2 Samooel 15

abeesloom kee saazish

¹kuchh der kay baad abeesloom nay rath aur ghoday khareeday aur saath saath 50 muhaafiz bhee rakhay jo us kay aagay aagay dauden. ²rozaana vah subah-saveray uth kar shaher kay darvaazay par jaata. jab kabhee koee shakhs is maqsad say shaher men daakhil hota ki baadshaah us kay kisee muqaddmay ka faisla karay to abeesloom us say mukhaatib ho kar poochhta, “aap kis shaher say hain?” agar vah javaab deta, “main israaeel kay fulaan qabeelay say hoon,” ³to abeesloom kaheta, “beshak aap is muqaddmay ko jeet saktay hain, lekin afsos! baadshaah ka koee bhee banda is par saheeh dhyaan naheen dega.” ⁴phir vah baat jaaree rakhta, “kaash main hee mulk par aala qaazee muqarrar kiya gaya hota! phir sab log apnay muqaddmay mujhay pesh kar saktay aur main un ka saheeh insaaf kar deta.” ⁵aur agar koee qareeb a kar abeesloom kay saamnay jhuknay lagta to vah usay rok kar us ko galay lagaata aur bosa deta. ⁶yah us ka un tamaam israaeeliyon kay saath sulook tha jo apnay muqaddmay baadshaah ko pesh karnay kay liyay aatay thay. yoon us nay israaeeliyon kay dilon ko apnee taraf maail kar liya.

⁷yah silsila chaar saal jaaree raha. ek din abeesloom nay daaood say baat kee, “mujhay habroon jaanay kee ijaazat deejiay, kyoonki main nay rabb say aisee mannat maanee hai jis kay liyay zarooree hai ki habroon jaaoon. ⁸kyoonki jab main jasoor men tha to main nay qasam kha kar vaada kiya tha, ‘ai rabb, agar too mujhay yarooshalam vaapas laaay to main habroon men teree parastish karoonga’.” ⁹baadshaah nay javaab diya, “theek hai. salaamatee say jaaen.”

¹⁰lekin habroon pahunch kar abeesloom nay khufiya taur par apnay qaasidon ko israaeel kay tamaam qabaailee ilaaqon men bhej diya. jahaan bhee vah gaay unhon nay elaan kiya, “joon hee narsingay kee aavaaz sunaaee day aap sab ko kahena hai, ‘abeesloom habroon men baadshaah ban gaya hai’!” ¹¹abeesloom kay saath 200 mehamaan yarooshalam say habroon aaay thay. vah belaus thay, aur unhen is kay baaray men ilm hee na tha.

¹²jab habroon men qurbaaniyaan chadhaaee ja rahee theen to abeesloom nay daaood kay ek musheer ko bulaaya jo jiloh ka rahenay vaala tha. us ka naam akheetufal jilonee tha. vah aaya aur abeesloom kay saath mil gaya. yoon abeesloom kay pairokaaron men izaafa hota gaya aur us kee saazishen zor pakadnay lageen.

daaood yarooshalam say hijrat karta hai

¹³ek qaasid nay daaood kay paas pahunch kar usay ittila dee, “abeesloom aap kay khilaaf uth khada hua hai, aur tamaam israaeel us kay peechhay lag gaya hai.” ¹⁴daaood nay apnay mulaazimon say kaha, “aao, ham fauran hijrat karen, varna abeesloom kay qabzay men a jaaengay. jaldee karen taaki ham fauran ravaana ho saken, kyoonki vah koshish karega ki jitnee jaldee ho sakay yahaan pahunchay. agar ham us vaqt shaher say niklay na hon to vah ham par aafat la kar shaher kay baashindon ko maar daalega.” ¹⁵baadshaah kay mulaazimon nay javaab diya, “jo bhee faisla hamaaray aaqa aur baadshaah karen ham haazir hain.”

¹⁶baadshaah apnay pooray khaandaan kay saath ravaana hua. sirf das daashtaaen mahel ko sambhaalnay kay liyay peechhay rah gaeen. ¹⁷jab daaood apnay tamaam logon kay saath shaher kay aakhiree ghar tak pahuncha to vah ruk gaya. ¹⁸us nay apnay tamaam pairokaaron ko aagay nikalnay diya, pahelay shaahee dastay karetee-o-faletee ko, phir un 600 jaatee aadmiyon ko jo us kay saath jaat say yahaan aaay thay aur aakhir men baaqee tamaam logon ko. ¹⁹jab filistee shaher jaat ka aadmee ittee daaood kay saamnay say guzarnay laga to baadshaah us say mukhaatib hua, “aap hamaaray saath kyoon jaaen? naheen, vaapas chalay jaaen aur naay baadshaah kay saath rahen. aap to ghairmulkee hain aur is liyay israaeel men rahetay hain ki aap ko jilaavatan kar diya gaya hai. ²⁰aap ko yahaan aaay thodee der huee hai, to kya munaasib hai ki aap ko dubaara meree vajah say kabhee idhar kabhee idhar ghoomna paday? kya pata hai ki mujhay kahaan kahaan jaana paday. is liyay vaapas chalay jaaen, aur apnay hamvatanon ko bhee apnay saath lay jaaen. rabb aap par apnee meharbaanee aur vafaadaaree ka izhaar karay.”

