Ḵẖurooj 21

¹israaeeliyon ko yah ahkaam bata,

ibraanee ghulaam kay huqooq

²‘agar too ibraanee ghulaam khareeday to vah chhah saal tera ghulaam rahay. is kay baad laazim hai ki usay aazaad kar diya jaaay. aazaad honay kay liyay usay paisay denay kee zaroorat naheen hogee.

³agar ghulaam ghairshaadeeshuda haalat men maalik kay ghar aaya ho to vah aazaad ho kar akela hee chala jaaay. agar vah shaadeeshuda haalat men aaya ho to laazim hai ki vah apnee beevee samet aazaad ho kar jaaay. ⁴agar maalik nay ghulaam kee shaadee karaaee aur bachchay paida huay hain to us kee beevee aur bachchay maalik kee milkiyat hongay. chhah saal kay baad jab ghulaam aazaad ho kar jaaay to us kee beevee aur bachchay maalik hee kay paas rahen.

⁵agar ghulaam kahay, “main apnay maalik aur apnay beevee bachchon say muhabbat rakhta hoon, main aazaad naheen hona chaahata” ⁶to ghulaam ka maalik usay allaah kay saamnay laaay. vah usay darvaazay ya us kee chaukhat kay paas lay jaaay aur sutaalee yaanee tez auzaar say us kay kaan kee lau chhed day. tab vah zindagee bhar us ka ghulaam bana rahega.

⁷agar koee apnee betee ko ghulaamee men bech daalay to us kay liyay aazaadee milnay kee sharaait mard say farq hain. ⁸agar us kay maalik nay usay muntakhab kiya ki vah us kee beevee ban jaaay, lekin baad men vah usay pasand na aaay to laazim hai ki vah munaasib muaavaza lay kar usay us kay rishtedaaron ko vaapas kar day. usay aurat ko ghairmulkiyon kay haath bechanay ka ikhtiyaar naheen hai, kyoonki us nay us kay saath bevafa sulook kiya hai.

⁹agar laundee ka maalik us kee apnay betay kay saath shaadee karaaay to aurat ko betee kay huqooq haasil hongay.

¹⁰agar maalik nay us say shaadee karkay baad men doosree aurat say bhee shaadee kee to laazim hai ki vah pahelee ko bhee khaana aur kapday deta rahay. is kay ilaava us kay saath hambistar honay ka farz bhee ada karna hai. ¹¹agar vah yah teen faraaiz ada na karay to usay aurat ko aazaad karna padega. is soorat men usay muft aazaad karna hoga.

zakhmee karnay kee sazaa

¹²jo kisee ko jaan-boojh kar itna sakht maarta ho ki vah mar jaaay to usay zaroor saza-ay-maut dena hai. ¹³lekin agar us nay usay jaan-boojh kar na maara balki yah ittifaaq say hua aur allaah nay yah honay diya, to maarnay vaala ek aisee jagah panaah lay sakta hai jo main muqarrar karoonga. vahaan usay qatl kiay jaanay kee ijaazat naheen hogee. ¹⁴lekin jo deeda-daanista aur chaalaakee say kisee ko maar daalta hai usay meree qurbaangaah say bhee chheen kar saza-ay-maut dena hai.

¹⁵jo apnay baap ya apnee maan ko maarta peetta hai usay saza-ay-maut dee jaaay.

¹⁶jis nay kisee ko aghva kar liya hai usay saza-ay-maut dee jaaay, chaahay vah usay ghulaam bana kar bech chuka ho ya usay ab tak apnay paas rakha hua ho.

¹⁷jo apnay baap ya maan par laanat karay usay saza-ay-maut dee jaaay.

¹⁸ho sakta hai ki aadmee jhagden aur ek shakhs doosray ko patthar ya mukkay say itna zakhmee kar day ki go vah bach jaaay vah bistar say uth na sakta ho. ¹⁹agar baad men mareez yahaan tak shifa paaay ki dubaara uth kar laathee kay sahaaray chal phir sakay to chot pahunchaanay vaalay ko saza naheen milegee. usay sirf us vaqt kay liyay muaavaza dena padega jab tak mareez paisay na kama sakay. saath hee usay us ka poora ilaaj karvaana hai.

