2 Salaateen 4
ileesha aur beva ka tel
1ek din ek beva ileesha kay paas aaee jis ka shauhar jab zinda tha nabiyon kay guroh men shaamil tha. beva cheekhtee chillaatee ileesha say mukhaatib huee, “aap jaantay hain ki mera shauhar jo aap kee khidmat karta tha allaah ka khauf maanta tha. ab jab vah faut ho gaya hai to us ka ek saahookaar a kar dhamkee day raha hai ki agar qarz ada na kiya gaya to main teray do beton ko ghulaam bana kar lay jaaoonga.”
2ileesha nay poochha, “main kis tarah aap kee madad karoon? bataaen, ghar men aap kay paas kya hai?” beva nay javaab diya, “kuchh naheen, sirf zaitoon kay tel ka chhota sa bartan.” 3ileesha bola, “jaaen, apnee tamaam padosanon say khaalee bartan maangen. lekin dhyaan rakhen ki thoday bartan na hon! 4phir apnay beton kay saath ghar men ja kar darvaazay par kundee lagaaen. tel ka apna bartan lay kar tamaam khaalee bartanon men tel undelatee jaaen. jab ek bhar jaaay to usay ek taraf rakh kar doosray ko bharna shuroo karen.”
5beva nay ja kar aisa hee kiya. vah apnay beton kay saath ghar men gaee aur darvaazay par kundee lagaaee. betay usay khaalee bartan detay gaay aur maan un men tel undelatee gaee. 6bartanon men tel daltay daltay sab labaalab bhar gaay. maan bolee, “mujhay ek aur bartan day do” to ek ladkay nay javaab diya, “aur koee naheen hai.” tab tel ka silsila ruk gaya.
7jab beva nay mard-ay-khuda kay paas ja kar usay ittila dee to ileesha nay kaha, “ab ja kar tel ko bech den aur karzay kay paisay jama karaaen. jo bach jaaay usay aap aur aap kay betay apnee zarooriyaat pooree karnay kay liyay istemaal kar saktay hain.”
ileesha shooneem men ladkay ko zinda kar deta hai
8ek din ileesha shooneem gaya. vahaan ek ameer aurat rahetee thee jis nay zabardastee usay apnay ghar bitha kar khaana khilaaya. baad men jab kabhee ileesha vahaan say guzarta to vah khaanay kay liyay us aurat kay ghar thaher jaata. 9ek din aurat nay apnay shauhar say baat kee, “main nay jaan liya hai ki jo aadmee hamaaray haan aata raheta hai vah allaah ka muqaddas paighambar hai. 10kyoon na ham us kay liyay chhat par chhota sa kamra bana kar us men chaarpaaee, mez, kursee aur shamaadaan rakhen. phir jab bhee vah hamaaray paas aaay to vah us men thaher sakta hai.”
11ek din jab ileesha aaya to vah apnay kamray men ja kar bistar par let gaya. 12us nay apnay naukar jaihaazee say kaha, “shooneemee mezbaan ko bula laao.” jab vah a kar us kay saamnay khadee huee 13to ileesha nay jaihaazee say kaha, “usay bata dena ki aap nay hamaaray liyay bahut takleef uthaaee hai. ab ham aap kay liyay kya kuchh karen? kya ham baadshaah ya fauj kay kamaandar say baat karkay aap kee sifaarish karen?” aurat nay javaab diya, “naheen, is kee zaroorat naheen. main apnay hee logon kay darmiyaan rahetee hoon.”
14baad men ileesha nay jaihaazee say baat kee, “ham us kay liyay kya karen?” jaihaazee nay javaab diya, “ek baat to hai. us ka koee beta naheen, aur us ka shauhar kaafee boodha hai.” 15ileesha bola, “usay vaapas bulaao.” aurat vaapas a kar darvaazay men khadee ho gaee. ileesha nay us say kaha, 16“aglay saal isee vaqt aap ka apna beta aap kee god men hoga.” shooneemee aurat nay etiraaz kiya, “naheen naheen, meray aaqa. mard-ay-khuda aisee baaten karkay apnee khaadima ko jhootee tasallee mat den.”
17lekin aisa hee hua. kuchh der kay baad aurat ka paaon bhaaree ho gaya, aur ain ek saal kay baad us kay haan beta paida hua. sab kuchh vaisa hee hua jaisa ileesha nay kaha tha. 18bachcha parvaan chadha, aur ek din vah ghar say nikal kar khet men apnay baap kay paas gaya jo fasal kee kataaee karnay vaalon kay saath kaam kar raha tha. 19achaanak ladka cheekhnay laga, “haay mera sar, haay mera sar!” baap nay kisee mulaazim ko bataaya, “ladkay ko utha kar maan kay paas lay jaao.” 20naukar usay utha kar lay gaya, aur vah apnee maan kee god men baitha raha. lekin dopaher ko vah mar gaya.
21maan ladkay kee laash ko lay kar chhat par chadh gaee. mard-ay-khuda kay kamray men ja kar us nay usay us kay bistar par lita diya. phir darvaazay ko band karkay vah baahar niklee 22aur apnay shauhar ko bulva kar kaha, “zara ek naukar aur ek gadhee meray paas bhej den. mujhay fauran mard-ay-khuda kay paas jaana hai. main jald hee vaapas a jaaoongee.” 23shauhar nay hairaan ho kar poochha, “aaj us kay paas kyoon jaana hai? na to naay chaand kee eed hai, na sabat ka din.” beevee nay kaha, “sab khairiyat hai.” 24gadhee par zeen kas kar us nay naukar ko hukm diya, “gadhee ko tez chala taaki ham jaldee pahunch jaaen. jab main kahoongee tab hee rukna hai, varna naheen.”
