2 Samooel 12

naatan daaood ko mujrim thaheraata hai

¹rabb nay naatan nabee ko daaood kay paas bhej diya. baadshaah kay paas pahunch kar vah kahenay laga, “kisee shaher men do aadmee rahetay thay. ek ameer tha, doosra ghareeb. ²ameer kee bahut bhed-bakriyaan aur gaay-bail thay, ³lekin ghareeb kay paas kuchh naheen tha, sirf bhed kee nanhee see bachchee jo us nay khareed rakhee thee. ghareeb us kee parvarish karta raha, aur vah ghar men us kay bachchon kay saath saath badee hotee gaee. vah us kee plet say khaatee, us kay piyaalay say peetee aur raat ko us kay baazooon men so jaatee. gharaz bhed ghareeb kay liyay betee kee see haisiyat rakhtee thee. ⁴ek din ameer kay haan mehamaan aaya. jab us kay liyay khaana pakaana tha to ameer ka dil naheen karta tha ki apnay revad men say kisee jaanvar ko zabah karay, is liyay us nay ghareeb aadmee say us kee nanhee see bhed lay kar usay mehamaan kay liyay tayyaar kiya.”

⁵yah sun kar daaood ko bada ghussa aaya. vah pukaara, “rabb kee hayaat kee qasam, jis aadmee nay yah kiya vah saza-ay-maut kay laaiq hai. ⁶laazim hai ki vah bhed kee bachchee kay ivz ghareeb ko bhed kay chaar bachchay day. yahee us kee munaasib saza hai, kyoonki us nay aisee harkat karkay ghareeb par taras na khaaya.”

⁷naatan nay daaood say kaha, “aap hee vah aadmee hain! rabb israaeel ka khuda farmaata hai, ‘main nay tujhay masah karkay israaeel ka baadshaah bana diya, aur main hee nay tujhay saaool say mahfooz rakha. ⁸saaool ka gharaana us kee beeviyon samet main nay tujhay day diya. haan, poora israaeel aur yahoodaah bhee teray tahet a gaay hain. aur agar yah teray liyay kam hota to main tujhay mazeed denay kay liyay bhee tayyaar hota. ⁹ab mujhay bata ki too nay meree marzee ko haqeer jaan kar aisee harkat kyoon kee hai jis say mujhay nafrat hai? too nay ooriyaah hittee ko qatl karvaakay us kee beevee ko chheen liya hai. haan, too qaatil hai, kyoonki too nay hukm diya ki ooriyaah ko ammoniyon say ladtay ladtay marvaana hai. ¹⁰choonki too nay mujhay haqeer jaan kar ooriyaah hittee kee beevee ko us say chheen liya is liyay aainda talvaar teray gharaanay say naheen hategee.’

¹¹rabb farmaata hai, ‘main honay doonga ki teray apnay khaandaan men say museebat tujh par aaegee. teray dekhtay dekhtay main teree beeviyon ko tujh say chheen kar teray qareeb kay aadmee kay havaalay kar doonga, aur vah alaaniya un say hambistar hoga. ¹²too nay chupkay say gunaah kiya, lekin jo kuchh main javaab men honay doonga vah alaaniya aur pooray israaeel kay dekhtay dekhtay hoga’.”

¹³tab daaood nay iqraar kiya, “main nay rabb ka gunaah kiya hai.” naatan nay javaab diya, “rabb nay aap ko muaaf kar diya hai aur aap naheen marengay. ¹⁴lekin is harkat say aap nay rabb kay dushmanon ko kufr baknay ka mauqa faraaham kiya hai, is liyay bat-saba say honay vaala beta mar jaaega.”

¹⁵tab naatan apnay ghar chala gaya.

daaood ka beta mar jaata hai

phir rabb nay bat-saba kay betay ko chhoo diya, aur vah sakht beemaar ho gaya. ¹⁶daaood nay allaah say iltimaas kee ki bachchay ko bachnay day. roza rakh kar vah raat kay vaqt nangay farsh par sonay laga. ¹⁷ghar kay buzurg us kay ird-gird khaday koshish kartay rahay ki vah farsh say uth jaaay, lekin befaaida. vah un kay saath khaanay kay liyay bhee tayyaar naheen tha.

