Zaboor 137
baabal men jilaavatanon kee aah-o-zaaree
1jab siyyoon kee yaad aaee to ham baabal kee naheron kay kinaaray hee baith kar ro paday.
2ham nay vahaan kay safeda kay darakhton say apnay sarod latka diay,
3kyoonki jinhon nay hamen giriftaar kiya tha unhon nay hamen vahaan geet gaanay ko kaha, aur jo hamaara mazaaq udaatay hain unhon nay khushee ka mutaalba kiya, “hamen siyyoon ka koee geet sunaao!”
4lekin ham ajnabee mulk men kis tarah rabb ka geet gaaen?
5ai yarooshalam, agar main tujhay bhool jaaoon to mera dahena haath sookh jaaay.
6agar main tujhay yaad na karoon aur yarooshalam ko apnee azeemtareen khushee say ziyaada qeemtee na samjhoon to meree zabaan taaloo say chipak jaaay.
7ai rabb, vah kuchh yaad kar jo adomiyon nay us din kiya jab yarooshalam dushman kay qabzay men aaya. us vaqt vah bolay, “usay dha do! bunyaadon tak usay gira do!”
8ai baabal betee jo tabaah karnay par tulee huee hai, mubaarak hai vah jo tujhay us ka badla day jo too nay hamaaray saath kiya hai.
9mubaarak hai vah jo teray bachchon ko pakad kar patthar par patakh day.