Yoel 2
rabb ka adaaltee din
1koh-ay-siyyoon par narsinga phoonko, meray muqaddas pahaad par jang ka naara lagaao. mulk kay tamaam baashinday laraz uthen, kyoonki rabb ka din aanay vaala hai balki qareeb hee hai. 2zulmat aur taareekee ka din, ghanay baadlon aur ghup andhray ka din hoga. jis tarah pau phattay hee raushnee pahaadon par phail jaatee hai usee tarah ek badee aur taaqatvar qaum a rahee hai, aisee qaum jaisee na maazee men kabhee thee, na mustaqbil men kabhee hogee. 3us kay aagay aagay aatish sab kuchh bhasm kartee hai, us kay peechhay peechhay jhulsaanay vaala shola chalta hai. jahaan bhee vah pahunchay vahaan mulk veeraan-o-sunsaan ho jaata hai, khwaah vah baagh-ay-adan kyoon na hota. us say kuchh naheen bachta. 4dekhnay men vah ghoday jaisay lagtay hain, faujee ghodon kee tarah sarpat daudtay hain. 5rathon ka sa shor machaatay huay vah uchhal uchhal kar pahaad kee chotiyon par say guzartay hain. bhoosay ko bhasm karnay vaalee aag kee chatakhtee aavaaz sunaaee detee hai jab vah jang kay liyay tayyaar badee badee fauj kee tarah aagay badhtay hain. 6unhen dekh kar qaumen dar kay maaray pech-o-taab khaanay lagtee hain, har chihara maand pad jaata hai.
7vah soormaaon kee tarah hamla kartay, faujiyon kee tarah deevaaron par chhalaang lagaatay hain. sab saf baandh kar aagay badhtay hain, ek bhee muqarrara raastay say naheen hatta. 8vah ek doosray ko dhakka naheen detay balki har ek seedha apnee raah par aagay badhta hai. yoon safabasta ho kar vah dushman kee difaaee safon men say guzar jaatay hain 9aur shaher par jhapatta maar kar faseel par chhalaang lagaatay hain, gharon kee deevaaron par chadh kar chor kee tarah khidkiyon men say ghus aatay hain.
10un kay aagay aagay zameen kaamp uthtee, aasmaan thartharaata, sooraj aur chaand taareek ho jaatay aur sitaaron kee chamak-damak jaatee rahetee hai. 11rabb khud apnee fauj kay aagay aagay garajta raheta hai. us ka lashkar nihaayat bada hai, aur jo faujee us kay hukm par chaltay hain vah taaqatvar hain. kyoonki rabb ka din azeem aur nihaayat haulnaak hai, kaun usay bardaasht kar sakta hai? tauba karkay vaapas aao
12rabb farmaata hai, “ab bhee tum tauba kar saktay ho. pooray dil say meray paas vaapas aao! roza rakho, aah-o-zaaree karo, maatam karo! 13ranjish ka izhaar karnay kay liyay apnay kapdon ko mat phaado balki apnay dil ko.”
rabb apnay khuda kay paas vaapas aao, kyoonki vah meharbaan aur raheem hai. vah tahemmul aur shafqat say bharpoor hai aur jald hee saza denay say pachhtaata hai. 14kaun jaanay, shaayad vah is baar bhee pachhta kar apnay peechhay barkat chhod jaaay aur tum naay siray say rabb apnay khuda ko ghalla aur mai kee nazren pesh kar sako.