25chaltay chaltay vah karmil pahaad kay paas pahunch gaay jahaan mard-ay-khuda ileesha tha. usay door say dekh kar ileesha jaihaazee say kahenay laga, “dekho, shooneem kee aurat a rahee hai! 26bhaag kar us kay paas jaao aur poochho ki kya aap, aap ka shauhar aur bachcha theek hain?” jaihaazee nay ja kar us ka haal poochha to aurat nay javaab diya, “jee, sab theek hai.” 27lekin joon hee vah pahaad kay paas pahunch gaee to ileesha kay saamnay gir kar us kay paaon say chimat gaee. yah dekh kar jaihaazee usay hataanay kay liyay qareeb aaya, lekin mard-ay-khuda bola, “chhod do! koee baat isay bahut takleef day rahee hai, lekin rabb nay vajah mujh say chhupaaay rakhee hai. us nay mujhay is kay baaray men kuchh naheen bataaya.”
28phir shooneemee aurat bol uthee, “meray aaqa, kya main nay aap say betay kee darakhwaast kee thee? kya main nay naheen kaha tha ki mujhay ghalat ummeed na dilaaen?” 29tab ileesha nay naukar ko hukm diya, “jaihaazee, safar kay liyay kamarbasta ho kar meree laathee ko lay lo aur bhaag kar shooneem pahuncho. agar raastay men kisee say milo to usay salaam tak na karna, aur agar koee salaam kahay to usay javaab mat dena. jab vahaan pahunchogay to meree laathee ladkay kay chiharay par rakh dena.” 30lekin maan nay etiraaz kiya, “rabb kee aur aap kee hayaat kee qasam, aap kay baghair main ghar vaapas naheen jaaoongee.”
chunaanchay ileesha bhee utha aur aurat kay peechhay peechhay chal pada. 31jaihaazee bhaag bhaag kar un say pahelay pahunch gaya aur laathee ko ladkay kay chiharay par rakh diya. lekin kuchh na hua. na koee aavaaz sunaaee dee, na koee harkat huee. vah ileesha kay paas vaapas aaya aur bola, “ladka abhee tak murda hee hai.”
32jab ileesha pahunch gaya to ladka ab tak murda haalat men us kay bistar par pada tha. 33vah akela hee andar gaya aur darvaazay par kundee laga kar rabb say dua karnay laga. 34phir vah ladkay par let gaya, yoon ki us ka munh bachchay kay munh say, us kee aankhen bachchay kee aankhon say aur us kay haath bachchay kay haathon say lag gaay. aur joon hee vah ladkay par jhuk gaya to us ka jism garm honay laga. 35ileesha khada hua aur ghar men idhar udhar phirnay laga. phir vah ek aur martaba ladkay par let gaya. is dafa ladkay nay saat baar chheenken maar kar apnee aankhen khol deen.
36ileesha nay jaihaazee ko aavaaz day kar kaha, “shooneemee aurat ko bula laao.” vah kamray men daakhil huee to ileesha bola, “aaen, apnay betay ko utha kar lay jaaen.” 37vah aaee aur ileesha kay saamnay aundhay munh jhuk gaee, phir apnay betay ko utha kar kamray say baahar chalee gaee.
ileesha zahereelay saalan ko khaanay kay qaabil bana deta hai
38ileesha jiljaal ko laut aaya. un dinon men mulk kaal kee girift men tha. ek din jab nabiyon ka guroh us kay saamnay baitha tha to us nay apnay naukar ko hukm diya, “badee deg lay kar nabiyon kay liyay kuchh paka lo.”
39ek aadmee baahar nikal kar khulay maidaan men kaddoo dhoondnay gaya. kaheen ek bel nazar aaee jis par kaddoo jaisee koee sabzee lagee thee. in kaddooon say apnee chaadar bhar kar vah vaapas aaya aur unhen kaat kaat kar deg men daal diya, haalaanki kisee ko bhee maaloom naheen tha ki kya cheez hai.
40saalan pak kar nabiyon men taqseem hua. lekin usay chakhtay hee vah cheekhnay lagay, “mard-ay-khuda, saalan men zaher hai! isay kha kar banda mar jaaega.” vah usay bilkul na kha sakay. 41ileesha nay hukm diya, “mujhay kuchh maida la kar den.” phir usay deg men daal kar bola, “ab isay logon ko khila den.” ab khaana khaanay kay qaabil tha aur unhen nuqsaan na pahuncha saka.
100 aadmiyon kay liyay khaanaa
42ek aur mauqay par kisee aadmee nay baal-saleesa say a kar mard-ay-khuda ko naee fasal kay jau kee 20 rotiyaan aur kuchh anaaj day diya. ileesha nay jaihaazee ko hukm diya, “isay logon ko khila do.”
43jaihaazee hairaan ho kar bola, “yah kaisay mumkin hai? yah to 100 aadmiyon kay liyay kaafee naheen hai.” lekin ileesha nay israar kiya, “isay logon men taqseem kar do, kyoonki rabb farmaata hai ki vah jee bhar kar khaaengay balki kuchh bach bhee jaaega.”
44aur aisa hee hua. jab naukar nay aadmiyon men khaana taqseem kiya to unhon nay jee bhar kar khaaya, balki kuchh khaana bach bhee gaya. vaisa hee hua jaisa rabb nay farmaaya tha.