2 Samooel 20

saba daaood kay khilaaf uth khada hota hai

¹jhagadnay vaalon men say ek badam’aash tha jis ka naam saba bin bikree tha. vah binymeenee tha. ab us nay narsinga baja kar elaan kiya, “na hamen daaood say meeraas men kuchh milega, na yassee kay betay say kuchh milnay kee ummeed hai. ai israaeel, har ek apnay ghar vaapas chala jaaay!” ²tab tamaam israaeelee daaood ko chhod kar saba bin bikree kay peechhay lag gaay. sirf yahoodaah kay mard apnay baadshaah kay saath liptay rahay aur usay yardan say lay kar yarooshalam tak pahunchaaya.

³jab daaood apnay mahel men daakhil hua to us nay un das daashtaaon ka band-o-bast karaaya jin ko us nay mahel ko sambhaalnay kay liyay peechhay chhod diya tha. vah unhen ek khaas ghar men alag rakh kar un kee tamaam zarooriyaat pooree karta raha lekin un say kabhee hambistar na hua. vah kaheen ja na sakeen, aur unhen zindagee kay aakhiree lamhay tak beva kee see zindagee guzaarnee padee.

⁴phir daaood nay amaasa ko hukm diya, “yahoodaah kay tamaam faujiyon ko meray paas bula laaen. teen din kay andar andar un kay saath haazir ho jaaen.” ⁵amaasa ravaana hua. lekin jab teen din kay baad laut na aayaa ⁶to daaood abeeshai say mukhaatib hua, “aakhir men saba bin bikree hamen abeesloom kee nisbat ziyaada nuqsaan pahunchaaega. jaldee karen, meray daston ko lay kar us ka taaqqub karen. aisa na ho ki vah qil’aaband shaheron ko qabzay men lay lay aur yoon hamaara bada nuqsaan ho jaaay.” ⁷tab yoaab kay sipaahee, baadshaah ka dasta karetee-o-faletee aur tamaam maahir faujee yarooshalam say nikal kar saba bin bikree ka taaqqub karnay lagay.

⁸jab vah jibaoon kee badee chataan kay paas pahunchay to un kee mulaaqaat amaasa say huee jo thodee der pahelay vahaan pahunch gaya tha. yoaab apna faujee libaas pahenay huay tha, aur us par us nay kamar men apnee talvaar kee petee baandhee huee thee. ab jab vah amaasa say milnay gaya to us nay apnay baaen haath say talvaar ko choree choree miyaan say nikaal liya. ⁹us nay salaam karkay kaha, “bhaaee, kya sab theek hai?” aur phir apnay dahenay haath say amaasa kee daadhee ko yoon pakad liya jaisay usay bosa dena chaahata ho. ¹⁰amaasa nay yoaab kay doosray haath men talvaar par dhyaan na diya, aur achaanak yoaab nay usay itnay zor say pet men ghomp diya ki us kee antadiyaan phoot kar zameen par gir gaeen. talvaar ko dubaara istemaal karnay kee zaroorat hee naheen thee, kyoonki amaasa fauran mar gaya.

phir yoaab aur abeeshai saba ka taaqqub karnay kay liyay aagay badhay. ¹¹yoaab ka ek faujee amaasa kee laash kay paas khada raha aur guzarnay vaalay faujiyon ko aavaaz deta raha, “jo yoaab aur daaood kay saath hai vah yoaab kay peechhay ho lay!” ¹²lekin jitnay vahaan say guzray vah amaasa ka khoon’aalooda aur tadapta hua jism dekh kar ruk gaay. jab aadmee nay dekha ki laash rukaavat ka baais ban gaee hai to us nay usay raastay say hata kar khet men ghaseet liya aur us par kapda daal diya. ¹³laash kay ghaaib ho jaanay par sab log yoaab kay peechhay chalay gaay aur saba ka taaqqub karnay lagay.

¹⁴itnay men saba pooray israaeel say guzartay guzartay shimaal kay shaher abeel-bait-maaka tak pahunch gaya tha. bikree kay khaandaan kay tamaam mard bhee us kay peechhay lag kar vahaan pahunch gaay thay. ¹⁵tab yoaab aur us kay faujee vahaan pahunch kar shaher ka muhaasara karnay lagay. unhon nay shaher kee baahar vaalee deevaar kay saath saath mittee ka bada toda lagaaya aur us par say guzar kar andar vaalee badee deevaar tak pahunch gaay. vahaan vah deevaar kee tod phod karnay lagay taaki vah gir jaaay.

¹⁶tab shaher kee ek daanishmand aurat nay faseel say yoaab kay logon ko aavaaz dee, “sunen! yoaab ko yahaan bula len taaki main us say baat kar sakoon.” ¹⁷jab yoaab deevaar kay paas aaya to aurat nay savaal kiya, “kya aap yoaab hain?” yoaab nay javaab diya, “main hee hoon.” aurat nay darakhwaast kee, “zara meree baaton par dhyaan den.” yoaab bola, “theek hai, main sun raha hoon.” ¹⁸phir aurat nay apnee baat pesh kee, “puraanay zamaanay men kaha jaata tha ki abeel shaher say mashvra lo to baat banegee. ¹⁹dekhen, hamaara shaher israaeel ka sab say ziyaada amnapasand aur vafaadaar shaher hai. aap ek aisa shaher tabaah karnay kee koshish kar rahay hain jo ‘israaeel kee maan’ kahelaata hai. aap rabb kee meeraas ko kyoon hadap kar lena chaahatay hain?”

²⁰yoaab nay javaab diya, “allaah na karay ki main aap kay shaher ko hadap ya tabaah karoon. ²¹mera aanay ka ek aur maqsad hai. ifraaeem kay pahaadee ilaaqay ka ek aadmee daaood baadshaah kay khilaaf uth khada hua hai jis ka naam saba bin bikree hai. usay dhoond rahay hain. usay hamaaray havaalay karen to ham shaher ko chhod kar chalay jaaengay.”

aurat nay kaha, “theek hai, ham deevaar par say us ka sar aap kay paas phaink dengay.” ²²us nay abeel-bait-maaka kay baashindon say baat kee aur apnee hikmat say unhen qaail kiya ki aisa hee karna chaahiay. unhon nay saba ka sar qalam karkay yoaab kay paas phaink diya. tab yoaab nay narsinga baja kar shaher ko chhodnay ka hukm diya, aur tamaam faujee apnay apnay ghar vaapas chalay gaay. yoaab khud yarooshalam men daaood baadshaah kay paas laut gaya.

daaood kay aala afsar

²³yoaab pooree israaeelee fauj par, binaayaah bin yahoyada shaahee dastay karetee-o-faletee par ²⁴aur adoraam begaariyon par muqarrar tha. yahoosafat bin akheelood baadshaah ka musheer-ay-khaas tha. ²⁵siva meeramunshee tha aur sadoq aur abiyaatar imaam thay. ²⁶eera yaaeeree daaood ka zaatee imaam tha.