Ayyoob 33
allaah kaee tareeqon say insaan say hamkalaam hota hai
1ai ayyoob, meree taqreer sunen, meree tamaam baaton par kaan dharen! 2ab main apna munh khol deta hoon, meree zabaan boltee hai. 3meray alfaaz seedhee raah par chalnay vaalay dil say ubhar aatay hain, meray hont diyaanatdaaree say vah kuchh bayaan kartay hain jo main jaanta hoon. 4allaah kay rooh nay mujhay banaaya, qaadir-ay-mutlaq kay dam nay mujhay zindagee bakhshee.
5agar aap is qaabil hon to mujhay javaab den aur apnee baaten tarteet say pesh karkay mera muqaabla karen. 6allaah kee nazar men main to aap kay baraabar hoon, mujhay bhee mittee say lay kar tashkeel diya gaya hai. 7chunaanchay mujhay aap kay liyay dahshat ka baais naheen hona chaahiay, meree taraf say aap par bhaaree bojh naheen aaega.
8aap nay meray suntay hee kaha balki aap kay alfaaz abhee tak meray kaanon men goonj rahay hain, 9‘main paak hoon, mujh say jurm sarzad naheen hua, main begunaah hoon, mera koee qusoor naheen. 10to bhee allaah mujh say jhagadnay kay mavaaqay dhoondta aur mujhay apna dushman samajhta hai. 11vah meray paaon ko kaath men daal kar meree tamaam raahon kee paheraadaaree karta hai.’
12lekin aap kee yah baat durust naheen, kyoonki allaah insaan say aala hai. 13aap us say jhagad kar kyoon kahetay hain, ‘vah meree kisee bhee baat ka javaab naheen deta’? 14shaayad insaan ko allaah nazar na aaay, lekin vah zaroor kabhee is tareeqay, kabhee us tareeqay say us say hamkalaam hota hai.
15kabhee vah khwaab ya raat kee roya men us say baat karta hai. jab log bistar par let kar gaheree neend so jaatay hain 16to allaah un kay kaan khol kar apnee naseehaton say unhen dahshatzada kar deta hai. 17yoon vah insaan ko ghalat kaam karnay aur maghroor honay say baaz rakh kar 18us kee jaan gadhay men utarnay aur darya-ay-maut ko uboor karnay say rok deta hai.
19kabhee allaah insaan ko bistar par dard kay zareeay tarbiyat deta hai. tab us kee haddiyon men lagaataar jang hotee hai. 20us kee jaan ko khuraak say ghin aatee balki usay lazeeztareen khaanay say bhee nafrat hotee hai. 21us ka gosht-post sukad kar ghaaib ho jaata hai jabki jo haddiyaan pahelay chhupee huee theen vah numaayaan taur par nazar aatee hain. 22us kee jaan gadhay kay qareeb, us kee zindagee halaak karnay vaalon kay nazdeek pahunchtee hai.
23lekin agar koee farishta, hazaaron men say koee saalis us kay paas ho jo insaan ko seedhee raah dikhaae 24aur us par taras kha kar kahay, ‘usay gadhay men utarnay say chhuda, mujhay fidya mil gaya hai, 25ab us ka jism javaanee kee nisbat ziyaada tar-o-taaza ho jaaay aur vah dubaara javaanee kee see taaqat paaay’ 26to phir vah shakhs allaah say iltija karega, aur allaah us par meharbaan hoga. tab vah badee khushee say allaah ka chihara takta rahega. isee tarah allaah insaan kee raastbaazee bahaal karta hai.
27aisa shakhs logon kay saamnay gaaega aur kahega, ‘main nay gunaah karkay seedhee raah tedhee-medhee kar dee, aur mujhay koee faaida na hua. 28lekin us nay fidya day kar meree jaan ko maut kay gadhay men utarnay say chhudaaya. ab meree zindagee noor say lutf’andoz hogee.’
29allaah insaan kay saath yah sab kuchh do chaar martaba karta hai 30taaki us kee jaan gadhay say vaapas aaay aur vah zindagee kay noor say raushan ho jaaay.
31ai ayyoob, dhyaan say meree baat sunen, khaamosh ho jaaen taaki main baat karoon. 32agar aap javaab men kuchh bataana chaahen to bataaen. bolen, kyoonki main aap ko raastbaaz thaheraanay kee aarzoo rakhta hoon. 33lekin agar aap kuchh bayaan naheen kar saktay to meree sunen, chup rahen taaki main aap ko hikmat kee taaleem doon.”