Paidaaish 3

gunaah ka aaghaaz

¹saamp zameen par chalnay phirnay vaalay un tamaam jaanvaron say ziyaada chaalaak tha jin ko rabb khuda nay banaaya tha. us nay aurat say poochha, “kya allaah nay vaaqaee kaha ki baagh kay kisee bhee darakht ka phal na khaana?” ²aurat nay javaab diya, “hargiz naheen. ham baagh ka har phal kha saktay hain, ³sirf us darakht kay phal say gurez karna hai jo baagh kay beech men hai. allaah nay kaha ki us ka phal na khaao balki usay chhoona bhee naheen, varna tum yaqeenan mar jaaogay.” ⁴saamp nay aurat say kaha, “tum hargiz na marogay, ⁵balki allaah jaanta hai ki jab tum us ka phal khaaogay to tumhaaree aankhen khul jaaengee aur tum allaah kee maanind ho jaaogay, tum jo bhee achchha aur bura hai usay jaan logay.”

⁶aurat nay darakht par ghaur kiya ki khaanay kay liyay achchha aur dekhnay men bhee dilkash hai. sab say dilfareb baat yah ki us say samajh haasil ho saktee hai! yah soch kar us nay us ka phal lay kar usay khaaya. phir us nay apnay shauhar ko bhee day diya, kyoonki vah us kay saath tha. us nay bhee kha liya. ⁷lekin khaatay hee un kee aankhen khul gaeen aur un ko maaloom hua ki ham nangay hain. chunaanchay unhon nay anjeer kay pattay see kar lungiyaan bana leen.

⁸shaam kay vaqt jab thandee hava chalnay lagee to unhon nay rabb khuda ko baagh men chaltay phirtay suna. vah dar kay maaray darakhton kay peechhay chhup gaay. ⁹rabb khuda nay pukaar kar kaha, “aadam, too kahaan hai?” ¹⁰aadam nay javaab diya, “main nay tujhay baagh men chaltay huay suna to dar gaya, kyoonki main nanga hoon. is liyay main chhup gaya.” ¹¹us nay poochha, “kis nay tujhay bataaya ki too nanga hai? kya too nay us darakht ka phal khaaya hai jisay khaanay say main nay mana kiya tha?” ¹²aadam nay kaha, “jo aurat too nay meray saath rahenay kay liyay dee hai us nay mujhay phal diya. is liyay main nay kha liya.” ¹³ab rabb khuda aurat say mukhaatib hua, “too nay yah kyoon kiya?” aurat nay javaab diya, “saamp nay mujhay bahekaaya to main nay khaaya.”

¹⁴rabb khuda nay saamp say kaha, “choonki too nay yah kiya, is liyay too tamaam maveshiyon aur janglee jaanvaron men laantee hai. too umr bhar pet kay bal rengega aur khaak chaatega. ¹⁵main teray aur aurat kay darmiyaan dushmanee paida karoonga. us kee aulaad teree aulaad kee dushman hogee. vah teray sar ko kuchal daalegee jabki too us kee edee par kaatega.”

¹⁶phir rabb khuda aurat say mukhaatib hua aur kaha, “jab too ummeed say hogee to main teree takleef ko bahut badhaaoonga. jab teray bachchay hongay to too shadeed dard ka shikaar hogee. too apnay shauhar kee tamanna karegee lekin vah tujh par hukoomat karega.” ¹⁷aadam say us nay kaha, “too nay apnee beevee kee baat maanee aur us darakht ka phal khaaya jisay khaanay say main nay mana kiya tha. is liyay teray sabab say zameen par laanat hai. us say khuraak haasil karnay kay liyay tujhay umr bhar mehanat-mashaqqat karnee padegee. ¹⁸teray liyay vah khaardaar pauday aur oontkataaray paida karegee, haalaanki too us say apnee khuraak bhee haasil karega. ¹⁹paseena baha baha kar tujhay rotee kamaanay kay liyay bhaag-daud karnee padegee. aur yah silsila maut tak jaaree rahega. too mehanat kartay kartay dubaara zameen men laut jaaega, kyoonki too usee say liya gaya hai. too khaak hai aur dubaara khaak men mil jaaega.”

²⁰aadam nay apnee beevee ka naam havva yaanee zindagee rakha, kyoonki baad men vah tamaam zindon kee maan ban gaee. ²¹rabb khuda nay aadam aur us kee beevee kay liyay khaalon say libaas bana kar unhen pahenaaya. ²²us nay kaha, “insaan hamaaree maanind ho gaya hai, vah achchhay aur buray ka ilm rakhta hai. ab aisa na ho ki vah haath badha kar zindagee bakhshnay vaalay darakht kay phal say lay aur us say kha kar hamesha tak zinda rahay.” ²³is liyay rabb khuda nay usay baagh-ay-adan say nikaal kar us zameen kee kheteebaadee karnay kee zimmaadaaree dee jis men say usay liya gaya tha. ²⁴insaan ko khaarij karnay kay baad us nay baagh-ay-adan kay mashriq men karoobee farishtay khaday kiay aur saath saath ek aatishee talvaar rakhee jo idhar udhar ghoomtee thee taaki us raastay kee hifaazat karay jo zindagee bakhshnay vaalay darakht tak pahunchaata tha.