2 Samooel 2

daaood yahoodaah ka baadshaah ban jaata hai

¹is kay baad daaood nay rabb say darayaaft kiya, “kya main yahoodaah kay kisee shaher men vaapas chala jaaoon?” rabb nay javaab diya, “haan, vaapas ja.” daaood nay savaal kiya, “main kis shaher men jaaoon?” rabb nay javaab diya, “habroon men.” ²chunaanchay daaood apnee do beeviyon akheenooam yazraelee aur naabaal kee beva abeejel karmilee kay saath habroon men ja basa.

³daaood nay apnay aadmiyon ko bhee un kay khaandaanon samet habroon aur gird-o-navaah kee aabaadiyon men muntaqil kar diya. ⁴ek din yahoodaah kay aadmee habroon men aaay aur daaood ko masah karkay apna baadshaah bana liya.

jab daaood ko khabar mil gaee ki yabees-jiliaad kay mardon nay saaool ko dafna diya hai ⁵to us nay unhen paighaam bheja, “rabb aap ko is kay liyay barkat day ki aap nay apnay maalik saaool ko dafan karkay us par meharbaanee kee hai. ⁶javaab men rabb aap par apnee meharbaanee aur vafaadaaree ka izhaar karay. main bhee is nek amal ka ajr doonga. ⁷ab mazboot aur diler hon. aap ka aaqa saaool to faut hua hai, lekin yahoodaah kay qabeelay nay mujhay us kee jagah chun liya hai.”

ishbosat israaeel ka baadshaah ban jaata hai

⁸itnay men saaool kee fauj kay kamaandar abinair bin nair nay saaool kay betay ishbosat ko mahenaaim shaher men lay ja kar ⁹baadshaah muqarrar kar diya. jiliaad, yazrael, aashar, ifraaeem, binyameen aur tamaam israaeel us kay qabzay men rahay. ¹⁰sirf yahoodaah ka qabeela daaood kay saath raha. ishbosat 40 saal kee umr men baadshaah bana, aur us kee hukoomat do saal qaaim rahee. ¹¹daaood habroon men yahoodaah par saadhay saat saal hukoomat karta raha.

israaeel aur yahoodaah kay darmiyaan jang

¹²ek din abinair ishbosat bin saaool kay mulaazimon kay saath mahenaaim say nikal kar jibaoon aaya. ¹³yah dekh kar daaood kee fauj yoaab bin zarooyaah kee raahanumaaee men un say ladnay kay liyay niklee. donon faujon kee mulaaqaat jibaoon kay taalaab par huee. abinair kee fauj taalaab kee urlee taraf ruk gaee aur yoaab kee fauj parlee taraf. ¹⁴abinair nay yoaab say kaha, “aao, hamaaray chand javaan hamaaray saamnay ek doosray ka muqaabla karen.” yoaab bola, “theek hai.” ¹⁵chunaanchay har fauj nay baarah javaanon ko chun kar muqaablay kay liyay pesh kiya. ishbosat aur binyameen kay qabeelay kay baarah javaan daaood kay baarah javaanon kay muqaablay men khaday ho gaay. ¹⁶jab muqaabla shuroo hua to har ek nay ek haath say apnay mukhaalif kay baalon ko pakad kar doosray haath say apnee talvaar us kay pet men ghomp dee. sab kay sab ek saath mar gaay. baad men jibaoon kee is jagah ka naam khilqat-hazzooreem pad gaya.

¹⁷phir donon faujon kay darmiyaan nihaayat sakht ladaaee chhid gaee. ladtay ladtay abinair aur us kay mard haar gaay. ¹⁸yoaab kay do bhaaee abeeshai aur asaahel bhee ladaaee men hissa lay rahay thay. asaahel ghazaal kee tarah tez daud sakta tha. ¹⁹jab abinair shikast kha kar bhaagnay laga to asaahel seedha us kay peechhay pad gaya aur na daaeen, na baaeen taraf hata. ²⁰abinair nay peechhay dekh kar poochha, “kya aap hee hain, asaahel?” us nay javaab diya, “jee, main hee hoon.” ²¹abinair bola, “daaeen ya baaeen taraf hat kar kisee aur ko pakden! javaanon men say kisee say lad kar us kay hathiyaar aur ziraabaktar utaaren.”

lekin asaahel us ka taaqqub karnay say baaz na aaya. ²²abinair nay usay aagaah kiya, “khabardaar. meray peechhay say hat jaaen, varna aap ko maar denay par majboor ho jaaoonga. phir aap kay bhaaee yoaab ko kis tarah munh dikhaaoonga?” ²³to bhee asaahel nay peechha na chhoda. yah dekh kar abinair nay apnay nezay ka dasta itnay zor say us kay pet men ghomp diya ki us ka sira doosree taraf nikal gaya. asaahel vaheen gir kar jaan-ba-haq ho gaya. jis nay bhee vahaan say guzar kar yah dekha vah vaheen ruk gaya.

²⁴lekin yoaab aur abeeshai abinair ka taaqqub kartay rahay. jab sooraj ghuroob honay laga to vah ek pahaadee kay paas pahunch gaay jis ka naam amma tha. yah jiyaah kay muqaabil us raastay kay paas hai jo musaafir ko jibaoon say registaan men pahunchaata hai. ²⁵binyameen kay qabeelay kay log vahaan pahaadee par abinair kay peechhay jama ho kar dubaara ladnay kay liyay tayyaar ho gaay. ²⁶abinair nay yoaab ko aavaaz dee, “kya yah zarooree hai ki ham hamesha tak ek doosray ko maut kay ghaat utaartay jaaen? kya aap ko samajh naheen aaee ki aisee harkaten sirf talkhee paida kartee hain? aap kab apnay mardon ko hukm dengay ki vah apnay israaeelee bhaaiyon ka taaqqub karnay say baaz aaen?”

²⁷yoaab nay javaab diya, “rabb kee hayaat kee qasam, agar aap ladnay ka hukm na detay to meray log aaj subah hee apnay bhaaiyon ka taaqqub karnay say baaz a jaatay.” ²⁸us nay narsinga baja diya, aur us kay aadmee ruk kar doosron ka taaqqub karnay say baaz aaay. yoon ladaaee khatm ho gaee.

²⁹us pooree raat kay dauraan abinair aur us kay aadmee chaltay gaay. darya-ay-yardan kee vaadee men say guzar kar unhon nay darya ko paar kiya aur phir gaheree ghaatee men say ho kar mahenaaim pahunch gaay.

³⁰yoaab bhee abinair aur us kay logon ko chhod kar vaapas chala gaya. jab us nay apnay aadmiyon ko jama karkay gina to maaloom hua ki asaahel kay ilaava daaood kay 19 aadmee maaray gaay hain. ³¹is kay muqaablay men abinair kay 360 aadmee halaak huay thay. sab binyameen kay qabeelay kay thay. ³²yoaab aur us kay saathiyon nay asaahel kee laash utha kar usay bait-lahem men us kay baap kee qabr men dafan kiya. phir usee raat apna safar jaaree rakh kar vah pau phattay vaqt habroon pahunch gaay.