¹⁸saatven din beta faut ho gaya. daaood kay mulaazimon nay usay khabar pahunchaanay kee jur’at na kee, kyoonki unhon nay socha, “jab bachcha abhee zinda tha to ham nay usay samjhaanay kee koshish kee, lekin us nay hamaaree ek bhee na sunee. ab agar bachchay kee maut kee khabar den to khatra hai ki vah koee nuqsaandih qadam uthaaay.”

¹⁹lekin daaood nay dekha ki mulaazim dheemee aavaaz men ek doosray say baat kar rahay hain. us nay poochha, “kya beta mar gaya hai?” unhon nay javaab diya, “jee, vah mar gaya hai.”

²⁰yah sun kar daaood farsh par say uth gaya. vah nahaaya aur jism ko khushboodaar tel say mal kar saaf kapday pahen liyay. phir us nay rabb kay ghar men ja kar us kee parastish kee. is kay baad vah mahel men vaapas gaya aur khaana mangva kar khaaya. ²¹us kay mulaazim hairaan huay aur bolay, “jab bachcha zinda tha to aap roza rakh kar rotay rahay. ab bachcha jaan-ba-haq ho gaya hai to aap uth kar dubaara khaana kha rahay hain. kya vajah hai?” ²²daaood nay javaab diya, “jab tak bachcha zinda tha to main roza rakh kar rota raha. khayaal yah tha ki shaayad rabb mujh par rahem karkay usay zinda chhod day. ²³lekin jab vah kooch kar gaya hai to ab roza rakhnay ka kya faaida? kya main is say usay vaapas la sakta hoon? hargiz naheen! ek din main khud hee us kay paas pahunchoonga. lekin us ka yahaan meray paas vaapas aana naamumkin hai.”

²⁴phir daaood nay apnee beevee bat-saba kay paas ja kar usay tasallee dee aur us say hambistar hua. tab us kay ek aur beta paida hua. daaood nay us ka naam sulemaan yaanee amnapasand rakha. yah bachcha rabb ko piyaara tha, ²⁵is liyay us nay naatan nabee kee maarifat ittila dee ki us ka naam yadeediyaah yaanee ‘rabb ko piyaara’ rakha jaaay.

rabba shaher par fatah

²⁶ab tak yoaab ammonee daar-ul-hakoomat rabba ka muhaasara kiay huay tha. phir vah shaher kay ek hissay banaam ‘shaahee shaher’ par qabza karnay men kaamyaab ho gaya. ²⁷us nay daaood ko ittila dee, “main nay rabba par hamla karkay us jagah par qabza kar liya hai jahaan paanee dastayaab hai. ²⁸chunaanchay ab fauj kay baaqee afraad ko la kar khud shaher par qabza kar len. varna log samjhengay ki main hee shaher ka faatih hoon.”

²⁹chunaanchay daaood fauj kay baaqee afraad ko lay kar rabba pahuncha. jab shaher par hamla kiya to vah us kay qabzay men a gaya. ³⁰daaood nay hanoon baadshaah ka taaj us kay sar say utaar kar apnay sar par rakh liya. sonay kay is taaj ka vazan 34 kilograam tha, aur us men ek beshaqeemat jauhar jada hua tha. daaood nay shaher say bahut sa loota hua maal lay kar ³¹us kay baashindon ko ghulaam bana liya. unhen patthar kaatnay kee aariyaan, lohay kee kudaalen aur kulhaadiyaan dee gaeen taaki vah mazdooree karen aur bhatton par kaam karen. yahee sulook baaqee ammonee shaheron kay baashindon kay saath bhee kiya gaya.

jang kay ikhtitaam par daaood pooree fauj kay saath yarooshalam laut aaya.