2 Samooel 14
yoaab abeesloom kee sifaarish karta hai
1yoaab bin zarooyaah ko maaloom hua ki baadshaah apnay betay abeesloom ko chaahata hai, 2is liyay us nay taqooa say ek daanishmand aurat ko bulaaya. yoaab nay usay hidaayat dee, “maatam ka roop bharen jaisay aap der say kisee ka maatam kar rahee hon. maatam kay kapday pahen kar khushboodaar tel mat lagaana. 3baadshaah kay paas ja kar us say baat karen.” phir yoaab nay aurat ko lafz-ba-lafz vah kuchh sikhaaya jo usay baadshaah ko bataana tha.
4daaood kay darbaar men a kar aurat nay aundhay munh jhuk kar iltimaas kee, “ai baadshaah, meree madad karen!” 5daaood nay darayaaft kiya, “kya masla hai?” aurat nay javaab diya, “main beva hoon, mera shauhar faut ho gaya hai. 6aur meray do betay thay. ek din vah baahar khet men ek doosray say ulajh paday. aur choonki koee maujood naheen tha jo donon ko alag karta is liyay ek nay doosray ko maar daala. 7us vaqt say poora kumba meray khilaaf uth khada hua hai. vah taqaaza kartay hain ki main apnay betay ko un kay havaalay karoon. vah kahetay hain, ‘us nay apnay bhaaee ko maar diya hai, is liyay ham badlay men usay saza-ay-maut dengay. is tarah vaaris bhee naheen rahega.’ yoon vah meree ummeed kee aakhiree kiran ko khatm karna chaahatay hain. kyoonki agar mera yah beta bhee mar jaaay to meray shauhar ka naam qaaim naheen rahega, aur us ka khaandaan roo-ay-zameen par say mit jaaega.” 8baadshaah nay aurat say kaha, “apnay ghar chalee jaaen aur fikr na karen. main muaamala hal kar doonga.”
9lekin aurat nay guzaarish kee, “ai baadshaah, dar hai ki log phir bhee mujhay mujrim thaheraaengay agar meray betay ko saza-ay-maut na dee jaaay. aap par to vah ilzaam naheen lagaaengay.” 10daaood nay israar kiya, “agar koee aap ko tang karay to usay meray paas lay aaen. phir vah aainda aap ko naheen sataaega!” 11aurat ko tasallee na huee. us nay guzaarish kee, “ai baadshaah, baraah-ay-karam rabb apnay khuda kee qasam khaaen ki aap kisee ko bhee maut ka badla naheen lenay dengay. varna nuqsaan men izaafa hoga aur mera doosra beta bhee halaak ho jaaega.” daaood nay javaab diya, “rabb kee hayaat kee qasam, aap kay betay ka ek baal bhee beeka naheen hoga.”
12phir aurat asal baat par a gaee, “meray aaqa, baraah-ay-karam apnee khaadima ko ek aur baat karnay kee ijaazat den.” baadshaah bola, “karen baat.” 13tab aurat nay kaha, “aap khud kyoon allaah kee qaum kay khilaaf aisa iraada rakhtay hain jisay aap nay abhee abhee ghalat qaraar diya hai? aap nay khud farmaaya hai ki yah theek naheen, aur yoon aap nay apnay aap ko hee mujrim thaheraaya hai. kyoonki aap nay apnay betay ko radd karkay usay vaapas aanay naheen diya. 14beshak ham sab ko kisee vaqt marna hai. ham sab zameen par undelay gaay paanee kee maanind hain jisay zameen jazab kar letee hai aur jo dubaara jama naheen kiya ja sakta. lekin allaah hamaaree zindagee ko bilaavajah mita naheen deta balki aisay mansoobay tayyaar rakhta hai jin kay zareeay mardood shakhs bhee us kay paas vaapas a sakay aur us say door na rahay. 15ai baadshaah meray aaqa, main is vaqt is liyay aap kay huzoor aaee hoon ki meray log mujhay daraanay kee koshish kar rahay hain. main nay socha, main baadshaah say baat karnay kee jur’at karoongee, shaayad vah meree sunen 16aur mujhay us aadmee say bachaaen jo mujhay aur meray betay ko us mauroosee zameen say maheroom rakhna chaahata hai jo allaah nay hamen day dee hai. 17khayaal yah tha ki agar baadshaah muaamala hal kar den to phir mujhay dubaara sukoon milega, kyoonki aap achchhee aur buree baaton ka imtiyaaz karnay men allaah kay farishtay jaisay hain. rabb aap ka khuda aap kay saath ho.”
