Matthew 5

Mattee 5

pahaadee vaaz

¹bheed ko dekh kar eesa pahaad par chadh kar baith gaya. us kay shaagird us kay paas aae ²aur vah unhen yah taaleem denay laga :

haqeeqee khushee

³“mubaarak hain vah jin kee rooh zarooratmand hai, kyoonki aasmaan kee baadshaahee un hee kee hai.

⁴mubaarak hain vah jo maatam kartay hain, kyoonki unhen tasallee dee jaaegee.

⁵mubaarak hain vah jo haleem hain, kyoonki vah zameen virsay men paaengay.

⁶mubaarak hain vah jinhen raastbaazee kee bhook aur piyaas hai, kyoonki vah ser ho jaaengay.

⁷mubaarak hain vah jo rahemdil hain, kyoonki un par rahem kiya jaaega.

⁸mubaarak hain vah jo khaalis dil hain, kyoonki vah allaah ko dekhengay.

⁹mubaarak hain vah jo sulah karaatay hain, kyoonki vah allaah kay farzand kahelaaengay.

¹⁰mubaarak hain vah jin ko raastbaaz honay kay sabab say sataaya jaata hai, kyoonki unhen aasmaan kee baadshaahee virsay men milegee.

¹¹mubaarak ho tum jab log meree vajah say tumhen laan-taan kartay, tumhen sataatay aur tumhaaray baaray men har qism kee buree aur jhootee baat kartay hain. ¹²khushee manaao aur baagh baagh ho jaao, tum ko aasmaan par bada ajr milega. kyoonki isee tarah unhon nay tum say pahelay nabiyon ko bhee eeza pahunchaaee thee.

tum namak aur raushnee ho

¹³tum duniya ka namak ho. lekin agar namak ka zaaiqa jaata rahay to phir usay kyoonkar dubaara namkeen kiya ja sakta hai? vah kisee bhee kaam ka naheen raha balki baahar phainka jaaega jahaan vah logon kay paaon talay raunda jaaega.

¹⁴tum duniya kee raushnee ho. pahaad par vaaqay shaher kee tarah tum ko chhupaaya naheen ja sakta. ¹⁵jab koee charaagh jalaata hai to vah usay bartan kay neechay naheen rakhta balki shamaadaan par rakh deta hai jahaan say vah ghar kay tamaam afraad ko raushnee deta hai. ¹⁶isee tarah tumhaaree raushnee bhee logon kay saamnay chamkay taaki vah tumhaaray nek kaam dekh kar tumhaaray aasmaanee baap ko jalaal den.

shareeat

¹⁷yah na samjho ki main moosvee shareeat aur nabiyon kee baaton ko mansookh karnay aaya hoon. mansookh karnay naheen balki un kee takmeel karnay aaya hoon. ¹⁸main tum ko sachch bataata hoon, jab tak aasmaan-o-zameen qaaim rahengay tab tak shareeat bhee qaaim rahegee - na us ka koee harf, na us ka koee zer ya zabar mansookh hoga jab tak sab kuchh poora na ho jaaay. ¹⁹jo in sab say chhotay ahkaam men say ek ko bhee mansookh karay aur logon ko aisa karna sikhaaay usay aasmaan kee baadshaahee men sab say chhota qaraar diya jaaega. is kay muqaablay men jo in ahkaam par amal karkay inhen sikhaata hai usay aasmaan kee baadshaahee men bada qaraar diya jaaega. ²⁰kyoonki main tum ko bataata hoon ki agar tumhaaree raastbaazee shareeat kay ulma aur fareesiyon kee raastbaazee say ziyaada naheen to tum aasmaan kee baadshaahee men daakhil honay kay laaiq naheen.

ghussaa

²¹tum nay suna hai ki baapdaada ko farmaaya gaya, ‘qatl na karna. aur jo qatl karay usay adaalat men javaab dena hoga.’ ²²lekin main tum ko bataata hoon ki jo bhee apnay bhaaee par ghussa karay usay adaalat men javaab dena hoga. isee tarah jo apnay bhaaee ko ‘ahemaq’ kahay usay yahoodee adaalat-ay-aliya men javaab dena hoga. aur jo us ko ‘bevuqoof!’ kahay vah jahennum kee aag men phainkay jaanay kay laaiq thaherega. ²³lihaaza agar tujhay bait-ul-muqaddas men qurbaanee pesh kartay vaqt yaad aaay ki teray bhaaee ko tujh say koee shikaayat hai ²⁴to apnee qurbaanee ko vaheen qurbaangaah kay saamnay hee chhod kar apnay bhaaee kay paas chala ja. pahelay us say sulah kar aur phir vaapas a kar allaah ko apnee qurbaanee pesh kar.

