Zaboor 106
allaah ka fazl aur israaeel kee sarkashee
1rabb kee hamd ho! rabb ka shukr karo, kyoonki vah bhala hai, aur us kee shafqat abdee hai.
2kaun rabb kay tamaam azeem kaam suna sakta, kaun us kee munaasib tamjeed kar sakta hai?
3mubaarak hain vah jo insaaf qaaim rakhtay, jo har vaqt raast kaam kartay hain.
4ai rabb, apnee qaum par meharbaanee kartay vaqt mera khayaal rakh, najaat detay vaqt meree bhee madad kar
5taaki main teray chunay huay logon kee khushhaalee dekh sakoon aur teree qaum kee khushee men shareek ho kar teree meeraas kay saath sitaaish kar sakoon.
6ham nay apnay baapdaada kee tarah gunaah kiya hai, ham say naainsaafee aur bedeenee sarzad huee hai.
7jab hamaaray baapdaada misr men thay to unhen teray mojizon kee samajh na aaee aur teree mut’addid meharbaaniyaan yaad na raheen balki vah samundar yaanee baher-ay-qulzum par sarkash huay.
8to bhee us nay unhen apnay naam kee khaatir bachaaya, kyoonki vah apnee qudrat ka izhaar karna chaahata tha.
9us nay baher-ay-qulzum ko jhidka to vah khushk ho gaya. us nay unhen samundar kee gaheraaiyon men say yoon guzarnay diya jis tarah registaan men say.
10us nay unhen nafrat karnay vaalay kay haath say chhudaaya aur ivzaana day kar dushman kay haath say riha kiya.
11un kay mukhaalif paanee men doob gaay. ek bhee na bacha.
12tab unhon nay allaah kay farmaanon par eemaan la kar us kee madahsaraaee kee.
13lekin jald hee vah us kay kaam bhool gaay. vah us kee marzee ka intizaar karnay kay liyay tayyaar na thay.
14registaan men shadeed laalach men a kar unhon nay vaheen biyaabaan men allaah ko aazmaaya.
15tab us nay un kee darakhwaast pooree kee, lekin saath saath muhalak vaba bhee un men phaila dee.
16khaimaagaah men vah moosa aur rabb kay muqaddas imaam haaroon say hasad karnay lagay.
17tab zameen khul gaee, aur us nay daatan ko hadap kar liya, abeeraam kay jathay ko apnay andar dafan kar liya.
18aag un kay jathay men bhadak uthee, aur bedeen nazar-ay-aatish huay.
19vah koh-ay-horib yaanee seena kay daaman men bachhday ka but dhaal kar us kay saamnay aundhay munh ho gaay.
20unhon nay allaah ko jalaal denay kay bajaay ghaas khaanay vaalay bail kee pooja kee.
21vah allaah ko bhool gaay, haalaanki usee nay unhen chhudaaya tha, usee nay misr men azeem kaam kiay thay.
22jo mojizay haam kay mulk men huay aur jo jalaalee vaaqiaat baher-ay-qulzum par pesh aaay thay vah sab allaah kay haath say huay thay.
23chunaanchay allaah nay farmaaya ki main unhen nest-o-naabood karoonga. lekin us ka chuna hua khaadim moosa rakhnay men khada ho gaya taaki us kay ghazab ko israaeeliyon ko mitaanay say rokay. sirf is vajah say allaah apnay iraaday say baaz aaya.
24phir unhon nay kan’aan kay khushgavaar mulk ko haqeer jaana. unhen yaqeen naheen tha ki allaah apna vaada poora karega.
25vah apnay khaimon men budbudaanay lagay aur rabb kee aavaaz sunnay kay liyay tayyaar na huay.
26tab us nay apna haath un kay khilaaf uthaaya taaki unhen vaheen registaan men halaak kare
27aur un kee aulaad ko deegar aqvaam men phaink kar mukhtalif mamaalik men muntashir kar day.
28vah baal-faghoor devta say lipat gaay aur murdon kay liyay pesh kee gaee qurbaaniyon ka gosht khaanay lagay.
29unhon nay apnee harkaton say rabb ko taish dilaaya to un men muhalak beemaaree phail gaee.
30lekin feenhaas nay uth kar un kee adaalat kee. tab vaba ruk gaee.
31isee bina par allaah nay usay pusht-dar-pusht aur abad tak raastbaaz qaraar diya.
32mareeba kay chashmay par bhee unhon nay rabb ko ghussa dilaaya. un hee kay baais moosa ka bura haal hua.
33kyoonki unhon nay us kay dil men itnee talkhee paida kee ki us kay munh say beja baaten nikleen.
34jo deegar qaumen mulk men theen unhen unhon nay nest na kiya, haalaanki rabb nay unhen yah karnay ko kaha tha.
35na sirf yah balki vah ghairqaumon say rishta baandh kar un men ghul mil gaay aur un kay rasm-o-rivaaj apna liyay.
36vah un kay buton kee pooja karnay men lag gaay, aur yah un kay liyay phanday ka baais ban gaay.
37vah apnay betay-betiyon ko badroohon kay huzoor qurbaan karnay say bhee na katraaay.
38haan, unhon nay apnay betay-betiyon ko kan’aan kay devtaaon kay huzoor pesh karkay un ka maasoom khoon bahaaya. is say mulk kee behuramtee huee.
39vah apnee ghalat harkaton say naapaak aur apnay zinaakaaraana kaamon say allaah say bevafa huay.
40tab allaah apnee qaum say sakht naaraaz hua, aur usay apnee mauroosee milkiyat say ghin aanay lagee.
41us nay unhen deegar qaumon kay havaalay kiya, aur jo un say nafrat kartay thay vah un par hukoomat karnay lagay.
42un kay dushmanon nay un par zulm karkay un ko apna mutee bana liya.
43allaah baar baar unhen chhudaata raha, haalaanki vah apnay sarkash mansoobon par tulay rahay aur apnay qusoor men doobtay gaay.
44lekin us nay madad kay liyay un kee aahen sun kar un kee museebat par dhyaan diya.
45us nay un kay saath apna ahd yaad kiya, aur vah apnee badee shafqat kay baais pachhtaaya.
46us nay honay diya ki jis nay bhee unhen giriftaar kiya us nay un par taras khaaya.
47ai rabb hamaaray khuda, hamen bacha! hamen deegar qaumon say nikaal kar jama kar. tab hee ham teray muqaddas naam kee sitaaish karengay aur teray qaabil-ay-taareef kaamon par fakhar karengay.
48azal say abad tak rabb, israaeel kay khuda kee hamd ho. tamaam qaum kahay, “aameen! rabb kee hamd ho!”