Ayyoob 12
ayyoob ka javaab : main mazaaq ka nishaana ban gaya hoon
1ayyoob nay javaab day kar kaha,
2“lagta hai ki tum hee vaahid daanishmand ho, ki hikmat tumhaaray saath hee mar jaaegee. 3lekin mujhay samajh hai, is naatay say main tum say adna naheen hoon. vaisay bhee kaun aisee baaten naheen jaanta? 4main to apnay doston kay liyay mazaaq ka nishaana ban gaya hoon, main jis kee duaaen allaah sunta tha. haan, main jo begunaah aur beilzaam hoon doosron kay liyay mazaaq ka nishaana ban gaya hoon! 5jo sukoon say zindagee guzaarta hai vah museebatzada ko haqeer jaanta hai. vah kaheta hai, ‘aao, ham usay thokar maaren jis kay paaon dagmagaanay lagay hai.’ 6ghaaratagaron kay khaimon men aaraam-o-sukoon hai, aur allaah ko taish dilaanay vaalay hifaazat say rahetay hain, go vah allaah kay haath men hain.
7taaham tum kahetay ho ki jaanvaron say poochh lay to vah tujhay saheeh baat sikhaaengay. parindon say pata kar to vah tujhay durust javaab dengay. 8zameen say baat kar to vah tujhay taaleem degee, balki samundar kee machhliyaan bhee tujhay is ka mafhoom sunaaengee. 9in men say ek bhee naheen jo na jaanta ho ki rabb kay haath nay yah sab kuchh kiya hai. 10usee kay haath men har jaandaar kee jaan, tamaam insaanon ka dam hai. 11kaan to alfaaz kee yoon jaanch-padtaal karta hai jis tarah zabaan khaanon men imtiyaaz kartee hai. 12aur hikmat un men paaee jaatee hai jo umrraseeda hain, samajh mut’addid din guzarnay kay baad hee aatee hai.
13hikmat aur qudrat allaah kee hai, vahee maslahet aur samajh ka maalik hai. 14jo kuchh vah dha day vah dubaara taameer naheen hoga, jisay vah giriftaar karay usay aazaad naheen kiya jaaega. 15jab vah paanee rokay to kaal padta hai, jab usay khula chhoday to vah mulk men tabaahee macha deta hai.
16us kay paas quvvat aur daanaaee hai. bhataknay aur bhatkaanay vaala donon hee us kay haath men hain. 17musheeron ko vah nangay paaon apnay saath lay jaata hai, qaaziyon ko ahemaq saabit karta hai. 18vah baadshaahon ka patka khol kar un kee kamron men rassa baandhta hai. 19imaamon ko vah nangay paaon apnay saath lay jaata hai, mazbootee say khaday aadmiyon ko tabaah karta hai. 20qaabil-ay-etimaad afraad say vah bolnay kee qaabiliyat aur buzurgon say imtiyaaz karnay kee liyaaqat chheen leta hai. 21vah shurfa par apnee hiqaarat ka izhaar karkay zoraavaron ka patka khol deta hai.
22vah andheray kay posheeda bhed khol deta aur gaheree taareekee ko raushnee men laata hai. 23vah qaumon ko bada bhee banaata aur tabaah bhee karta hai, ummaton ko muntashir bhee karta aur un kee qiyaadat bhee karta hai. 24vah mulk kay raahanumaaon ko aqal say maheroom karkay unhen aisay biyaabaan men aavaara phirnay deta hai jahaan raasta hee naheen. 25tab vah andheray men raushnee kay baghair tatol tatol kar ghoomtay hain. allaah hee unhen nashay men dhut sharaabiyon kee tarah bhataknay deta hai.