Yashaayaah 37
rabb hizaqiyaah ko tasallee deta hai
1yah baaten sun kar hizaqiyaah nay apnay kapday phaaday aur taat ka maatmee libaas pahen kar rabb kay ghar men gaya. 2saath saath us nay mahel kay inchaarj iliyaaqeem, meeramunshee shabnaah aur imaamon kay buzurgon ko aamoos kay betay yasaayaah nabee kay paas bheja. sab taat kay maatmee libaas pahenay huay thay. 3nabee kay paas pahunch kar unhon nay hizaqiyaah ka paighaam sunaaya, “aaj ham badee museebat men hain. saza kay is din asooriyon nay hamaaree sakht beizzatee kee hai. hamaara haal dard-ay-zah men mubtala us aurat ka sa hai jis kay pet say bachcha nikalnay ko hai, lekin jo is liyay naheen nikal sakta ki maan kee taaqat jaatee rahee hai. 4lekin shaayad rabb aap kay khuda nay rabshaaqee kee vah baaten sunee hon jo us kay aaqa asoor kay baadshaah nay zinda khuda kee tauheen men bhejee hain. ho sakta hai rabb aap ka khuda us kee baaten sun kar usay saza day. baraah-ay-karam hamaaray liyay jo ab tak bachay huay hain dua karen.”
5jab hizaqiyaah kay afsaron nay yasaayaah ko baadshaah ka paighaam pahunchaayaa 6to nabee nay javaab diya, “apnay aaqa ko bata dena ki rabb farmaata hai, ‘un dhamkiyon say khauf mat kha jo asooree baadshaah kay mulaazimon nay meree ihaanat karkay dee hain. 7dekh, main us ka iraada badal doonga. vah afwaah sun kar itna muztarib ho jaaega ki apnay hee mulk ko vaapas chala jaaega. vahaan main usay talvaar say marva doonga’.”
sanherib kee dhamkiyaan aur hizaqiyaah kee duaa
8rabshaaqee yarooshalam ko chhod kar asoor kay baadshaah kay paas vaapas chala gaya jo us vaqt lakees say ravaana ho kar libna par chadhaaee kar raha tha.
9phir sanherib ko ittila milee, “ethopiya ka baadshaah tirhaaqa aap say ladnay a raha hai.” tab us nay apnay qaasidon ko dubaara yarooshalam bhej diya taaki hizaqiyaah ko paighaam pahunchaaen, 10“jis devta par tum bharosa rakhtay ho us say fareb na khaao jab vah kaheta hai ki yarooshalam asooree baadshaah kay qabzay men kabhee naheen aaega. 11tum to sun chukay ho ki asoor kay baadshaahon nay jahaan bhee gaay kya kuchh kiya hai. har mulk ko unhon nay mukammal taur par tabaah kar diya hai. to phir tum kis tarah bach jaaogay? 12kya jauzaan, haaraan aur rasaf kay devta un kee hifaazat kar paaay? kya mulk-ay-adan men tilassaar kay baashinday bach sakay? naheen, koee bhee devta un kee madad na kar saka jab meray baapdaada nay unhen tabaah kiya. 13dhyaan do, ab hamaat, arfaad, sifarvaaim shaher, hena aur ivva kay baadshaah kahaan hain?”
14khat milnay par hizaqiyaah nay usay padh liya aur phir rabb kay ghar kay sahen men gaya. khat ko rabb kay saamnay bichha kar 15us nay rabb say dua kee,
16“ai rabb-ul-afwaaj israaeel kay khuda jo karoobee farishton kay darmiyaan takhtnasheen hai, too akela hee duniya kay tamaam mamaalik ka khuda hai. too hee nay aasmaan-o-zameen ko khalaq kiya hai. 17ai rabb, meree sun! apnee aankhen khol kar dekh! sanherib kee un tamaam baaton par dhyaan day jo us nay is maqsad say ham tak pahunchaaee hain ki zinda khuda kee ihaanat karay. 18ai rabb, yah baat sachch hai ki asooree baadshaahon nay in tamaam qaumon ko un kay mulkon samet tabaah kar diya hai. 19vah to un kay buton ko aag men phaink kar bhasm kar saktay thay, kyoonki vah zinda naheen balki sirf insaan kay haathon say banay huay lakdee aur patthar kay but thay. 20ai rabb hamaaray khuda, ab main tujh say iltimaas karta hoon ki hamen asooree baadshaah kay haath say bacha taaki duniya kay tamaam mamaalik jaan len ki too ai rabb, vaahid khuda hai.”
