2 Salaateen 6

kulhaadee ka loha paanee kee satah par tairta hai

¹ek din kuchh nabee ileesha kay paas a kar shikaayat karnay lagay, “jis tang jagah par ham aap kay paas a kar thaheray hain us men hamaaray liyay rahena mushkil hai. ²kyoon na ham darya-ay-yardan par jaaen aur har aadmee vahaan say shaheteer lay aaay taaki ham rahenay kee naee jagah bana saken.” ileesha bola, “theek hai, jaaen.” ³kisee nay guzaarish kee, “baraah-ay-karam hamaaray saath chalen.” nabee raazee ho kar ⁴un kay saath ravaana hua.

darya-ay-yardan kay paas pahunchtay hee vah darakht kaatnay lagay. ⁵kaattay kaattay achaanak kisee kee kulhaadee ka loha paanee men gir gaya. vah chilla utha, “haay meray aaqa! yah mera naheen tha, main nay to usay kisee say udhaar liya tha.” ⁶ileesha nay savaal kiya, “loha kahaan paanee men gira?” aadmee nay usay jagah dikhaaee to nabee nay kisee darakht say shaakh kaat kar paanee men phaink dee. achaanak loha paanee kee satah par a kar tairnay laga. ⁷ileesha bola, “isay paanee say nikaal lo!” aadmee nay apna haath badha kar lohay ko pakad liya.

shaam kay jangee mansoobay ileesha kay baais naakaam rahetay hain

⁸shaam aur israaeel kay darmiyaan jang thee. jab kabhee baadshaah apnay afsaron say mashvra karkay kaheta, “ham fulaan fulaan jagah apnee lashkargaah laga lengay” ⁹to fauran mard-ay-khuda israaeel kay baadshaah ko aagaah karta, “fulaan jagah say mat guzarna, kyoonki shaam kay faujee vahaan ghaat men baithay hain.” ¹⁰tab israaeel ka baadshaah apnay logon ko mazkoora jagah par bhejta aur vahaan say guzarnay say muhtaat raheta tha. aisa na sirf ek ya do dafa balki kaee martaba hua.

¹¹aakhirkaar shaam kay baadshaah nay bahut ranjeeda ho kar apnay afsaron ko bulaaya aur poochha, “kya koee mujhay bata sakta hai ki ham men say kaun israaeel kay baadshaah ka saath deta hai?” ¹²kisee afsar nay javaab diya, “meray aaqa aur baadshaah, ham men say koee naheen hai. masla yah hai ki israaeel ka nabee ileesha israaeel kay baadshaah ko vah baaten bhee bata deta hai jo aap apnay sonay kay kamray men bayaan kartay hain.” ¹³baadshaah nay hukm diya, “jaaen, us ka pata karen taaki ham apnay faujiyon ko bhej kar usay pakad len.”

baadshaah ko ittila dee gaee ki ileesha dootain naamee shaher men hai. ¹⁴us nay fauran ek badee fauj rathon aur ghodon samet vahaan bhej dee. unhon nay raat kay vaqt pahunch kar shaher ko gher liya. ¹⁵jab ileesha ka naukar subah-saveray jaag utha aur ghar say nikla to kya dekhta hai ki poora shaher ek badee fauj say ghira hua hai jis men rath aur ghoday bhee shaamil hain. us nay ileesha say kaha, “haay meray aaqa, ham kya karen?” ¹⁶lekin ileesha nay usay tasallee dee, “daro mat! jo hamaaray saath hain vah un kee nisbat kaheen ziyaada hain jo dushman kay saath hain.” ¹⁷phir us nay dua kee, “ai rabb, naukar kee aankhen khol taaki vah dekh sakay.” rabb nay ileesha kay naukar kee aankhen khol deen to us nay dekha ki pahaad par ileesha kay ird-gird aatisheen ghoday aur rath phailay huay hain.

