Ayyoob 3
ayyoob kee aah-o-zaaree
1tab ayyoob bol utha aur apnay janm din par laanat karnay laga. 2us nay kaha,
3“vah din mit jaaay jab main nay janm liya, vah raat jis nay kaha, ‘pet men ladka paida hua hai!’ 4vah din andhera hee andhera ho jaaay, ek kiran bhee usay raushan na karay. allaah bhee jo bulandiyon par hai us ka khayaal na karay. 5taareekee aur ghana andhera us par qabza karay, kaalay kaalay baadal us par chhaaay rahen, haan vah raushnee say maheroom ho kar sakht dahshatzada ho jaaay. 6ghana andhera us raat ko chheen lay jab main maan kay pet men paida hua. usay na saal, na kisee maheenay kay dinon men shumaar kiya jaaay. 7vah raat baanjh rahay, us men khushee ka naara na lagaaya jaaay. 8jo dinon par laanat bhejtay aur liviyaataan ajhdahay ko tahereek men laanay kay qaabil hotay hain vahee us raat par laanat karen. 9us raat kay dhundalkay men timatimaanay vaalay sitaaray bujh jaaen, fajr ka intizaar karna befaaida hee rahay balki vah raat tuloo-ay-subah kee palken [a] palkon say muraad pahelee kirnen hai. bhee na dekhay. 10kyoonki us nay meree maan ko mujhay janm denay say na roka, varna yah tamaam museebat meree aankhon say chhupee rahetee.
11main paidaaish kay vaqt kyoon mar na gaya, maan kay pet say nikaltay vaqt jaan kyoon na day dee? 12maan kay ghutnon nay mujhay khush’aamadeed kyoon kaha, us kee chhaatiyon nay mujhay doodh kyoon pilaaya? 13agar yah na hota to is vaqt main sukoon say leta raheta, aaraam say soya hota. 14main un hee kay saath hota jo pahelay baadshaah aur duniya kay musheer thay, jinhon nay khandaraat az sar-ay-nau taameer kiay. 15main un kay saath hota jo pahelay hukmaraan thay aur apnay gharon ko sonay-chaandee say bhar letay thay. 16mujhay zaaay ho jaanay vaalay bachchay kee tarah kyoon na zameen men daba diya gaya? mujhay us bachchay kee tarah kyoon na dafnaaya gaya jis nay kabhee raushnee na dekhee? 17us jagah bedeen apnee belagaam harkaton say baaz aatay aur vah aaraam kartay hain jo tag-o-dau kartay kartay thak gaay thay. 18vahaan qaidee itmeenaan say rahetay hain, unhen us zaalim kee aavaaz naheen sunnee padtee jo unhen jeetay jee haankta raha. 19us jagah chhotay aur baday sab baraabar hotay hain, ghulaam apnay maalik say aazaad raheta hai.
20allaah museebatazadon ko raushnee aur shikastaadilon ko zindagee kyoon ata karta hai? 21vah to maut kay intizaar men rahetay hain lekin befaaida. vah khod khod kar usay yoon talaash kartay hain jis tarah kisee posheeda khazaanay ko. 22agar unhen qabr naseeb ho to vah baagh baagh ho kar jashn manaatay hain. 23allaah us ko zinda kyoon rakhta jis kee nazron say raasta ojhal ho gaya hai aur jis kay chaaron taraf us nay baad lagaaee hai. 24kyoonki jab mujhay rotee khaanee hai to haay haay karta hoon, meree aahen paanee kee tarah munh say phoot nikaltee hain. 25jis cheez say main darta tha vah mujh par aaee, jis say main khauf khaata tha us say mera vaasta pada. 26na mujhay itmeenaan hua, na sukoon ya aaraam balki mujh par bechainee ghaalib aaee.”