Ayyoob 41
1kya too liviyaataan [a] saaeensadaan muttafiq naheen ki yah kaun sa jaanvar tha. ajhdahay ko machhlee kay kaantay say pakad sakta ya us kee zabaan ko rassay say baandh sakta hai? 2kya too us kee naak chhed kar us men say rassa guzaar sakta ya us kay jabday ko kaantay say cheer sakta hai? 3kya vah kabhee tujh say baar baar rahem maangega ya narm narm alfaaz say teree khushaamad karega? 4kya vah kabhee teray saath ahd karega ki too usay apna ghulaam banaaay rakhay? hargiz naheen! 5kya too parinday kee tarah us kay saath khel sakta ya usay baandh kar apnee ladkiyon ko day sakta hai taaki vah us kay saath khelen? 6kya saudaagar kabhee us ka sauda karengay ya usay taajiron men taqseem karengay? kabhee naheen! 7kya too us kee khaal ko bhaalon say ya us kay sar ko haarpoonon say bhar sakta hai? 8ek dafa usay haath lagaaya to yah ladaaee tujhay hamesha yaad rahegee, aur too aainda aisee harkat kabhee naheen karega!
9yaqeenan us par qaaboo paanay kee har ummeed farebdih saabit hogee, kyoonki usay dekhtay hee insaan gir jaata hai. 10koee itna bedhadak naheen hai ki usay mushtail karay. to phir kaun mera saamna kar sakta hai? 11kis nay mujhay kuchh diya hai ki main us ka muaavaza doon. aasmaan talay har cheez meree hee hai!
12main tujhay us kay aaza kay bayaan say maheroom naheen rakhoonga, ki vah kitna bada, taaqatvar aur khoobsoorat hai. 13kaun us kee khaal [b] lafzee tarjuma : bairoonee libaas. utaar sakta, kaun us kay ziraabaktar kee do tahon kay andar tak pahunch sakta hai? 14kaun us kay munh ka darvaaza kholnay kee jur’at karay? us kay haulnaak daant dekh kar insaan kay rongtay khaday ho jaatay hain. 15us kee peeth par ek doosree say khoob judee huee dhaalon kee qataaren hotee hain. 16vah itnee mazbootee say ek doosree say lagee hotee hain ki un kay darmiyaan say hava bhee naheen guzar saktee, 17balki yoon ek doosree say chimtee aur liptee rahetee hain ki unhen ek doosree say alag naheen kiya ja sakta.
18jab chheenken maaray to bijlee chamak uthtee hai. us kee aankhen tuloo-ay-subah kee palkon kee maanind hain. 19us kay munh say mash’alen aur chingaariyaan khaarij hotee hain, 20us kay nathnon say dhuaan yoon nikalta hai jis tarah bhadaktee aur dahektee aag par rakhee gaee deg say. 21jab phoonk maaray to koilay dahek uthtay aur us kay munh say sholay nikaltay hain.
22us kee gardan men itnee taaqat hai ki jahaan bhee jaaay vahaan us kay aagay aagay maayoosee phail jaatee hai. 23us kay gosht-post kee tahen ek doosree say khoob judee huee hain, vah dhaalay huay lohay kee tarah mazboot aur belachak hain. 24us ka dil patthar jaisa sakht, chakkee kay nichlay paat jaisa mustahkam hai.
25jab uthay to zoraavar dar jaatay aur dahshat kha kar peechhay hat jaatay hain. 26hathiyaaron ka us par koee asar naheen hota, khwaah koee talvaar, nezay, barchhee ya teer say us par hamla kyoon na karay. 27vah lohay ko bhoosa aur peetal ko galee sadee lakdee samajhta hai. 28teer usay naheen bhaga saktay, aur agar ghulel kay patthar us par chalaao to un ka asar bhoosay kay baraabar hai. 29danda usay tinka sa lagta hai, aur vah shamsheer ka shor-sharaaba sun kar hans uthta hai. 30us kay pet par tez theekray say lagay hain, aur jis tarah anaaj par gaahanay ka aala chalaaya jaata hai usee tarah vah keechad par chalta hai. 31jab samundar kee gaheraaiyon men say guzray to paanee ubaltee deg kee tarah khaulnay lagta hai. vah marham kay mukhtalif ajza ko mila mila kar tayyaar karnay vaalay attaar kee tarah samundar ko harkat men laata hai. 32apnay peechhay vah chamakta damakta raasta chhodta hai. tab lagta hai ki samundar kee gaheraaiyon kay safed baal hain. 33duniya men us jaisa koee makhlooq naheen, aisa banaaya gaya hai ki kabhee na daray. 34jo bhee aala ho us par vah hiqaarat kee nigaah say dekhta hai, vah tamaam robdaar jaanvaron ka baadshaah hai.”