2 Salaateen 18

yahoodaah ka baadshaah hizaqiyaah

¹israaeel kay baadshaah hosea bin aila kee hukoomat kay teesray saal men hizaqiyaah bin aakhaz yahoodaah ka baadshaah bana. ²us vaqt us kee umr 25 saal thee, aur vah yarooshalam men rah kar 29 saal hukoomat karta raha. us kee maan abee bint zakariyaah thee. ³apnay baap daaood kee tarah us nay aisa kaam kiya jo rabb ko pasand tha. ⁴us nay oonchee jagahon kay mandiron ko gira diya, patthar kay un satoonon ko tukday tukday kar diya jin kee pooja kee jaatee thee aur yaseerat devee kay khambon ko kaat daala. peetal ka jo saamp moosa nay banaaya tha usay bhee baadshaah nay tukday tukday kar diya, kyoonki israaeelee un ayyaam tak us kay saamnay bakhoor jalaanay aatay thay. (saamp nakhushtaan kahelaata tha.)

⁵hizaqiyaah rabb israaeel kay khuda par bharosa rakhta tha. yahoodaah men na is say pahelay aur na is kay baad aisa baadshaah hua. ⁶vah rabb kay saath lipta raha aur us kee pairvee karnay say kabhee bhee baaz na aaya. vah un ahkaam par amal karta raha jo rabb nay moosa ko diay thay. ⁷is liyay rabb us kay saath raha. jab bhee vah kisee maqsad kay liyay nikla to usay kaamyaabee haasil huee.

chunaanchay vah asoor kee hukoomat say aazaad ho gaya aur us kay taabay na raha. ⁸filistiyon ko us nay sab say chhotee chaukee say lay kar baday say baday qil’aaband shaher tak shikast dee aur unhen maartay maartay ghazza shaher aur us kay ilaaqay tak pahunch gaya.

asooree israaeel par qabza kartay hain

⁹hizaqiyaah kee hukoomat kay chauthay saal men aur israaeel kay baadshaah hosea kee hukoomat kay saatven saal men asoor kay baadshaah salmanasar nay israaeel par hamla kiya. saamriya shaher ka muhaasara karke ¹⁰vah teen saal kay baad us par qabza karnay men kaamyaab hua. yah hizaqiyaah kee hukoomat kay chhatay saal aur israaeel kay baadshaah hosea kee hukoomat kay navven saal men hua. ¹¹asoor kay baadshaah nay israaeeliyon ko jilaavatan karkay kuchh khalah kay ilaaqay men, kuchh jauzaan kay darya-ay-khaaboor kay kinaaray par aur kuchh maadiyon kay shaheron men basaaay.

¹²yah sab kuchh is liyay hua ki vah rabb apnay khuda kay taabay na rahay balki us kay un kay saath bandhay huay ahd ko tod kar un tamaam ahkaam kay faramaambardaar na rahay jo rabb kay khaadim moosa nay unhen diay thay. na vah un kee suntay aur na un par amal kartay thay.

asooree yarooshalam ka muhaasara kartay hain

¹³hizaqiyaah baadshaah kee hukoomat kay 14ven saal men asoor kay baadshaah sanherib nay yahoodaah kay tamaam qil’aaband shaheron par dhaava bol kar un par qabza kar liya. ¹⁴jab asoor ka baadshaah lakees kay aas-paas pahuncha to yahoodaah kay baadshaah hizaqiyaah nay usay ittila dee, “mujh say ghaltee huee hai. mujhay chhod den to jo kuchh bhee aap mujh say talab karengay main aap ko ada karoonga.”

tab sanherib nay hizaqiyaah say chaandee kay taqreeban 10,000 kilograam aur sonay kay taqreeban 1,000 kilograam maang liya. ¹⁵hizaqiyaah nay usay vah tamaam chaandee day dee jo rabb kay ghar aur shaahee mahel kay khazaanon men padee thee. ¹⁶sonay ka taqaaza poora karnay kay liyay us nay rabb kay ghar kay darvaazon aur chaukhton par laga sona utarva kar usay asoor kay baadshaah ko bhej diya. yah sona us nay khud darvaazon aur chaukhton par chadhvaaya tha.

¹⁷phir bhee asoor ka baadshaah mutmain na hua. us nay apnay sab say aala afsaron ko badee fauj kay saath lakees say yarooshalam ko bheja (un kee apnee zabaan men afsaron kay uhdon kay naam tartaan, rab-saaris aur rabshaaqee thay). yarooshalam pahunch kar vah us naalay kay paas ruk gaay jo paanee ko oopar vaalay taalaab tak pahunchaata hai (yah taalaab us raastay par hai jo dhobiyon kay ghaat tak lay jaata hai). ¹⁸in teen asooree afsaron nay ittila dee ki baadshaah ham say milnay aaay, lekin hizaqiyaah nay mahel kay inchaarj iliyaaqeem bin khilaqiyaah, meeramunshee shabnaah aur musheer-ay-khaas yooaakh bin aasaf ko un kay paas bheja. ¹⁹rabshaaqee nay un kay haath hizaqiyaah ko paighaam bheja,