15koh-ay-siyyoon par narsinga phoonko, muqaddas rozay ka elaan karo, logon ko khaas ijtima kay liyay bulaao! 16logon ko jama karo, phir jamaaat ko makhsoos-o-muqaddas karo. na sirf buzurgon ko balki bachchon ko bhee sheerakhwaaron samet ikattha karo. doolha aur dulhan bhee apnay apnay uroosee kamron say nikal kar aaen. 17laazim hai ki imaam jo allaah kay khaadim hain rabb kay ghar kay baraamday aur qurbaangaah kay darmiyaan khaday ho kar aah-o-zaaree karen. vah iqraar karen, “ai rabb, apnee qaum par taras kee nigaah daal! apnee mauroosee milkiyat ko laan-taan ka nishaana bannay na day. aisa na ho ki deegar aqvaam us ka mazaaq uda kar kahen, ‘un ka khuda kahaan hai’?”
rabb apnee qaum par rahem karta hai
18tab rabb apnay mulk kay liyay ghairat kha kar apnee qaum par taras khaaega. 19vah apnee qaum say vaada karega, “main tumhen itna anaaj, angoor aur zaitoon bhej deta hoon ki tum ser ho jaaogay. aainda main tumhen deegar aqvaam kay mazaaq ka nishaana naheen banaaoonga. 20main shimaal say aaay huay dushman ko tum say door karkay veeraan-o-sunsaan mulk men bhaga doonga. vahaan us kay aglay dastay mashriqee samundar men aur us kay pichhlay dastay maghribee samundar men doob jaaengay. tab un kee galee sadee naashon kee badboo chaaron taraf phail jaaegee.” kyoonki us [a] ghaaliban us say muraad khuda hai, lekin dushman bhee ho sakta hai. nay azeem kaam kiay hain.
21ai mulk, mat darna balki shaadiyaana baja kar khushee mana! kyoonki rabb nay azeem kaam kiay hain.
22ai janglee jaanavro, mat darna, kyoonki khulay maidaan kee hariyaalee dubaara ugnay lagee hai. darakht naay siray say phal la rahay hain, anjeer aur angoor kee badee fasal pak rahee hai.
23ai siyyoon kay baashindo, tum bhee shaadiyaana baja kar rabb apnay khuda kee khushee manaao. kyoonki vah apnee raastee kay mutaabiq tum par menh barsaata, pahelay kee tarah khizaan aur bahaar kee baarishen bakhsh deta hai. 24anaaj kee kasrat say gaahanay kee jagahen bhar jaaengee, angoor aur zaitoon kee kasrat say hauz chhalak uthengay.
25rabb farmaata hai, “main tumhen sab kuchh vaapas kar doonga jo tiddiyon kee badee fauj nay kha liya hai. tumhen sab kuchh vaapas mil jaaega jo baaligh tiddee, tiddee kay bachchay, javaan tiddee aur tiddiyon kay laarvon nay kha liya jab main nay unhen tumhaaray khilaaf bheja tha. 26tum dubaara jee bhar kar kha sakogay. tab tum rabb apnay khuda kay naam kee sitaaish karogay jis nay tumhaaree khaatir itnay baday mojizay kiay hain. aainda meree qaum kabhee sharminda na hogee. 27tab tum jaan logay ki main israaeel kay darmiyaan maujood hoon, ki main, rabb tumhaara khuda hoon aur meray siva aur koee naheen hai. aainda meree qaum kabhee bhee sharmasaar naheen hogee.
allaah apnay rooh ka vaada karta hai
28is kay baad main apnay rooh ko tamaam insaanon par undel doonga. tumhaaray betay-betiyaan nubuvvat karengay, tumhaaray buzurg khwaab aur tumhaaray naujavaan royaaen dekhengay. 29un dinon men main apnay rooh ko khaadimon aur khaadimaaon par bhee undel doonga. 30main aasmaan par mojizay dikhaaoonga aur zameen par ilaahee nishaan zaahir karoonga, khoon, aag aur dhuen kay baadal. 31sooraj taareek ho jaaega, chaand ka rang khoon sa ho jaaega, aur phir rabb ka azeem aur jalaalee din aaega. 32us vaqt jo bhee rabb ka naam lega najaat paaega. kyoonki koh-ay-siyyoon par aur yarooshalam men najaat milegee, bilkul usee tarah jis tarah rabb nay farmaaya hai. jin bachay huon ko rabb nay bulaaya hai un hee men najaat paaee jaaegee.