2 Samooel 13

tamar kee ismatdaree

¹daaood kay betay abeesloom kee khoobsoorat bahen thee jis ka naam tamar tha. us ka sautela bhaaee amnon tamar say shadeed muhabbat karnay laga. ²vah tamar ko itnee shiddat say chaahanay laga ki ranjish kay baais beemaar ho gaya, kyoonki tamar kunvaaree thee, aur amnon ko us kay qareeb aanay ka koee raasta nazar na aaya.

³amnon ka ek dost tha jis ka naam yoondab tha. vah daaood kay bhaaee sim’a ka beta tha aur bada zaheen tha. ⁴us nay amnon say poochha, “baadshaah kay betay, kya masla hai? roz-ba-roz aap ziyaada bujhay huay nazar a rahay hain. kya aap mujhay naheen bataaengay ki baat kya hai?” amnon bola, “main abeesloom kee bahen tamar say shadeed muhabbat karta hoon.” ⁵yoondab nay apnay dost ko mashvra diya, “bistar par let jaaen aur aisa zaahir karen goya beemaar hain. jab aap kay vaalid aap ka haal poochhnay aaengay to un say darakhwaast karna, ‘meree bahen tamar a kar mujhay mareezon ka khaana khilaaay. vah meray saamnay khaana tayyaar karay taaki main usay dekh kar us kay haath say khaana khaaoon’.”

⁶chunaanchay amnon nay bistar par let kar beemaar honay ka bahaana kiya. jab baadshaah us ka haal poochhnay aaya to amnon nay guzaarish kee, “meree bahen tamar meray paas aaay aur meray saamnay mareezon ka khaana bana kar mujhay apnay haath say khilaaay.”

⁷daaood nay tamar ko ittila dee, “aap ka bhaaee amnon beemaar hai. us kay paas ja kar us kay liyay mareezon ka khaana tayyaar karen.” ⁸tamar nay amnon kay paas a kar us kee maujoodgee men maida goondha aur khaana tayyaar karkay pakaaya. amnon bistar par leta usay dekhta raha. ⁹jab khaana pak gaya to tamar nay usay amnon kay paas la kar pesh kiya. lekin us nay khaanay say inkaar kar diya. us nay hukm diya, “tamaam naukar kamray say baahar nikal jaaen!” jab sab chalay gae ¹⁰to us nay tamar say kaha, “khaanay ko meray sonay kay kamray men lay aaen taaki main aap kay haath say kha sakoon.” tamar khaanay ko lay kar sonay kay kamray men apnay bhaaee kay paas aaee.

¹¹jab vah usay khaana khilaanay lagee to amnon nay usay pakad kar kaha, “a meree bahen, meray saath hambistar ho!” ¹²vah pukaaree, “naheen, meray bhaaee! meree ismatdaree na karen. aisa amal israaeel men mana hai. aisee bedeen harkat mat karna! ¹³aur aisee behuramtee kay baad main kahaan jaaoon? jahaan tak aap ka taalluq hai israaeel men aap kee buree tarah badnaamee ho jaaegee, aur sab samjhengay ki aap nihaayat shareer aadmee hain. aap baadshaah say baat kyoon naheen kartay? yaqeenan vah aap ko mujh say shaadee karnay say naheen rokengay.” ¹⁴lekin amnon nay us kee na sunee balki usay pakad kar us kee ismatdaree kee.

¹⁵lekin phir achaanak us kee muhabbat sakht nafrat men badal gaee. pahelay to vah tamar say shadeed muhabbat karta tha, lekin ab vah is say badh kar us say nafrat karnay laga. us nay hukm diya, “uth, dafa ho ja!” ¹⁶tamar nay iltimaas kee, “haay, aisa mat karna. agar aap mujhay nikaalengay to yah pahelay gunaah say ziyaada sangeen jurm hoga.” lekin amnon us kee sunnay kay liyay tayyaar na tha. ¹⁷us nay apnay naukar ko bula kar hukm diya, “is aurat ko yahaan say nikaal do aur is kay peechhay darvaaza band karkay kundee lagaao!” ¹⁸naukar tamar ko baahar lay gaya aur phir us kay peechhay darvaaza band karkay kundee laga dee.

tamar ek lambay baazooon vaala fraak pahenay huay thee. baadshaah kee tamaam kunvaaree betiyaan yahee libaas pahena kartee theen. ¹⁹badee ranjish kay aalam men us nay apna yah libaas phaad kar apnay sar par raakh daal lee. phir apna haath sar par rakh kar vah cheekhtee chillaatee vahaan say chalee gaee. ²⁰jab ghar pahunch gaee to abeesloom nay us say poochha, “meree bahen, kya amnon nay aap say ziyaadtee kee hai? ab khaamosh ho jaaen. vah to aap ka bhaaee hai. is muaamalay ko hadd say ziyaada ahemiyat mat dena.” us vaqt say tamar akelee hee apnay bhaaee abeesloom kay ghar men rahee.

