Ayyoob 22

ileefaz : ayyoob shareer hai

¹phir ileefaz temaanee nay javaab day kar kaha,

²“kya allaah insaan say faaida utha sakta hai? hargiz naheen! us kay liyay daanishmand bhee faaiday ka baais naheen. ³agar too raastbaaz ho bhee to kya vah is say apnay liyay nafa utha sakta hai? hargiz naheen! agar too beilzaam zindagee guzaaray to kya usay kuchh haasil hota hai? ⁴allaah tujhay teree khudaataras zindagee kay sabab say malaamat naheen kar raha. yah na soch ki vah isee liyay adaalat men tujh say javaab talab kar raha hai. ⁵naheen, vajah teree badee badkaaree, teray la-mahdood gunaah hain.

⁶jab teray bhaaiyon nay tujh say qarz liya to too nay bilaavajah vah cheezen apna lee hongee jo unhon nay tujhay zamaanat kay taur par dee theen, too nay unhen un kay kapdon say maheroom kar diya hoga. ⁷too nay thakemaandon ko paanee pilaanay say aur bhookay marnay vaalon ko khaana khilaanay say inkaar kiya hoga. ⁸beshak tera ravayya is khayaal par mabnee tha ki poora mulk taaqatavaron kee milkiyat hai, ki sirf baday log us men rah saktay hain. ⁹too nay bevaaon ko khaalee haath mod diya hoga, yateemon kee taaqat paash paash kee hogee. ¹⁰isee liyay too phandon say ghira raheta hai, achaanak hee tujhay dahshatanaak vaaqiaat daraatay hain. ¹¹yahee vajah hai ki tujh par aisa andhera chha gaya hai ki too dekh naheen sakta, ki sailaab nay tujhay dubo diya hai.

¹²kya allaah aasmaan kee bulandiyon par naheen hota? vah to sitaaron par nazar daalta hai, khwaah vah kitnay hee oonchay kyoon na hon. ¹³to bhee too kaheta hai, ‘allaah kya jaanta hai? kya vah kaalay baadlon men say dekh kar adaalat kar sakta hai? ¹⁴vah ghanay baadlon men chhupa raheta hai, is liyay jab vah aasmaan kay gumbad par chalta hai to usay kuchh nazar naheen aata.’ ¹⁵kya too us qadeem raah say baaz naheen aaega jis par badkaar chaltay rahay hain? ¹⁶vah to apnay muqarrara vaqt say pahelay hee sukad gaay, un kee bunyaaden sailaab say hee uda lee gaeen. ¹⁷unhon nay allaah say kaha, ‘ham say door ho ja,’ aur ‘qaadir-ay-mutlaq hamaaray liyay kya kuchh kar sakta hai?’ ¹⁸lekin allaah hee nay un kay gharon ko bharpoor khushhaalee say navaaza, go bedeenon kay buray mansoobay us say door hee door rahetay hain. ¹⁹raastbaaz un kee tabaahee dekh kar khush huay, bequsooron nay un kee hansee uda kar kaha, ²⁰‘lo, yah dekho, un kee jaaydaad kis tarah mit gaee, un kee daulat kis tarah bhasm ho gaee hai!’

²¹ai ayyoob, allaah say sulah karkay salaamatee haasil kar, tab hee too khushhaalee paaega. ²²allaah kay munh kee hidaayat apna lay, us kay farmaan apnay dil men mahfooz rakh. ²³agar too qaadir-ay-mutlaq kay paas vaapas aaay to bahaal ho jaaega, aur teray khaimay say badee door hee rahegee. ²⁴sonay ko khaak kay baraabar, ofeer ka khaalis sona vaadee kay patthar kay baraabar samajh le ²⁵to qaadir-ay-mutlaq khud tera sona hoga, vahee teray liyay chaandee ka dher hoga. ²⁶tab too qaadir-ay-mutlaq say lutf’andoz hoga aur allaah kay huzoor apna sar utha sakega. ²⁷too us say iltija karega to vah teree sunega aur too apnee mannaten badha sakega. ²⁸jo kuchh bhee too karnay ka iraada rakhay us men tujhay kaamyaabee hogee, teree raahon par raushnee chamkegee. ²⁹kyoonki jo shekhee bhagaarta hai usay allaah past karta jabki jo pastahaal hai usay vah najaat deta hai. ³⁰vah bequsoor ko chhudaata hai, chunaanchay agar teray haath paak hon to vah tujhay chhudaaega.”