takht kisee aur saltanat men naheen paaya jaata tha.

²⁰sulemaan kay tamaam piyaalay sonay kay thay, balki ‘lubnaan ka jangal’ naamee mahel men tamaam bartan khaalis sonay kay thay. koee bhee cheez chaandee kee naheen thee, kyoonki sulemaan kay zamaanay men chaandee kee koee qadar naheen thee. ²¹baadshaah kay apnay baheree jahaaz thay jo heeraam kay bandon kay saath mil kar mukhtalif jagahon par jaatay thay. har teen saal kay baad vah sonay-chaandee, haatheedaant, bandaron aur moron say laday huay vaapas aatay thay.

²²sulemaan kee daulat aur hikmat duniya kay tamaam baadshaahon say kaheen ziyaada thee. ²³duniya kay tamaam baadshaah us say milnay kee koshish kartay rahay taaki vah hikmat sun len jo allaah nay us kay dil men daal dee thee. ²⁴saal-ba-saal jo bhee sulemaan kay darbaar men aata vah koee na koee tuhfa laata. yoon usay sonay-chaandee kay bartan, qeemtee libaas, hathiyaar, balsaan, ghoday aur khachchar miltay rahay.

²⁵ghodon aur rathon ko rakhnay kay liyay sulemaan kay 4,000 thaan thay. us kay 12,000 ghoday thay. kuchh us nay rathon kay liyay makhsoos kiay gaay shaheron men aur kuchh yarooshalam men apnay paas rakhay. ²⁶sulemaan un tamaam baadshaahon ka hukmaraan tha jo darya-ay-furaat say lay kar filistiyon kay mulk kee misree sarhadd tak hukoomat kartay thay. ²⁷baadshaah kee sargarmiyon kay baais chaandee patthar jaisee aam ho gaee aur deodaar kee qeemtee lakdee maghrib kay nishebee pahaadee ilaaqay kee anjeer-toot kee sastee lakdee jaisee aam ho gaee. ²⁸baadshaah kay ghoday misr aur deegar kaee mulkon say dar’aamad hotay thay.

sulemaan kee maut

²⁹sulemaan kee zindagee kay baaray men mazeed baaten shuroo say lay kar aakhir tak ‘naatan nabee kee taareekh,’ saila kay rahenay vaalay nabee akhiyaah kee kitaab ‘akhiyaah kee nubuvvat’ aur yarubiaam bin nabaat say mutaalliq kitaab ‘iddoo ghaibbeen kee royaaen’ men darj hain.

³⁰sulemaan 40 saal kay dauraan pooray israaeel par hukoomat karta raha. us ka daar-ul-hakoomat yarooshalam tha. ³¹jab vah mar kar apnay baapdaada say ja mila to usay yarooshalam kay us hissay men dafan kiya gaya jo ‘daaood ka shaher’ kahelaata hai. phir us ka beta rahubiaam takhtnasheen hua.