²⁵farz karo ki kisee nay tujh par muqaddma chalaaya hai. agar aisa ho to kachaheree men daakhil honay say pahelay pahelay jaldee say jhagda khatm kar. aisa na ho ki vah tujhay jaj kay havaalay karay, jaj tujhay pulis afsar kay havaalay karay aur nateejay men tujh ko jel men daala jaaay. ²⁶main tujhay sachch bataata hoon, vahaan say too us vaqt tak naheen nikal paaega jab tak jurmaanay kee pooree pooree raqam ada na kar day.

zinaakaaree

²⁷tum nay yah hukm sun liya hai ki ‘zina na karna.’ ²⁸lekin main tumhen bataata hoon, jo kisee aurat ko buree khwaahish say dekhta hai vah apnay dil men us kay saath zina kar chuka hai. ²⁹agar teree baaeen aankh tujhay gunaah karnay par uksaaay to usay nikaal kar phaink day. is say pahelay ki teray pooray jism ko jahennum men daala jaaay behatar yah hai ki tera ek hee uzv jaata rahay. ³⁰aur agar tera dahena haath tujhay gunaah karnay par uksaaay to usay kaat kar phaink day. is say pahelay ki tera poora jism jahennum men jaaay behatar yah hai ki tera ek hee uzv jaata rahay.

talaaq

³¹yah bhee farmaaya gaya hai, ‘jo bhee apnee beevee ko talaaq day vah usay talaaqnaama likh day.’ ³²lekin main tum ko bataata hoon ki agar kisee kee beevee nay zina na kiya ho to bhee shauhar usay talaaq day to vah us say zina karaata hai. aur jo talaakshuda aurat say shaadee karay vah zina karta hai.

qasam mat khaanaa

³³tum nay yah bhee suna hai ki baapdaada ko farmaaya gaya, ‘jhootee qasam mat khaana balki jo vaaday too nay rabb say qasam kha kar kiay hon unhen poora karna.’ ³⁴lekin main tumhen bataata hoon, qasam bilkul na khaana. na ‘aasmaan kee qasam’ kyoonki aasmaan allaah ka takht hai, ³⁵na ‘zameen kee’ kyoonki zameen us kay paaon kee chaukee hai. ‘yarooshalam kee qasam’ bhee na khaana kyoonki yarooshalam azeem baadshaah ka shaher hai. ³⁶yahaan tak ki apnay sar kee qasam bhee na khaana, kyoonki too apna ek baal bhee kaala ya safed naheen kar sakta. ³⁷sirf itna hee kahena, ‘jee haan’ ya ‘jee naheen.’ agar is say ziyaada kaho to yah iblees kee taraf say hai.

badla lenaa

³⁸tum nay suna hai ki yah farmaaya gaya hai, ‘aankh kay badlay aankh, daant kay badlay daant.’ ³⁹lekin main tum ko bataata hoon ki badkaar ka muqaabla mat karna. agar koee teray dahenay gaal par thappad maaray to usay doosra gaal bhee pesh kar day. ⁴⁰agar koee teree qamees lenay kay liyay tujh par muqaddma karna chaahay to usay apnee chaadar bhee day dena. ⁴¹agar koee tujh ko us ka saamaan utha kar ek kilomeetar jaanay par majboor karay to us kay saath do kilomeetar chala jaana. ⁴²jo tujh say kuchh maangay usay day dena aur jo tujh say qarz lena chaahay us say inkaar na karna.

dushman say muhabbat

⁴³tum nay suna hai ki farmaaya gaya hai, ‘apnay padosee say muhabbat rakhna aur apnay dushman say nafrat karna.’ ⁴⁴lekin main tum ko bataata hoon, apnay dushmanon say muhabbat rakho aur un kay liyay dua karo jo tum ko sataatay hain. ⁴⁵phir tum apnay aasmaanee baap kay farzand thaherogay, kyoonki vah apna sooraj sab par tuloo honay deta hai, khwaah vah achchhay hon ya buray. aur vah sab par baarish barasnay deta hai, khwaah vah raastbaaz hon ya naaraast. ⁴⁶agar tum sirf un hee say muhabbat karo jo tum say kartay hain to tum ko kya ajr milega? taiks lenay vaalay bhee to aisa hee kartay hain. ⁴⁷aur agar tum sirf apnay bhaaiyon kay liyay salaamatee kee dua karo to kaun see khaas baat kartay ho? ghairyahoodee bhee to aisa hee kartay hain. ⁴⁸chunaanchay vaisay hee kaamil ho jaisa tumhaara aasmaanee baap kaamil hai.