²¹lekin ittee nay etiraaz kiya, “meray aaqa, rabb aur baadshaah kee hayaat kee qasam, main aap ko kabhee naheen chhod sakta, khwaah mujhay apnee jaan bhee qurbaan karnee paday.” ²²tab daaood maan gaya. “chalo, phir aagay niklen!” chunaanchay ittee apnay logon aur un kay khaandaanon kay saath aagay nikla. ²³aakhir men daaood nay vaadee-ay-qidron ko paar karkay registaan kee taraf rukh kiya. gird-o-navaah kay tamaam log baadshaah ko us kay pairokaaron samet ravaana hotay huay dekh kar phoot phoot kar ronay lagay.

²⁴sadoq imaam aur tamaam laavee bhee daaood kay saath shaher say nikal aaay thay. laavee ahd ka sandooq uthaaay chal rahay thay. ab unhon nay usay shaher say baahar zameen par rakh diya, aur abiyaatar vahaan qurbaaniyaan chadhaanay laga. logon kay shaher say nikalnay kay pooray arsay kay dauraan vah qurbaaniyaan chadhaata raha. ²⁵phir daaood sadoq say mukhaatib hua, “allaah ka sandooq shaher men vaapas lay jaaen. agar rabb kee nazar-ay-karam mujh par huee to vah kisee din mujhay shaher men vaapas la kar ahd kay sandooq aur us kee sukoonatgaah ko dubaara dekhnay kee ijaazat dega. ²⁶lekin agar vah farmaaay ki too mujhay pasand naheen hai, to main yah bhee bardaasht karnay kay liyay tayyaar hoon. vah meray saath vah kuchh karay jo usay munaasib lagay.

²⁷jahaan tak aap ka taalluq hai, apnay betay akheemaaz ko saath lay kar saheeh-salaamat shaher men vaapas chalay jaaen. abiyaatar aur us ka beta yoontan bhee saath jaaen. ²⁸main khud registaan men darya-ay-yardan kee us jagah ruk jaaoonga jahaan ham aasaanee say darya ko paar kar sakengay. vahaan aap mujhay yarooshalam kay haalaat kay baaray men paighaam bhej saktay hain. main aap kay intizaar men rahoonga.”

²⁹chunaanchay sadoq aur abiyaatar ahd ka sandooq shaher men vaapas lay ja kar vaheen rahay. ³⁰daaood rotay rotay zaitoon kay pahaad par chadhnay laga. us ka sar dhaampa hua tha, aur vah nangay paaon chal raha tha. baaqee sab kay sar bhee dhaampay huay thay, sab rotay rotay chadhnay lagay. ³¹raastay men daaood ko ittila dee gaee, “akheetufal bhee abeesloom kay saath mil gaya hai.” yah sun kar daaood nay dua kee, “ai rabb, bakhsh day ki akheetufal kay mashvray naakaam ho jaaen.”

³²chaltay chaltay daaood pahaad kee chotee par pahunch gaya jahaan allaah kee parastish kee jaatee thee. vahaan hoosee arkee us say milnay aaya. us kay kapday phatay huay thay, aur sar par khaak thee. ³³daaood nay us say kaha, “agar aap meray saath jaaen to aap sirf bojh ka baais banengay. ³⁴behatar hai ki aap laut kar shaher men jaaen aur abeesloom say kahen, ‘ai baadshaah, main aap kee khidmat men haazir hoon. pahelay main aap kay baap kee khidmat karta tha, aur ab aap hee kee khidmat karoonga.’ agar aap aisa karen to aap akheetufal kay mashvray naakaam banaanay men meree badee madad karengay. ^35-36 aap akelay naheen hongay. donon imaam sadoq aur abiyaatar bhee yarooshalam men peechhay rah gaay hain. darbaar men jo bhee mansoobay baandhay jaaengay vah unhen bataaen. sadoq ka beta akheemaaz aur abiyaatar ka beta yoontan mujhay har khabar pahunchaaengay, kyoonki vah bhee shaher men thaheray huay hain.”

³⁷tab daaood ka dost hoosee vaapas chala gaya. vah us vaqt pahunch gaya jab abeesloom yarooshalam men daakhil ho raha tha.