asooree kee laan-taan par allaah ka javaab
21phir yasaayaah bin aamoos nay hizaqiyaah ko paighaam bheja, “rabb israaeel ka khuda farmaata hai ki main nay asooree baadshaah sanherib kay baaray men teree dua sunee hai. 22ab rabb ka us kay khilaaf farmaan sun,
kunvaaree siyyoon betee tujhay haqeer jaantee hai, haan yarooshalam betee apna sar hila hila kar hiqaarat’aamez nazar say teray peechhay dekhtee hai. 23kya too naheen jaanta ki kis ko gaaliyaan deen aur kis kee ihaanat kee hai? kya tujhay naheen maaloom ki too nay kis kay khilaaf aavaaz buland kee hai? jis kee taraf too gharoor kee nazar say dekh raha hai vah israaeel ka quddoos hai!
24apnay qaasidon kay zareeay too nay rabb kee ihaanat kee hai. too deengen maar kar kaheta hai, ‘main apnay beshumaar rathon say pahaadon kee chotiyon aur lubnaan kee intiha tak chadh gaya hoon. main deodaar kay baday baday aur jooneepar kay behtareen darakhton ko kaat kar lubnaan kee doortareen bulandiyon tak, us kay sab say ghanay jangal tak pahunch gaya hoon. 25main nay ghairmulkon men kuen khudva kar un ka paanee pee liya hai. meray talvon talay misr kee tamaam nadiyaan khushk ho gaeen.’
26ai asooree baadshaah, kya too nay naheen suna ki badee der say main nay yah sab kuchh muqarrar kiya? qadeem zamaanay men hee main nay is ka mansooba baandh liya, aur ab main isay vujood men laaya. meree marzee thee ki too qil’aaband shaheron ko khaak men mila kar patthar kay dheron men badal day. 27isee liyay un kay baashindon kee taaqat jaatee rahee, vah ghabraaay aur sharminda huay. vah ghaas kee tarah kamzor thay, chhat par ugnay vaalee us hariyaalee kee maanind jo thodee der kay liyay phaltee phooltee to hai, lekin loo chaltay vaqt ek dam murjha jaatee hai. 28main to tujh say khoob vaaqif hoon. mujhay maaloom hai ki too kahaan thahera hua hai, aur tera aana jaana mujh say posheeda naheen raheta. mujhay pata hai ki too meray khilaaf kitnay taish men a gaya hai. 29tera taish aur gharoor dekh kar main teree naak men nakel aur teray munh men lagaam daal kar tujhay us raastay par say vaapas ghaseet lay jaaoonga jis par say too yahaan a pahuncha hai.
30ai hizaqiyaah, main tujhay is nishaan say tasallee dilaaoonga ki is saal aur aanay vaalay saal tum vah kuchh khaaogay jo kheton men khud-ba-khud ugega. lekin teesray saal tum beej bo kar faslen kaatogay aur angoor kay baagh laga kar un ka phal khaaogay. 31yahoodaah kay bachay huay baashinday ek baar phir jad pakad kar phal laaengay. 32kyoonki yarooshalam say qaum ka baqiya nikal aaega, aur koh-ay-siyyoon ka bacha khacha hissa dubaara mulk men phail jaaega. rabb-ul-afwaaj kee ghairat yah kuchh sar’anjaam degee.
33jahaan tak asooree baadshaah ka taalluq hai rabb farmaata hai ki vah is shaher men daakhil naheen hoga. vah ek teer tak us men naheen chalaaega. na vah dhaal lay kar us par hamla karega, na shaher kee faseel kay saath mittee ka dher lagaaega. 34jis raastay say baadshaah yahaan aaya usee raastay par say vah apnay mulk vaapas chala jaaega. is shaher men vah ghusnay naheen paaega. yah rabb ka farmaan hai. 35kyoonki main apnee aur apnay khaadim daaood kee khaatir is shaher ka difa karkay usay bachaaoonga.”
36usee raat rabb ka farishta nikal aaya aur asooree lashkargaah men say guzar kar 1,85,000 faujiyon ko maar daala. jab log subah-saveray uthay to chaaron taraf laashen hee laashen nazar aaeen.
37yah dekh kar sanherib apnay khaimay ukhaad kar apnay mulk vaapas chala gaya. neenva shaher pahunch kar vah vahaan thaher gaya. 38ek din jab vah apnay devta nisrook kay mandir men pooja kar raha tha to us kay beton adrammalik aur sharaazar nay usay talvaar say qatl kar diya aur faraar ho kar mulk-ay-araaraat men panaah lee. phir us ka beta asarhaddoon takhtnasheen hua.