2 Salaateen 7

¹tab ileesha bola, “rabb ka farmaan sunen! rabb farmaata hai ki kal isee vaqt shaher kay darvaazay par saadhay 5 kilograam behtareen maida aur 11 kilograam jau chaandee kay ek sikkay kay liyay bikega.” ²jis afsar kay baazoo ka sahaara baadshaah leta tha vah mard-ay-khuda kee baat sun kar bol utha, “yah naamumkin hai, khwaah rabb aasmaan kay dareechay kyoon na khol day.” ileesha nay javaab diya, “aap apnee aankhon say is ka mushaahada karengay, lekin khud us men say kuchh na khaaengay.”

shaam kay faujee faraar ho jaatay hain

³shaher say baahar darvaazay kay qareeb kodh kay chaar mareez baithay thay. ab yah aadmee ek doosray say kahenay lagay, “ham yahaan baith kar maut ka intizaar kyoon karen? ⁴shaher men kaal hai. agar us men jaaen to bhookay mar jaaengay, lekin yahaan rahenay say bhee koee farq naheen padta. to kyoon na ham shaam kee lashkargaah men ja kar apnay aap ko un kay havaalay karen. agar vah hamen zinda rahenay den to achchha rahega, aur agar vah hamen qatl bhee kar den to koee farq naheen padega. yahaan rah kar bhee hamen marna hee hai.”

⁵shaam kay dhundalkay men vah ravaana huay. lekin jab lashkargaah kay kinaaray tak pahunchay to ek bhee aadmee nazar na aaya. ⁶kyoonki rabb nay shaam kay faujiyon ko rathon, ghodon aur ek badee fauj ka shor suna diya tha. vah ek doosray say kahenay lagay, “israaeel kay baadshaah nay hittee aur misree baadshaahon ko ujrat par bulaaya taaki vah ham par hamla karen!” ⁷dar kay maaray vah shaam kay dhundalkay men faraar ho gaay thay. un kay khaimay, ghoday, gadhay balki pooree lashkargaah peechhay rah gaee thee jabki vah apnee jaan bachaanay kay liyay bhaag gaay thay.

⁸jab kaudee lashkargaah men daakhil huay to unhon nay ek khaimay men ja kar jee bhar kar khaana khaaya aur mai pee. phir unhon nay sona, chaandee aur kapday utha kar kaheen chhupa diay. vah vaapas a kar kisee aur khaimay men gaay aur us ka saamaan jama karkay usay bhee chhupa diya. ⁹lekin phir vah aapas men kahenay lagay, “jo kuchh ham kar rahay hain theek naheen. aaj khushee ka din hai, aur ham yah khushkhabaree doosron tak naheen pahuncha rahay. agar ham subah tak intizaar karen to qusoorvaar thaherengay. aaen, ham fauran vaapas ja kar baadshaah kay gharaanay ko ittila den.”

¹⁰chunaanchay vah shaher kay darvaazay kay paas gaay aur paheredaaron ko aavaaz day kar unhen sab kuchh sunaaya, “ham shaam kee lashkargaah men gaay to vahaan na koee dikhaaee diya, na kisee kee aavaaz sunaaee dee. ghoday aur gadhay bandhay huay thay aur khaimay tarteeb say khaday thay, lekin aadmee ek bhee maujood naheen tha!”

¹¹darvaazay kay paheredaaron nay aavaaz day kar doosron ko khabar pahunchaaee to shaher kay andar baadshaah kay gharaanay ko ittila dee gaee. ¹²go raat ka vaqt tha to bhee baadshaah nay uth kar apnay afsaron ko bulaaya aur kaha, “main aap ko bataata hoon ki shaam kay faujee kya kar rahay hain. vah to khoob jaantay hain ki ham bhookon mar rahay hain. ab vah apnee lashkargaah ko chhod kar khulay maidaan men chhup gaay hain, kyoonki vah samajhtay hain ki israaeelee khaalee lashkargaah ko dekh kar shaher say zaroor nikalengay aur phir ham unhen zinda pakad kar shaher men daakhil ho jaaengay.”

¹³lekin ek afsar nay mashvra diya, “behatar hai ki ham chand ek aadmiyon ko paanch bachay huay ghodon kay saath lashkargaah men bhejen. agar vah pakday jaaen to koee baat naheen. kyoonki agar vah yahaan rahen to phir bhee unhen hamaaray saath marna hee hai.”

¹⁴chunaanchay do rathon ko ghodon samet tayyaar kiya gaya, aur baadshaah nay unhen shaam kee lashkargaah men bhej diya. rathbaanon ko us nay hukm diya, “jaaen aur pata karen ki kya hua hai.” ¹⁵vah ravaana huay aur shaam kay faujiyon kay peechhay peechhay chalnay lagay. raastay men har taraf kapday aur saamaan bikhra pada tha, kyoonki faujiyon nay bhaagtay bhaagtay sab kuchh phaink kar raastay men chhod diya tha. israaeelee rathasvaar darya-ay-yardan tak pahunchay aur phir baadshaah kay paas vaapas a kar sab kuchh kah sunaaya.

¹⁶tab saamriya kay baashinday shaher say nikal aaay aur shaam kee lashkargaah men ja kar sab kuchh loot liya. yoon vah kuchh poora hua jo rabb nay farmaaya tha ki saadhay 5 kilograam behtareen maida aur 11 kilograam jau chaandee kay ek sikkay kay liyay bikega.

¹⁷jis afsar kay baazoo ka sahaara baadshaah leta tha usay us nay darvaazay kee nigraanee karnay kay liyay bhej diya tha. lekin jab log baahar niklay to afsar un kee zad men a kar un kay pairon talay kuchla gaya. yoon vaisa hee hua jaisa mard-ay-khuda nay us vaqt kaha tha jab baadshaah us kay ghar aaya tha. ¹⁸kyoonki ileesha nay baadshaah ko bataaya tha, “kal isee vaqt shaher kay darvaazay par saadhay 5 kilograam behtareen maida aur 11 kilograam jau chaandee kay ek sikkay kay liyay bikega.” ¹⁹afsar nay etiraaz kiya tha, “yah naamumkin hai, khwaah rabb aasmaan kay dareechay kyoon na khol day.” aur mard-ay-khuda nay javaab diya tha, “aap apnee aankhon say is ka mushaahada karengay, lekin khud us men say kuchh naheen khaaengay.”

²⁰ab yah peshgoee pooree huee, kyoonki bekaaboo logon nay usay shaher kay darvaazay par paaon talay kuchal diya, aur vah mar gaya.