Nahemiyaah 4

sanballat yahoodiyon ka mazaaq udaata hai

¹jab sanballat ko pata chala ki ham faseel ko dubaara taameer kar rahay hain to vah aag-bagoola ho gaya. hamaara mazaaq uda uda kar ²us nay apnay hamkhidmat afsaron aur saamriya kay faujiyon kee maujoodgee men kaha, “yah zaeef yahoodee kya kar rahay hain? kya yah vaaqaee yarooshalam kee qil’aabandee karna chaahatay hain? kya yah samajhtay hain ki chand ek qurbaaniyaan pesh karkay ham faseel ko aaj hee khada karengay? vah in jalay huay pattharon aur malbay kay is dher say kis tarah naee deevaar bana saktay hain?” ³ammonee afsar toobiyaah us kay saath khada tha. vah bola, “unhen karnay do! deevaar itnee kamzor hogee ki agar lomdee bhee us par chhalaang lagaaay to gir jaaegee.”

⁴ai hamaaray khuda, hamaaree sun, kyoonki log hamen haqeer jaantay hain. jin baaton say unhon nay hamen zaleel kiya hai vah un kee zillat ka baais ban jaaen. bakhsh day ki log unhen loot len aur unhen qaid karkay jilaavatan kar den. ⁵un ka qusoor nazar’andaaz na kar balki un kay gunaah tujhay yaad rahen. kyoonki unhon nay faseel ko taameer karnay vaalon ko zaleel karnay say tujhay taish dilaaya hai.

⁶mukhaalafat kay baavujood ham faseel kee marammat kartay rahay, aur hotay hotay pooree deevaar kee aadhee oonchaaee khadee huee, kyoonki log pooree lagan say kaam kar rahay thay.

dushman kay hamlon kee mudaaf’at

⁷jab sanballat, toobiyaah, arbon, ammoniyon aur ashdood kay baashindon ko ittila milee ki yarooshalam kee faseel kee taameer men taraqqee ho rahee hai balki jo hissay ab tak khaday na ho sakay thay vah bhee band honay lagay hain to vah baday ghussay men a gaay. ⁸sab muttahid ho kar yarooshalam par hamla karnay aur us men gadbad paida karnay kee saazishen karnay lagay. ⁹lekin ham nay apnay khuda say iltimaas karkay paheredaar lagaaay jo hamen din raat un say bachaaay rakhen.

¹⁰us vaqt yahoodaah kay log karaahanay lagay, “mazdooron kee taaqat khatm ho rahee hai, aur abhee tak malbay kay baday dher baaqee hain. faseel ko banaana hamaaray bas kee baat naheen hai.”

¹¹doosree taraf dushman kah rahay thay, “ham achaanak un par toot padengay. un ko us vaqt pata chalega jab ham un kay beech men hongay. tab ham unhen maar dengay aur kaam ruk jaaega.”

¹²jo yahoodee un kay qareeb rahetay thay vah baar baar hamaaray paas a kar hamen ittila detay rahay, “dushman chaaron taraf say aap par hamla karnay kay liyay tayyaar khada hai.”

¹³tab main nay logon ko faseel kay peechhay ek jagah khada kar diya jahaan deevaar sab say neechee thee, aur vah talvaaron, nezon aur kamaanon say les apnay khaandaanon kay mutaabiq khulay maidaan men khaday ho gaay. ¹⁴logon ka jaaiza lay kar main khada hua aur kahenay laga, “un say mat daren! rabb ko yaad karen jo azeem aur maheeb hai. zahen men rakhen ki ham apnay bhaaiyon, beton betiyon, beeviyon aur gharon kay liyay lad rahay hain.”

¹⁵jab hamaaray dushmanon ko maaloom hua ki un kee saazishon kee khabar ham tak pahunch gaee hai aur ki allaah nay un kay mansoobay ko naakaam honay diya to ham sab apnee apnee jagah par dubaara taameer kay kaam men lag gaay. ¹⁶lekin us din say meray javaanon ka sirf aadha hissa taameeree kaam men laga raha. baaqee log nezon, dhaalon, kamaanon aur ziraabaktar say les pahera detay rahay. afsar yahoodaah kay un tamaam logon kay peechhay khaday rahe ¹⁷jo deevaar ko taameer kar rahay thay. saamaan uthaanay vaalay ek haath say hathiyaar pakday kaam kartay thay. ¹⁸aur jo bhee deevaar ko khada kar raha tha us kee talvaar kamar men bandhee rahetee thee. jis aadmee ko turam baja kar khatray ka elaan karna tha vah hamesha meray saath raha. ¹⁹main nay shurfa, buzurgon aur baaqee logon say kaha, “yah kaam bahut hee bada aur vasee hai, is liyay ham ek doosray say door aur bikhray huay kaam kar rahay hain. ²⁰joon hee aap ko turam kee aavaaz sunaaee day to bhaag kar aavaaz kee taraf chalay aaen. hamaara khuda hamaaray liyay ladega!”

²¹ham pau phatnay say lay kar us vaqt tak kaam men masroof rahetay jab tak sitaaray nazar na aatay, aur har vaqt aadmiyon ka aadha hissa nezay pakday pahera deta tha. ²²us vaqt main nay sab ko yah hukm bhee diya, “har aadmee apnay madadgaaron kay saath raat ka vaqt yarooshalam men guzaaray. phir aap raat kay vaqt paheraadaaree men bhee madad karengay aur din kay vaqt taameeree kaam men bhee.” ²³un tamaam dinon kay dauraan na main, na meray bhaaiyon, na meray javaanon aur na meray paheredaaron nay kabhee apnay kapday utaaray. neez, har ek apna hathiyaar pakday raha.