Ayyoob 20

zoofar : ghalat kaam kee munsifaana saza dee jaaegee

¹tab zoofar naamaatee nay javaab day kar kaha,

²“yaqeenan meray muztarib khayaalaat aur vah ihsaasaat jo meray andar say ubhar rahay hain mujhay javaab denay par majboor kar rahay hain. ³mujhay aisee naseehat sunnee padee jo meree beizzatee ka baais thee, lekin meree samajh mujhay javaab denay kee tahereek day rahee hai.

⁴kya tujhay maaloom naheen ki qadeem zamaanay say yaanee jab say insaan ko zameen par rakha gayaa ⁵shareer ka fatahmand naara aarizee aur bedeen kee khushee pal bhar kee saabit huee hai? ⁶go us ka qad-o-qaamat aasmaan tak pahunchay aur us ka sar baadlon ko chhue ⁷taaham vah apnay fuzlay kee tarah abad tak tabaah ho jaaega. jinhon nay usay pahelay dekha tha vah poochhengay, ‘ab vah kahaan hai?’

⁸vah khwaab kee tarah ud jaata aur aainda kaheen naheen paaya jaaega, usay raat kee roya kee tarah bhula diya jaata hai. ⁹jis aankh nay usay dekha vah usay aainda kabhee naheen dekhegee. us ka ghar dubaara us ka mushaahada naheen karega. ¹⁰us kee aulaad ko ghareebon say bheek maangnee padegee, us kay apnay haathon ko daulat vaapas denee padegee. ¹¹javaanee kee jis taaqat say us kee haddiyaan bharee hain vah us kay saath hee khaak men mil jaaegee.

¹²buraaee bedeen kay munh men meethee hai. vah usay apnee zabaan talay chhupaaay rakhta, ¹³usay mahfooz rakh kar jaanay naheen deta. ¹⁴lekin us kee khuraak pet men a kar kharaab ho jaatee balki saamp ka zaher ban jaatee hai. ¹⁵jo daulat us nay nigal lee usay vah ugal dega, allaah hee yah cheezen us kay pet say khaarij karega. ¹⁶us nay saamp ka zaher choos liya, aur saamp hee kee zabaan usay maar daalegee. ¹⁷vah nadiyon say lutf’andoz naheen hoga, shahed aur baalaaee kee naheron say maza naheen lega. ¹⁸jo kuchh us nay haasil kiya usay vah hazam naheen karega balki sab kuchh vaapas karega. jo daulat us nay apnay kaarobaar say kamaaee us say vah lutf naheen uthaaega. ¹⁹kyoonki us nay pastahaalon par zulm karkay unhen tark kiya hai, us nay aisay gharon ko chheen liya hai jinhen us nay taameer naheen kiya tha. ²⁰us nay pet men kabhee sukoon mahsoos naheen kiya balki jo kuchh bhee chaahata tha usay bachnay naheen diya. ²¹jab vah khaana khaata hai to kuchh naheen bachta, is liyay us kee khushhaalee qaaim naheen rahegee. ²²joon hee usay kasrat kee cheezen haasil hongee vah museebat men phans jaaega. tab dukh-dard ka poora zor us par aaega. ²³kaash allaah bedeen ka pet bhar kar apna bhadakta qaher us par naazil karay, kaash vah apna ghazab us par barsaaay.

²⁴go vah lohay kay hathiyaar say bhaag jaaay, lekin peetal ka teer usay cheer daalega. ²⁵jab vah usay apnee peeth say nikaalay to teer kee nok us kay kalejay men say niklegee. usay dahshatanaak vaaqiaat pesh aaengay. ²⁶gaheree taareekee us kay khazaanon kee taak men baithee rahegee. aisee aag jo insaanon nay naheen lagaaee usay bhasm karegee. us kay khaimay kay jitnay log bach niklay unhen vah kha jaaegee. ²⁷aasmaan usay mujrim thaheraaega, zameen us kay khilaaf gavaahee denay kay liyay khadee ho jaaegee. ²⁸sailaab us ka ghar uda lay jaaega, ghazab kay din shiddat say baheta hua paanee us par say guzrega. ²⁹yah hai vah ajr jo allaah bedeenon ko dega, vah viraasat jisay allaah nay un kay liyay muqarrar kee hai.”