Ayyoob 16
ayyoob ka javaab : main begunaah hoon
1ayyoob nay javaab day kar kaha,
2“is tarah kee main nay bahut see baaten sunee hain, tumhaaree tasallee sirf dukh-dard ka baais hai. 3kya tumhaaree laffaazee kabhee khatm naheen hogee? tujhay kya cheez bechain kar rahee hai ki too mujhay javaab denay par majboor hai? 4agar main tumhaaree jagah hota to main bhee tumhaaree jaisee baaten kar sakta. phir main bhee tumhaaray khilaaf pur’alfaaz taqreeren pesh karkay tauba tauba kah sakta. 5lekin main aisa na karta. main tumhen apnee baaton say taqviyat deta, afsos kay izhaar say tumhen taskeen deta. 6lekin meray saath aisa sulook naheen ho raha. agar main boloon to mujhay sukoon naheen milta, agar chup rahoon to mera dard door naheen hota.
7lekin ab allaah nay mujhay thaka diya hai, us nay meray pooray gharaanay ko tabaah kar diya hai. 8us nay mujhay sukadnay diya hai, aur yah baat meray khilaaf gavaah ban gaee hai. meree dublee-patlee haalat khadee ho kar meray khilaaf gavaahee detee hai. 9allaah ka ghazab mujhay phaad raha hai, vah mera dushman aur mera mukhaalif ban gaya hai jo meray khilaaf daant pees pees kar mujhay apnee aankhon say chhed raha hai. [a] lafzee tarjuma : apnee aankhen meray khilaaf tez karta hai. 10log gala phaad kar mera mazaaq udaatay, meray gaal par thappad maar kar meree beizzatee kartay hain. sab kay sab meray khilaaf muttahid ho gaay hain. 11allaah nay mujhay shareeron kay havaalay kar diya, mujhay bedeenon kay changul men phansa diya hai. 12main sukoon say zindagee guzaar raha tha ki us nay mujhay paash paash kar diya, mujhay galay say pakad kar zameen par patakh diya. us nay mujhay apna nishaana bana liya, 13phir us kay teer’andaazon nay mujhay gher liya. us nay berahemee say meray gurdon ko cheer daala, mera pit zameen par undel diya. 14baar baar vah meree qil’aabandee men rakhna daalta raha, pahelavaan kee tarah mujh par hamla karta raha.
15main nay taankay laga kar apnee jild kay saath taat ka libaas jod liya hai, apnee shaan-o-shaukat khaak men milaaee hai. 16ro ro kar mera chihara sooj gaya hai, meree palkon par ghana andhera chha gaya hai. 17lekin vajah kya hai? meray haath to zulm say baree rahay, meree dua paak-saaf rahee hai. 18ai zameen, meray khoon ko mat dhaampna! meree aah-o-zaaree kabhee aaraam kee jagah na paaay balki goonjtee rahay. 19ab bhee mera gavaah aasmaan par hai, meray haq men gavaahee denay vaala bulandiyon par hai. 20meree aah-o-zaaree mera tarjumaan hai, main bekhwaabee say allaah kay intizaar men raheta hoon. 21meree aahen allaah kay saamnay faanee insaan kay haq men baat karengee, us tarah jis tarah koee apnay dost kay haq men baat karay. 22kyoonki thoday hee saalon kay baad main us raastay par ravaana ho jaaoonga jis say vaapas naheen aaoonga.