2 Salaateen 5
naamaan kee shifaa
1us vaqt shaam kee fauj ka kamaandar naamaan tha. baadshaah us kee bahut qadar karta tha, aur doosray bhee us kee khaas izzat kartay thay, kyoonki rabb nay us kee maarifat shaam kay dushmanon par fatah bakhshee thee. lekin zabardast faujee honay kay baavujood vah sangeen jildee beemaaree ka mareez tha. 2naamaan kay ghar men ek israaeelee ladkee rahetee thee. kisee vaqt jab shaam kay faujiyon nay israaeel par chhaapa maara tha to vah usay giriftaar karkay yahaan lay aaay thay. ab ladkee naamaan kee beevee kee khidmat kartee thee. 3ek din us nay apnee maalikan say baat kee, “kaash mera aaqa us nabee say milnay jaata jo saamriya men raheta hai. vah usay zaroor shifa deta.”
4yah sun kar naamaan nay baadshaah kay paas ja kar ladkee kee baat duharaaee. 5baadshaah bola, “zaroor jaaen aur us nabee say milen. main aap kay haath israaeel kay baadshaah ko sifaarishee khat bhej doonga.” chunaanchay naamaan ravaana hua. us kay paas taqreeban 340 kilograam chaandee, 68 kilograam sona aur 10 qeemtee soot thay. 6jo khat vah saath lay kar gaya us men likha tha, “jo aadmee aap ko yah khat pahuncha raha hai vah mera khaadim naamaan hai. main nay usay aap kay paas bheja hai taaki aap usay us kee jildee beemaaree say shifa den.”
7khat padh kar yooraam nay ranjish kay maaray apnay kapday phaaday aur pukaara, “is aadmee nay mareez ko meray paas bhej diya hai taaki main usay shifa doon! kya main allaah hoon ki kisee ko jaan say maaroon ya usay zinda karoon? ab ghaur karen aur dekhen ki vah kis tarah meray saath jhagadnay ka mauqa dhoond raha hai.”
8jab ileesha ko khabar milee ki baadshaah nay ghabra kar apnay kapday phaad liyay hain to us nay yooraam ko paighaam bheja, “aap nay apnay kapday kyoon phaad liyay? aadmee ko meray paas bhej den to vah jaan lega ki israaeel men nabee hai.”
9tab naamaan apnay rath par savaar ileesha kay ghar kay darvaazay par pahunch gaya. 10ileesha khud na nikla balki kisee ko baahar bhej kar ittila dee, “ja kar saat baar darya-ay-yardan men naha len. phir aap kay jism ko shifa milegee aur aap paak-saaf ho jaaengay.”
11yah sun kar naamaan ko ghussa aaya aur vah yah kah kar chala gaya, “main nay socha ki vah kam az kam baahar a kar mujh say milega. hona yah chaahiay tha ki vah meray saamnay khaday ho kar rabb apnay khuda ka naam pukaarta aur apna haath beemaar jagah kay oopar hila hila kar mujhay shifa deta. 12kya damishq kay darya abaana aur farfar tamaam israaeelee daryaaon say behatar naheen hain? agar nahaanay kee zaroorat hai to main kyoon na un men naha kar paak-saaf ho jaaoon?”
yoon budabudaatay huay vah baday ghussay men chala gaya. 13lekin us kay mulaazimon nay usay samjhaanay kee koshish kee. “hamaaray aaqa, agar nabee aap say kisee mushkil kaam ka taqaaza karta to kya aap vah karnay kay liyay tayyaar na hotay? ab jabki us nay sirf yah kaha hai ki naha kar paak-saaf ho jaaen to aap ko yah zaroor karna chaahiay.” 14aakhirkaar naamaan maan gaya aur yardan kee vaadee men utar gaya. darya par pahunch kar us nay saat baar us men dubkee lagaaee aur vaaqaee us ka jism ladkay kay jism jaisa sehatmand aur paak-saaf ho gaya.