¹⁸jab dushman ileesha kee taraf badhnay laga to us nay dua kee, “ai rabb, in ko andha kar day!” rabb nay ileesha kee sunee aur unhen andha kar diya. ¹⁹phir ileesha un kay paas gaya aur kaha, “yah raasta saheeh naheen. aap ghalat shaher kay paas pahunch gaay hain. meray peechhay ho len to main aap ko us aadmee kay paas pahuncha doonga jisay aap dhoond rahay hain.” yah kah kar vah unhen saamriya lay gaya.

²⁰jab vah shaher men daakhil huay to ileesha nay dua kee, “ai rabb, faujiyon kee aankhen khol day taaki vah dekh saken.” tab rabb nay un kee aankhen khol deen, aur unhen maaloom hua ki ham saamriya men phans gaay hain.

²¹jab israaeel kay baadshaah nay apnay dushmanon ko dekha to us nay ileesha say poochha, “meray baap, kya main unhen maar doon? kya main unhen maar doon?” ²²lekin ileesha nay mana kiya, “aisa mat karen. kya aap apnay jangee qaidiyon ko maar detay hain? naheen, unhen khaana khilaaen, paanee pilaaen aur phir un kay maalik kay paas vaapas bhej den.”

²³chunaanchay baadshaah nay un kay liyay badee ziyaafat ka ehatimaam kiya aur khaanay-peenay say faarigh honay par unhen un kay maalik kay paas vaapas bhej diya. is kay baad israaeel par shaam kee taraf say loot-maar kay chhaapay band ho gaay.

saamriya ka muhaasaraa

²⁴kuchh der kay baad shaam ka baadshaah bin-hadad apnee pooree fauj jama karkay israaeel par chadh aaya aur saamriya ka muhaasara kiya. ²⁵nateejay men shaher men shadeed kaal pada. aakhir men gadhay ka sar chaandee kay 80 sikkon men aur kabootar kee mutthee bhar beet chaandee kay 5 sikkon men miltee thee.

²⁶ek din israaeel ka baadshaah yooraam shaher kee faseel par sair kar raha tha to ek aurat nay us say iltimaas kee, “ai meray aaqa aur baadshaah, meree madad keejiay.” ²⁷baadshaah nay javaab diya, “agar rabb aap kee madad naheen karta to main kis tarah aap kee madad karoon? na main gaahanay kee jagah ja kar aap ko anaaj day sakta hoon, na angoor ka ras nikaalnay kee jagah ja kar aap ko ras pahuncha sakta hoon. ²⁸phir bhee mujhay bataaen, masla kya hai?” aurat bolee, “is aurat nay mujh say kaha tha, ‘aaen, aaj aap apnay betay ko qurbaan karen taaki ham usay kha len, to phir kal ham meray betay ko kha lengay.’ ²⁹chunaanchay ham nay meray betay ko paka kar kha liya. aglay din main nay us say kaha, ‘ab apnay betay ko day den taaki usay bhee kha len.’ lekin us nay usay chhupaaay rakha.”

³⁰yah sun kar baadshaah nay ranjish kay maaray apnay kapday phaad daalay. choonki vah abhee tak faseel par khada tha is liyay sab logon ko nazar aaya ki kapdon kay neechay vah taat pahenay huay tha. ³¹us nay pukaara, “allaah mujhay sakht saza day agar main ileesha bin saafat ka aaj hee sar qalam na karoon!”

³²us nay ek aadmee ko ileesha kay paas bheja aur khud bhee us kay peechhay chal pada. ileesha us vaqt ghar men tha, aur shaher kay buzurg us kay paas baithay thay. baadshaah ka qaasid abhee raastay men tha ki ileesha buzurgon say kahenay laga, “ab dhyaan karen, is qaatil baadshaah nay kisee ko mera sar qalam karnay kay liyay bhej diya hai. usay andar aanay na den balki darvaazay par kundee lagaaen. us kay peechhay peechhay us kay maalik kay qadmon kee aahat bhee sunaaee day rahee hai.”

³³ileesha abhee baat kar hee raha tha ki qaasid pahunch gaya aur us kay peechhay baadshaah bhee. baadshaah bola, “rabb hee nay hamen is museebat men phansa diya hai. main mazeed us kee madad kay intizaar men kyoon rahoon?”