“asoor kay azeem baadshaah farmaatay hain, tumhaara bharosa kis cheez par hai? ²⁰tum samajhtay ho ki khaalee baaten karna faujee hikmat-ay-amlee aur taaqat kay baraabar hai. yah kaisee baat hai? tum kis par etimaad kar rahay ho ki mujh say sarkash ho gaay ho? ²¹kya tum misr par bharosa kartay ho? vah to toota hua sarkanda hee hai. jo bhee us par tek lagaaay us ka haath vah cheer kar zakhmee kar dega. yahee kuchh un sab kay saath ho jaaega jo misr kay baadshaah firaaun par bharosa karen! ²²shaayad tum kaho, ‘ham rabb apnay khuda par tavakkul kartay hain.’ lekin yah kis tarah ho sakta hai? hizaqiyaah nay to us kee behuramtee kee hai. kyoonki us nay oonchee jagahon kay mandiron aur qurbaanagaahon ko dha kar yahoodaah aur yarooshalam say kaha hai ki sirf yarooshalam kee qurbaangaah kay saamnay parastish karen.

²³aao, meray aaqa asoor kay baadshaah say sauda karo. main tumhen 2,000 ghoday doonga basharteeki tum un kay liyay savaar muhayya kar sako. lekin afsos, tumhaaray paas itnay ghudsavaar hain hee naheen! ²⁴tum meray aaqa asoor kay baadshaah kay sab say chhotay afsar ka bhee muqaabla naheen kar saktay. lihaaza misr kay rathon par bharosa rakhnay ka kya faaida? ²⁵shaayad tum samajhtay ho ki main rabb kee marzee kay baghair hee is jagah par hamla karnay aaya hoon taaki sab kuchh barbaad karoon. lekin aisa hargiz naheen hai! rabb nay khud mujhay kaha ki is mulk par dhaava bol kar isay tabaah kar day.”

²⁶yah sun kar iliyaaqeem bin khilaqiyaah, shabnaah aur yooaakh nay rabshaaqee kee taqreer men dakhal day kar kaha, “baraah-ay-karam araamee zabaan men apnay khaadimon kay saath guftagu keejiay, kyoonki ham yah achchhee tarah bol letay hain. ibraanee zabaan istemaal na karen, varna shaher kee faseel par khaday log aap kee baaten sun lengay.” ²⁷lekin rabshaaqee nay javaab diya, “kya tum samajhtay ho ki meray maalik nay yah paighaam sirf tumhen aur tumhaaray maalik ko bheja hai? hargiz naheen! vah chaahatay hain ki tamaam log yah baaten sun len. kyoonki vah bhee tumhaaree tarah apna fuzla khaanay aur apna peshaab peenay par majboor ho jaaengay.”

²⁸phir vah faseel kee taraf mud kar buland aavaaz say ibraanee zabaan men avaam say mukhaatib hua, “suno, shahenshaah, asoor kay baadshaah kay farmaan par dhyaan do! ²⁹baadshaah farmaatay hain ki hizaqiyaah tumhen dhoka na day. vah tumhen meray haath say bacha naheen sakta. ³⁰beshak vah tumhen tasallee dilaanay kee koshish karkay kaheta hai, ‘rabb hamen zaroor chhutkaara dega, yah shaher kabhee bhee asooree baadshaah kay qabzay men naheen aaega.’ lekin is qism kee baaton say tasallee pa kar rabb par bharosa mat karna. ³¹hizaqiyaah kee baaten na maano balki asoor kay baadshaah kee. kyoonki vah farmaatay hain, meray saath sulah karo aur shaher say nikal kar meray paas a jaao. phir tum men say har ek angoor kee apnee bel aur anjeer kay apnay darakht ka phal khaaega aur apnay hauz ka paanee piega. ³²phir kuchh der kay baad main tumhen ek aisay mulk men lay jaaoonga jo tumhaaray apnay mulk kee maanind hoga. us men bhee anaaj, naee mai, rotee aur angoor kay baagh, zaitoon kay darakht aur shahed hai. gharaz, maut kee raah ikhtiyaar na karna balki zindagee kee raah. hizaqiyaah kee mat sunna. jab vah kaheta hai, ‘rabb hamen bachaaega’ to vah tumhen dhoka day raha hai. ³³kya deegar aqvaam kay devta apnay mulkon ko shaah-ay-asoor say bachaanay kay qaabil rahay hain? ³⁴hamaat aur arfaad kay devta kahaan rah gaay hain? sifarvaaim, hena aur ivva kay devta kya kar sakay? aur kya kisee devta nay saamriya ko meree girift say bachaaya? ³⁵naheen, koee bhee devta apna mulk mujh say bacha na saka. to phir rabb yarooshalam ko kis tarah mujh say bachaaega?”

³⁶faseel par khaday log khaamosh rahay. unhon nay koee javaab na diya, kyoonki baadshaah nay hukm diya tha ki javaab men ek lafz bhee na kahen. ³⁷phir mahel ka inchaarj iliyaaqeem bin khilaqiyaah, meeramunshee shabnaah aur musheer-ay-khaas yooaakh bin aasaf ranjish kay maaray apnay libaas phaad kar hizaqiyaah kay paas vaapas gaay. darbaar men pahunch kar unhon nay baadshaah ko sab kuchh kah sunaaya jo rabshaaqee nay unhen kaha tha.