²¹jab daaood ko is vaakiay kee khabar milee to usay sakht ghussa aaya. ²²abeesloom nay amnon say ek bhee baat na kee. na us nay us par koee ilzaam lagaaya, na koee achchhee baat kee, kyoonki tamar kee ismatdaree kee vajah say vah apnay bhaaee say sakht nafrat karnay laga tha.

abeesloom ka intiqaam

²³do saal guzar gaay. abeesloom kee bheden ifraaeem kay qareeb kay baal-hasoor men laaee gaeen taaki un kay baal qatray jaaen. is mauqay par abeesloom nay baadshaah kay tamaam beton ko daavat dee ki vah vahaan ziyaafat men shareek hon. ²⁴vah daaood baadshaah kay paas bhee gaya aur kaha, “in dinon men main apnee bhedon kay baal katra raha hoon. baadshaah aur un kay afsaron ko bhee meray saath khushee manaanay kee daavat hai.”

²⁵lekin daaood nay inkaar kiya, “naheen, meray betay, ham sab to naheen a saktay. itnay log aap kay liyay bojh ka baais ban jaaengay.” abeesloom bahut israar karta raha, lekin daaood nay daavat ko qabool na kiya balki usay barkat day kar rukhsat karna chaahata tha.

²⁶aakhirkaar abeesloom nay darakhwaast kee, “agar aap hamaaray saath ja na saken to phir kam az kam meray bhaaee amnon ko aanay den.” baadshaah nay poochha, “khaaskar amnon ko kyoon?” ²⁷lekin abeesloom itna zor deta raha ki daaood nay amnon ko baaqee beton samet baal-hasoor jaanay kee ijaazat day dee.

²⁸ziyaafat say pahelay abeesloom nay apnay mulaazimon ko hukm diya, “sunen! jab amnon mai pee pee kar khush ho jaaega to main aap ko amnon ko maarnay ka hukm doonga. phir aap ko usay maar daalna hai. daren mat, kyoonki main hee nay aap ko yah hukm diya hai. mazboot aur diler hon!”

²⁹mulaazimon nay aisa hee kiya. unhon nay amnon ko maar daala. yah dekh kar baadshaah kay doosray betay uth kar apnay khachcharon par savaar huay aur bhaag gaay. ³⁰vah abhee raastay men hee thay ki afwaah daaood tak pahunchee, “abeesloom nay aap kay tamaam beton ko qatl kar diya hai. ek bhee naheen bacha.”

³¹baadshaah utha aur apnay kapday phaad kar farsh par let gaya. us kay darbaaree bhee dukh men apnay kapday phaad phaad kar us kay paas khaday rahay. ³²phir daaood ka bhateeja yoondab bol utha, “meray aaqa, aap na sochen ki unhon nay tamaam shahezaadon ko maar daala hai. sirf amnon mar gaya hoga, kyoonki jab say us nay tamar kee ismatdaree kee us vaqt say abeesloom ka yahee iraada tha. ³³lihaaza is khabar ko itnee ahemiyat na den ki tamaam betay halaak huay hain. sirf amnon mar gaya hoga.”

³⁴itnay men abeesloom faraar ho gaya tha. phir yarooshalam kee faseel par khaday paheredaar nay achaanak dekha ki maghrib say logon ka bada guroh shaher kee taraf badh raha hai. vah pahaadee kay daaman men chalay a rahay thay. ³⁵tab yoondab nay baadshaah say kaha, “lo, baadshaah kay betay a rahay hain, jis tarah aap kay khaadim nay kaha tha.” ³⁶vah abhee apnee baat khatm kar hee raha tha ki shahzaaday andar aaay aur khoob ro paday. baadshaah aur us kay afsar bhee ronay lagay.

³⁷daaood badee der tak amnon ka maatam karta raha. lekin abeesloom nay faraar ho kar jasoor kay baadshaah talmee bin ammeehood kay paas panaah lee jo us ka naana tha. ³⁸vahaan vah teen saal tak raha. ³⁹phir ek vaqt a gaya ki daaood ka amnon kay liyay dukh door ho gaya, aur us ka abeesloom par ghussa tham gaya.