Zaboor 104
khaaliq kee hamd-o-sanaa
1ai meree jaan, rabb kee sitaaish kar! ai rabb meray khuda, too nihaayat hee azeem hai, too jaah-o-jalaal say aaraasta hai.
2teree chaadar noor hai jisay too odhay raheta hai. too aasmaan ko khaimay kee tarah taan kar
3apna baalaakhaana us kay paanee kay beech men taameer karta hai. baadal tera rath hai, aur too hava kay paron par savaar hota hai.
4too havaaon ko apnay qaasid aur aag kay sholon ko apnay khaadim bana deta hai.
5too nay zameen ko mazboot bunyaad par rakha taaki vah kabhee na dagamagaaay.
6sailaab nay usay libaas kee tarah dhaamp diya, aur paanee pahaadon kay oopar hee khada hua.
7lekin teray daantnay par paanee faraar hua, teree garajtee aavaaz sun kar vah ek dam bhaag gaya.
8tab pahaad oonchay huay aur vaadiyaan un jagahon par utar aaeen jo too nay un kay liyay muqarrar kee theen.
9too nay ek hadd baandhee jis say paanee badh naheen sakta. aainda vah kabhee pooree zameen ko naheen dhaanknay ka.
10too vaadiyon men chashmay phootnay deta hai, aur vah pahaadon men say bah nikaltay hain.
11bahetay bahetay vah khulay maidaan kay tamaam jaanvaron ko paanee pilaatay hain. janglee gadhay a kar apnee piyaas bujhaatay hain.
12parinday un kay kinaaron par basera kartay, aur un kee chahechahaatee aavaazen ghanay bel-booton men say sunaaee detee hain.
13too apnay baalaakhaanay say pahaadon ko tar karta hai, aur zameen teray haath say ser ho kar har tarah ka phal laatee hai.
14too jaanvaron kay liyay ghaas phootnay aur insaan kay liyay pauday ugnay deta hai taaki vah zameen kee kaashtkaaree karkay rotee haasil karay.
15teree mai insaan ka dil khush kartee, tera tel us ka chihara raushan kar deta, teree rotee us ka dil mazboot kartee hai.
16rabb kay darakht yaanee lubnaan men us kay lagaaay huay deodaar kay darakht seraab rahetay hain.
17parinday un men apnay ghonslay bana letay hain, aur laqlaq jooneepar kay darakht men apna aashiyaana.
18pahaadon kee bulandiyon par pahaadee bakron ka raaj hai, chataanon men bijjoo panaah letay hain.
19too nay saal ko maheenon men taqseem karnay kay liyay chaand banaaya, aur sooraj ko ghuroob honay kay auqaat maaloom hain.
20too andhera phailnay deta hai to din dhal jaata hai aur janglee jaanvar harkat men a jaatay hain.
21javaan sherbabar dahaad kar shikaar kay peechhay pad jaatay aur allaah say apnee khuraak ka mutaalba kartay hain.
22phir sooraj tuloo honay lagta hai, aur vah khisak kar apnay bhaton men chhup jaatay hain.
23us vaqt insaan ghar say nikal kar apnay kaam men lag jaata aur shaam tak masroof raheta hai.
24ai rabb, teray anaginat kaam kitnay azeem hain! too nay har ek ko hikmat say banaaya, aur zameen teree makhlooqaat say bharee padee hai.
25samundar ko dekho, vah kitna bada aur vasee hai. us men beshumaar jaandaar hain, baday bhee aur chhotay bhee.
26us kee satah par jahaaz idhar udhar safar kartay hain, us kee gaheraaiyon men liviyaataan phirta hai, vah ajhdaha jisay too nay us men uchhalnay koodnay kay liyay tashkeel diya tha.
27sab teray intizaar men rahetay hain ki too unhen vaqt par khaana muhayya karay.
28too un men khuraak taqseem karta hai to vah usay ikattha kartay hain. too apnee mutthee kholta hai to vah achchhee cheezon say ser ho jaatay hain.
29jab too apna chihara chhupa leta hai to un kay havaas gum ho jaatay hain. jab too un ka dam nikaal leta hai to vah nest ho kar dubaara khaak men mil jaatay hain.
30too apna dam bhej deta hai to vah paida ho jaatay hain. too hee roo-ay-zameen ko bahaal karta hai.
31rabb ka jalaal abad tak qaaim rahay! rabb apnay kaam kee khushee manaaay!
32vah zameen par nazar daalta hai to vah laraz uthtee hai. vah pahaadon ko chhoo deta hai to vah dhuaan chhodtay hain.
33main umr bhar rabb kee tamjeed men geet gaaoonga, jab tak zinda hoon apnay khuda kee madahsaraaee karoonga.
34meree baat usay pasand aaay! main rabb say kitna khush hoon!
35gunaahgaar zameen say mit jaaen aur bedeen nest-o-naabood ho jaaen. ai meree jaan, rabb kee sitaaish kar! rabb kee hamd ho