Ayyoob 37
1yah soch kar mera dil laraz kar apnee jagah say uchhal padta hai. 2sunen aur us kee ghazabnaak aavaaz par ghaur karen, us ghurraatee aavaaz par jo us kay munh say nikaltee hai. 3aasmaan talay har maqaam par balki zameen kee intiha tak vah apnee bijlee chamaknay deta hai. 4is kay baad kadaktee aavaaz sunaaee detee, allaah kee robdaar aavaaz garaj uthtee hai. aur jab us kee aavaaz sunaaee detee hai to vah bijliyon ko naheen rokta.
5allaah anokhay tareeqay say apnee aavaaz garajnay deta hai. saath saath vah aisay azeem kaam karta hai jo hamaaree samajh say baahar hain. 6kyoonki vah barf ko farmaata hai, ‘zameen par pad ja’ aur mooslaadhaar baarish ko, ‘apna poora zor dikha.’ 7yoon vah har insaan ko us kay ghar men rahenay par majboor karta hai taaki sab jaan len ki allaah kaam men masroof hai. 8tab janglee jaanvar bhee apnay bhaton men chhup jaatay, apnay gharon men panaah letay hain.
9toofaan apnay kamray say nikal aata, shimaalee hava mulk men thand phaila detee hai. 10allaah phoonk maarta to paanee jam jaata, us kee satah door door tak munjamid ho jaatee hai. 11allaah baadlon ko namee say bojhal karkay un kay zareeay door tak apnee bijlee chamkaata hai. 12us kee hidaayat par vah mandalaatay huay us ka har hukm takmeel tak pahunchaatay hain. 13yoon vah unhen logon kee tarbiyat karnay, apnee zameen ko barkat denay ya apnee shafqat dikhaanay kay liyay bhej deta hai.
14ai ayyoob, meree is baat par dhyaan den, ruk kar allaah kay azeem kaamon par ghaur karen. 15kya aap ko maaloom hai ki allaah apnay kaamon ko kaisay tarteeb deta hai, ki vah apnay baadlon say bijlee kis tarah chamaknay deta hai? 16kya aap baadlon kee naqal-o-harkat jaantay hain? kya aap ko us kay anokhay kaamon kee samajh aatee hai jo kaamil ilm rakhta hai? 17jab zameen junoobee loo kee zad men a kar chup ho jaatee aur aap kay kapday tapnay lagtay hain 18to kya aap allaah kay saath mil kar aasmaan ko thonk thonk kar peetal kay aaeenay kee maanind sakht bana saktay hain? hargiz naheen!
19hamen bataaen ki allaah say kya kahen! afsos, andheray kay baais ham apnay khayaalaat ko tarteeb naheen day saktay. 20agar main apnee baat pesh karoon to kya usay kuchh maaloom ho jaaega jis ka pahelay ilm na tha? kya koee bhee kuchh bayaan kar sakta hai jo usay pahelay maaloom na ho? kabhee naheen! 21ek vaqt dhoop nazar naheen aatee aur baadal zameen par saaya daaltay hain, phir hava chalnay lagtee aur mausam saaf ho jaata hai. 22shimaal say sunaheree chamak qareeb aatee aur allaah robdaar shaan-o-shaukat say ghira hua a pahunchta hai. 23ham to qaadir-ay-mutlaq tak naheen pahunch saktay. us kee qudrat aala aur raastee zoraavar hai, vah kabhee insaaf ka khoon naheen karta. 24is liyay aadamzaad us say dartay aur dil kay daanishmand us ka khauf maantay hain.”