15tab naamaan apnay tamaam mulaazimon kay saath mard-ay-khuda kay paas vaapas gaya. us kay saamnay khaday ho kar us nay kaha, “ab main jaan gaya hoon ki israaeel kay khuda kay siva pooree duniya men khuda naheen hai. zara apnay khaadim say tuhfa qabool karen.” 16lekin ileesha nay inkaar kiya, “rabb kee hayaat kee qasam jis kee khidmat main karta hoon, main kuchh naheen loonga.” naamaan israar karta raha, to bhee vah kuchh lenay kay liyay tayyaar na hua.
17aakhirkaar naamaan maan gaya. us nay kaha, “theek hai, lekin mujhay zara ek kaam karnay kee ijaazat den. main yahaan say itnee mittee apnay ghar lay jaana chaahata hoon jitnee do khachchar utha kar lay ja saktay hain. kyoonki aainda main us par rabb ko bhasm honay vaalee aur zabah kee qurbaaniyaan chadhaana chaahata hoon. ab say main kisee aur maabood ko qurbaaniyaan pesh naheen karoonga. 18lekin rabb mujhay ek baat kay liyay muaaf karay. jab mera baadshaah pooja karnay kay liyay rimmon kay mandir men jaata hai to meray baazoo ka sahaara leta hai. yoon mujhay bhee us kay saath jhuk jaana padta hai jab vah but kay saamnay aundhay munh jhuk jaata hai. rabb meree yah harkat muaaf kar day.”
19ileesha nay javaab diya, “salaamatee say jaaen.”
jaihaazee ka laalach
naamaan ravaana huaa 20to kuchh der kay baad ileesha ka naukar jaihaazee sochnay laga, “meray aaqa nay shaam kay is banday naamaan par hadd say ziyaada narmdilee ka izhaar kiya hai. chaahiay to tha ki vah us kay tuhfay qabool kar leta. rabb kee hayaat kee qasam, main us kay peechhay daud kar kuchh na kuchh us say lay loonga.”
21chunaanchay jaihaazee naamaan kay peechhay bhaaga. jab naamaan nay usay dekha to vah rath say utar kar jaihaazee say milnay gaya aur poochha, “kya sab khairiyat hai?” 22jaihaazee nay javaab diya, “jee, sab khairiyat hai. meray aaqa nay mujhay aap ko ittila denay bheja hai ki abhee abhee nabiyon kay guroh kay do javaan ifraaeem kay pahaadee ilaaqay say meray paas aaay hain. meharbaanee karkay unhen 34 kilograam chaandee aur do qeemtee soot day den.” 23naamaan bola, “zaroor, balki 68 kilograam chaandee lay len.” is baat par vah bazid raha. us nay 68 kilograam chaandee boriyon men lapet lee, do soot chun liyay aur sab kuchh apnay do naukron ko day diya taaki vah saamaan jaihaazee kay aagay aagay lay chalen.
24jab vah us pahaad kay daaman men pahunchay jahaan ileesha raheta tha to jaihaazee nay saamaan naukron say lay kar apnay ghar men rakh chhoda, phir donon ko rukhsat kar diya. 25phir vah ja kar ileesha kay saamnay khada ho gaya. ileesha nay poochha, “jaihaazee, tum kahaan say aaay ho?” us nay javaab diya, “main kaheen naheen gaya tha.”
26lekin ileesha nay etiraaz kiya, “kya meree rooh tumhaaray saath naheen thee jab naamaan apnay rath say utar kar tum say milnay aaya? kya aaj chaandee, kapday, zaitoon aur angoor kay baagh, bhed-bakriyaan, gaay-bail, naukar aur naukraaniyaan haasil karnay ka vaqt tha? 27ab naamaan kee jildee beemaaree hamesha tak tumhen aur tumhaaree aulaad ko lagee rahegee.”
jab jaihaazee kamray say nikla to jildee beemaaree usay lag chukee thee. vah barf kee tarah safed ho gaya tha.