²⁰jo apnay ghulaam ya laundee ko laathee say yoon maaray ki vah mar jaaay usay saza dee jaaay. ²¹lekin agar ghulaam ya laundee pitaaee kay baad ek ya do din zinda rahay to maalik ko saza na dee jaaay. kyoonki jo raqam us nay us kay liyay dee thee us ka nuqsaan usay khud uthaana padega.

²²ho sakta hai ki log aapas men lad rahay hon aur ladtay ladtay kisee haamila aurat say yoon takra jaaen ki us ka bachcha zaaay ho jaaay. agar koee aur nuqsaan na hua ho to zarb pahunchaanay vaalay ko jurmaana dena padega. aurat ka shauhar yah jurmaana muqarrar karay, aur adaalat men is kee tasdeeq ho.

²³lekin agar us aurat ko aur nuqsaan bhee pahuncha ho to phir zarb pahunchaanay vaalay ko is usool kay mutaabiq saza dee jaaay ki jaan kay badlay jaan, ²⁴aankh kay badlay aankh, daant kay badlay daant, haath kay badlay haath, paaon kay badlay paaon, ²⁵jalnay kay zakhm kay badlay jalnay ka zakhm, maar kay badlay maar, kaat kay badlay kaat.

²⁶agar koee maalik apnay ghulaam kee aankh par yoon maaray ki vah zaaay ho jaaay to usay ghulaam ko aankh kay badlay aazaad karna padega, chaahay ghulaam mard ho ya aurat. ²⁷agar maalik kay peetnay say ghulaam ka daant toot jaaay to usay ghulaam ko daant kay badlay aazaad karna padega, chaahay ghulaam mard ho ya aurat.

nuqsaan ka muaavazaa

²⁸agar koee bail kisee mard ya aurat ko aisa maaray ki vah mar jaaay to us bail ko sangasaar kiya jaaay. us ka gosht khaanay kee ijaazat naheen hai. is soorat men bail kay maalik ko saza na dee jaaay. ²⁹lekin ho sakta hai ki maalik ko pahelay aagaah kiya gaya tha ki bail logon ko maarta hai, to bhee us nay bail ko khula chhoda tha jis kay nateejay men us nay kisee ko maar daala. aisee soorat men na sirf bail ko balki us kay maalik ko bhee sangasaar karna hai. ³⁰lekin agar faisla kiya jaaay ki vah apnee jaan ka fidya day to jitna muaavaza bhee muqarrar kiya jaaay usay dena padega.

³¹saza men koee farq naheen hai, chaahay betay ko maara jaaay ya betee ko. ³²lekin agar bail kisee ghulaam ya laundee ko maar day to us ka maalik ghulaam kay maalik ko chaandee kay 30 sikkay day aur bail ko sangasaar kiya jaaay.

³³ho sakta hai ki kisee nay apnay hauz ko khula rahenay diya ya hauz banaanay kay liyay gadha khod kar usay khula rahenay diya aur koee bail ya gadha us men gir kar mar gaya. ³⁴aisee soorat men hauz ka maalik murda jaanvar kay liyay paisay day. vah jaanvar kay maalik ko us kee pooree qeemat ada karay aur murda jaanvar khud lay lay.

³⁵agar kisee ka bail kisee doosray kay bail ko aisay maaray ki vah mar jaaay to donon maalik zinda bail ko bech kar us kay paisay aapas men baraabar baant len. isee tarah vah murda bail ko bhee baraabar taqseem karen. ³⁶lekin ho sakta hai ki maalik ko maaloom tha ki mera bail doosray jaanvaron par hamla karta hai, is kay baavujood us nay usay aazaad chhod diya tha. aisee soorat men usay murda bail kay ivz us kay maalik ko naya bail dena padega, aur vah murda bail khud lay lay.