18yah sab kuchh sun kar daaood bol utha, “ab mujhay ek baat bataaen. is ka saheeh javaab den.” aurat nay javaab diya, “jee meray aaqa, baat faramaaiay.” daaood nay poochha, “kya yoaab nay aap say yah kaam karvaaya?” 19aurat pukaaree, “baadshaah kee hayaat kee qasam, jo kuchh bhee meray aaqa farmaatay hain vah nishaanay par lag jaata hai, khwaah banda baaeen ya daaeen taraf hatnay kee koshish kyoon na karay. jee haan, aap kay khaadim yoaab nay mujhay aap kay huzoor bhej diya. us nay mujhay lafz-ba-lafz sab kuchh bataaya jo mujhay aap ko arz karna tha, 20kyoonki vah aap ko yah baat baraah-ay-raast naheen pesh karna chaahata tha. lekin meray aaqa ko allaah kay farishtay kee see hikmat haasil hai. jo kuchh bhee mulk men vuqoo men aata hai us ka aap ko pata chal jaata hai.”
abeesloom kee vaapsee
21daaood nay yoaab ko bula kar us say kaha, “theek hai, main aap kee darakhwaast pooree karoonga. jaaen, meray betay abeesloom ko vaapas lay aaen.” 22yoaab aundhay munh jhuk gaya aur bola, “rabb baadshaah ko barkat day! meray aaqa, aaj mujhay maaloom hua hai ki main aap ko manzoor hoon, kyoonki aap nay apnay khaadim kee darakhwaast ko poora kiya hai.” 23yoaab ravaana ho kar jasoor chala gaya aur vahaan say abeesloom ko vaapas laaya. 24lekin jab vah yarooshalam pahunchay to baadshaah nay hukm diya, “usay apnay ghar men rahenay kee ijaazat hai, lekin vah kabhee mujhay nazar na aaay.” chunaanchay abeesloom apnay ghar men dubaara rahenay laga, lekin baadshaah say kabhee mulaaqaat na ho sakee.
25pooray israaeel men abeesloom jaisa khoobsoorat aadmee naheen tha. sab us kee khaas taareef kartay thay, kyoonki sar say lay kar paaon tak us men koee nuqs nazar naheen aata tha. 26saal men vah ek hee martaba apnay baal katvaata tha, kyoonki itnay men us kay baal hadd say ziyaada vaznee ho jaatay thay. jab unhen tola jaata to un ka vazan taqreeban sava do kilograam hota tha. 27abeesloom kay teen betay aur ek betee thee. betee ka naam tamar tha aur vah nihaayat khoobsoorat thee.
28do saal guzar gaay, phir bhee abeesloom ko baadshaah say milnay kee ijaazat na milee. 29phir us nay yoaab ko ittila bhejee ki vah us kee sifaarish karay. lekin yoaab nay aanay say inkaar kiya. abeesloom nay usay dubaara bulaanay kee koshish kee, lekin is baar bhee yoaab us kay paas na aaya. 30tab abeesloom nay apnay naukron ko hukm diya, “dekho, yoaab ka khet meray khet say mulhiq hai, aur us men jau kee fasal pak rahee hai. jaao, usay aag laga do!” naukar gaay aur aisa hee kiya.
31jab khet men aag lag gaee to yoaab bhaag kar abeesloom kay paas aaya aur shikaayat kee, “aap kay naukron nay meray khet ko aag kyoon lagaaee hai?” 32abeesloom nay javaab diya, “dekhen, aap naheen aaay jab main nay aap ko bulaaya. kyoonki main chaahata hoon ki aap baadshaah kay paas ja kar un say poochhen ki mujhay jasoor say kyoon laaya gaya. behatar hota ki main vaheen raheta. ab baadshaah mujh say milen ya agar vah ab tak mujhay qusoorvaar thaheraatay hain to mujhay saza-ay-maut den.”
33yoaab nay baadshaah kay paas ja kar usay yah paighaam pahunchaaya. phir daaood nay apnay betay ko bulaaya. abeesloom andar aaya aur baadshaah kay saamnay aundhay munh jhuk gaya. phir baadshaah nay abeesloom ko bosa diya.