Ayyoob 15
ileefaz ka javaab : ayyoob kufr bak raha hai
1tab ileefaz temaanee nay javaab day kar kaha,
2“kya daanishmand ko javaab men behooda khayaalaat pesh karnay chaahien? kya usay apna pet taptee mashriqee hava say bharna chaahiay? 3kya munaasib hai ki vah fuzool bahs-mubaahasa karay, aisee baaten karay jo befaaida hain? hargiz naheen!
4lekin tera ravayya is say kaheen bura hai. too allaah ka khauf chhod kar us kay huzoor ghaur-o-khauz karnay ka farz haqeer jaanta hai. 5tera qusoor hee teray munh ko aisee baaten karnay kee tahereek day raha hai, isee liyay too nay chaalaakon kee zabaan apna lee hai. 6mujhay tujhay qusoorvaar thaheraanay kee zaroorat hee naheen, kyoonki tera apna hee munh tujhay mujrim thaheraata hai, teray apnay hee hont teray khilaaf gavaahee detay hain.
7kya too sab say pahelay paida hua insaan hai? kya too nay pahaadon say pahelay hee janm liya? 8jab allaah kee majlis mun’aqid ho jaaay to kya too bhee un kee baaten sunta hai? kya sirf tujhay hee hikmat haasil hai? 9too kya jaanta hai jo ham naheen jaantay? tujhay kis baat kee samajh aaee hai jis ka ilm ham naheen rakhtay? 10hamaaray darmiyaan bhee umrraseeda buzurg hain, aisay aadmee jo teray vaalid say bhee boodhay hain.
11ai ayyoob, kya teree nazar men allaah kee tasallee denay vaalee baaton kee koee ahemiyat naheen? kya too is kee qadar naheen kar sakta ki narmee say tujh say baat kee ja rahee hai? 12teray dil kay jazbaat tujhay yoon uda kar kyoon lay jaaen, teree aankhen kyoon itnee chamak uthen 13ki aakhirkaar too apna ghussa allaah par utaar kar aisee baaten apnay munh say ugal day?
14bhala insaan kya hai ki paak-saaf thaheray? aurat say paida huee makhlooq kya hai ki raastbaaz saabit ho? kuchh bhee naheen! 15allaah to apnay muqaddas khaadimon par bhee bharosa naheen rakhta, balki aasmaan bhee us kee nazar men paak naheen hai. 16to phir vah insaan par bharosa kyoon rakhay jo qaabil-ay-ghin aur bigda hua hai, jo buraaee ko paanee kee tarah pee leta hai.
17meree baat sun, main tujhay kuchh sunaana chaahata hoon. main tujhay vah kuchh bayaan karoonga jo mujh par zaahir hua hai, 18vah kuchh jo daanishmandon nay pesh kiya aur jo unhen apnay baapdaada say mila tha. un say kuchh chhupaaya naheen gaya tha. 19(baapdaada say muraad vah vaahid log hain jinhen us vaqt mulk diya gaya jab koee bhee pardesee un men naheen phirta tha).
20vah kahetay thay, bedeen apnay tamaam din dar kay maaray tadapta raheta, aur jitnay bhee saal zaalim kay liyay mahfooz rakhay gaay hain utnay hee saal vah pech-o-taab khaata raheta hai. 21dahshatanaak aavaazen us kay kaanon men goonjtee rahetee hain, aur amn-o-amaan kay vaqt hee tabaahee machaanay vaala us par toot padta hai. 22usay andheray say bachnay kee ummeed hee naheen, kyoonki usay talvaar kay liyay tayyaar rakha gaya hai.
23vah maara maara phirta hai, aakhirkaar vah giddhon kee khorak banega. usay khud ilm hai ki taareekee ka din qareeb hee hai. 24tangee aur museebat usay dahshat khilaatee, hamlaaaavar baadshaah kee tarah us par ghaalib aatee hain. 25aur vajah kya hai? yah ki us nay apna haath allaah kay khilaaf uthaaya, qaadir-ay-mutlaq kay saamnay takabbur dikhaaya hai. 26apnee motee aur mazboot dhaal kee panaah men akad kar vah tezee say allaah par hamla karta hai.
27go is vaqt us ka chihara charbee say chamakta aur us kee kamar motee hai, 28lekin aainda vah tabaahashuda shaheron men basega, aisay makaanon men jo sab kay chhoday huay hain aur jo jald hee patthar kay dher ban jaaengay. 29vah ameer naheen hoga, us kee daulat qaaim naheen rahegee, us kee jaaydaad mulk men phailee naheen rahegee.
30vah taareekee say naheen bachega. shola us kee komplon ko murjhaanay dega, aur allaah usay apnay munh kee ek phoonk say uda kar tabaah kar dega. 31vah dhokay par bharosa na karay, varna vah bhatak jaaega aur us ka ajr dhoka hee hoga. 32vaqt say pahelay hee usay is ka poora muaavaza milega, us kee kompal kabhee naheen phalay phoolegee.
33vah angoor kee us bel kee maanind hoga jis ka phal kachchee haalat men hee gir jaaay, zaitoon kay us darakht kee maanind jis kay tamaam phool jhad jaaen. 34kyoonki bedeenon ka jatha banjar rahega, aur aag rishvatakhoron kay khaimon ko bhasm karegee. 35un kay paaon dukh-dard say bhaaree ho jaatay, aur vah buraaee ko janm detay hain. un ka pet dhoka hee paida karta hai.”